Nebwôgte 4 - NTSHOB NSI

Ntage

¹ Israél, ndonni a bwô bin ju' ntshù' boa nkàn mi me tshwèt ntswite zin yi là. Bin ke nze njoṅ i fa, a tshùa ndùlala bin yôge, ntsho ntùm ngô ze Tshùaben Nsi tà tsin fà bin nà.

² Bin ke nsi kwi'te sàm ju num ju ze me kite bin nà, ke bèn nséb ju bwe; là, bin nsi ze ntshù' Tshùaben Nsi zin kua' mba me kite bin nà.

³ Miag min lo yen ju ze Tshùaben ghù num Baal-Béor; Tshùaben Nsi o lo biagte ben tse bo yab njam Baal-Béor là me Israél.

⁴ Bin tse bin na' ṅal a nda' num Tshùaben Nsi zin nà, bin ke' sènni a ntùn.

⁵ Tshù, me lo tswite zin ntshù' boa nkàn, mba Tshùaben Nsi àm na' ntshob me là, ndùlala ndù bin ke nze ntùm ngô ze bin nsi tsho bwe a tù' zin nà.

⁶ Bin nsi ke tshùb njoṅ i fa bèn ke ze; nummbe yen nà nsi la'te zenu zin bo zin nesiaṅte num miag ngô tse bo nsi ju' bo ke ntshob nu bwe là; bo ju' men ntshù' nke ntshob ndù: Yen mà nzwit mèn ndùb li b'a ngô z'a ghù zenu bo nesiaṅte kua' yàm nà!

⁷ A kua' zit nzwit mèn ndùb z'a ghù ba nsi tse bo ghebte mba Tshùaben Nsi be be ngebte num be njoṅ ngelaṅ fa be tsiaṅ lén se l'à?

⁸ A kua' zit nzwit mèn ndùb z'a ghù ntshù' boa nkàn netsin mba yen ntshù' li ze me tshwèt nda'te bin sènni l'à?

⁹ Israél, nda' ndù zete num tu wul o, nzete kua' mebwô num ntù o njoṅ lé'njù fa ts'o ke' ntùn nà, mbwôg ndù k'o lag tshu tse miag mo yen nà, mba ndù kà tshen tshu là tum tu o; zi'te bon tsho boa bon bon tsho yi.

¹⁰ Kwimte lé'njù s'o tsin mbwe Tshùaben Nsi o Horéb là. Tshùaben lo tshob me sen lé'njù là ndù: Kùmte ngô mbaṅ àm. Me kô neghù bo ju' ntshob màm. A nsi tshùa ndùlala bo ke mbwôg àm njoṅ ngelaṅ fa bo nsi ke' num nsitsha' là, mba ndù bo tswite ntshob màm bon tshobe.

¹¹ Ndùlala bin lo ghebte, ntsinte tun mbale. Mbat nke nkù, lambwôg nke nko' nkum tà mfe tèt kamànyam, njame, ndot bo dù' nesènte lo be bwe.

¹² Tshùaben lo tshob nu bin netèt mbwôge; bin ju' là ntshobe, là ke yen se sàm mèn, nju' a nda' nze mèn.

¹³ Tshùaben lo tshob kàn se bin, mbètte zin neke nze men ntshù' gham nà; a na' nkite men ntshù' l'à num ntafèt ndoṅ mbàa.

¹⁴ Num yen ngelaṅ nà Tshùaben tshob me ndù me tswite zin ntshù' boa nkàn, ndùlala ndù bin tsho nke nze ntùm ngô ze bin nsi tsho bwe a tù' zin nà.

Bo bam nà num neghamte neto

¹⁵ Mba bin na' mbe ke yen se sàm mèn lé'njù se Tshùaben tshob nu bin Horéb netèt mbwôg là, bin zete num ntù tsine,

¹⁶ mbwôg ndù kà bin bagte wut tsin nabte mfute ju nekom, z'a ke nda'te mo' ta' neto là, neto z'a fute mandum ke mènnzwi lo,

¹⁷ ngù se mo' nyàm z'a nsitsha'a, se mo' saṅ s'a ke mfùt mfe tù,

¹⁸ se ta' nyàm z'a ke nsoṅ bam se nsi, se mo' ngontse z'a be ntswe ntùm ntse mi a bam tsha' lo là.

¹⁹ Israél, zete mum ntù o, mbwôg ndù k'o bù' miag mo mfe kamànyam nke ndôte lagnyam, maṅwù boa nsa mi, njoṅ ntshu ntsho mfe kamànyam, yen nà tènt'o, o te nkekwi' mbwe bo, ngamte yube. Tshen tshu là b'a tse Tshùaben Nsi ghabte ngôngô fa tun bam kamànyam nà.

²⁰ Là, mba bin nà, Tshùaben lo lo' zin ntum yi ntùm ndà mbwôg tùn Egipto, ndùlala ndù bin tù' kua' ze nzwit mèn, mba bin be sènni là.

²¹ Tshùaben lo ya ntù num àm num tu bin; a lo tshob nsaṅlaṅ bwe mbe me ke dut Yordan, mba ndù me ke tsho ntùm mbwô ngô ze Tshùaben Nsi o fà wù mba ntsi' là me Israél.

²² Ndùlala me nsi kwù a ntùm yen ngô li, me ke nsi dut Yordan; là bin, bin nsi dule, lo' yen mbwô ngô là, a tù' zine.

²³ Bin zete num ntù tsine, ndùlala ndù kà bin lag kàn se bin à Tshùaben Nsi zin na' ngwat là, mba ndù k'o ghù mfute ju nekome, ke sàm ju lo z'a fute ju ze Tshùaben Nsi o na' ntshù' o là me Israél.

²⁴ Nummbe Tshùaben Nsi o b'a tonte mbwôge, mbe Nsi lànghe'e.

²⁵ Ndùs'o nsi ghù bon, ghù bon bon tsho, tswe ngelaṅ yàm ntùm ngô là, a be ze bin bagte wut tsine, nabte mfute ju nekome, ke tshu ts'a fute mo' ju lo, a be ze bin ghù nukebwô num miag Tshùaben Nsi zin, ndo' nkamte yantù i yi là,

²⁶ (mba me lo' kamànyam bo tsha' sènni mba nkwénta là), ndù mba mo' vùkob nsi biagte zin ndende ntùm ngô bin nsi ghù mo' yoṅ Yordan nà; bin ke nsi ghubte bwe lé'njù yàme, nummbe Tshùaben nsi biagte zin fafa.

²⁷ Tshùaben nsi sate zin netèt ntumntum, bin tù' a metsit bwoṅ benntùn netèt ngôngô dù' ze Tshùaben nsi nèn bin bwe là.

²⁸ Bin nsi tsho bwe ke fa' ba nsi, tshen nà ts'a b'a mfa' mbu mènntùn, mb'a ntshwèn bo ndoṅ nà. Bo ke' ku'ni neyene, ke ju', ke jù ju, ke bèn nju' njwèt ju là.

²⁹ A bwe là z'o nsi diag mba Tshùaben Nsi o ke yen i, a be z'o diag mba njoṅ ntù o fa bo zwiag so fa là.

³⁰ Njoṅ tshen tshu là fa nsi ṅwag wù ntùm nge'. A nsi tshùa ndùlala, o bèn njam ntèt Tshùaben Nsi o, ke ju' nz'é;

³¹ nummbe Tshùaben Nsi o b'a Nsi kondèn, ndù a ke nsi ghua' o, ke biagt'o: A ke nsi lag kàn se boa tà tsho na' ngwale, a saṅlaṅ num bwe là.

Nsi lo tsho' kua' ben tse

³² Tshàm mbètte ngelaṅ ts'a yà tôge, fe ndùs'o na' mbe ke yoṅ mbe là, fe lé'njù se Nsi nabte mènntùn num nsitsha' là. Bètte mbe ze lèn yen nu nekuni là to' tum mo' taṅ njù là, mbe ze mèn to' ju' lèn yen mà kuni nu li là.

³³ Mo' nzwit mèn to' ju' nze Nsi, a nke ntshob nu netèt mbwôg ké? Mba ng'é nsi yôg à?

³⁴ Mo' nsi bwe ndù a to' se' lo' mo' nzwit mèn netèt mo' nzwit mèn njam laṅte, ba keki, ba nsà boa ntsho nele'e, ze bu i ta, nyit, njam ba nu netshàm boa fétwut là ké? Tshùaben Nsi zin lo ghù njoṅ tshen tshu là fa num miag min Egipto.

³⁵ Wù Israél, bo lo lo' o ngù nkwénta tshen tshu là yi, ndùlala ndù o lèn mbe Tshùaben b'a Nsi, ndù mo' ke' bèn mbe bwe.

³⁶ A tsin mfe kamànyam ntshag nz'é wù nelo' ntswit'o yi. A bèn ngù o yen mbwôg i ze ndùb num nsitsha'a, nju' nz'é netèt mbwôge.

³⁷ A lo kô tà tsho, ndùse bo tôg là, a tsho' nzwit yub; tu wul i lo ghù o ko' Egipto njam neta i ze ndùb.

³⁸ A lo ta' ngô tse benntùn yàm bwe ntshùa o, ngù neta ntshùa o là, ngù o tsho ntùm ngô yube, a tù' yu, mb'o tshwèt njen sènni là.

³⁹ Ndùlala lèn sènni mbèn ntshùb ntù o ndù Tshùaben b'a Nsi mfe kamànyam mba num nsitsha'a, ndù mo' ke' bèn mbe bwe.

⁴⁰ Ze ntshù' mi boa nkàn mi mi me kite wù sènni là. A nsi tshùa ndùlala o be mebwô, wù mba bon tsho, ndùs'o nsi tôg là, mbèn ngù lé'njù tsho yàm ntùm ngô ze Tshùaben Nsi o fà wù là.

Ngô tat nekù ndem bwe

⁴¹ Ndùlala Mosé tsho' ntusô ntat mo' yoṅ Yordan nze ntumnyam,

⁴² ndo' men ntusô là ngù mi ndàlem yi num ngazwi mèn. Mèn z'a be zwi mèn ke be ndù a jù'ù, ke be ndù bo yi ghù kebàn nà, mb'a nsi kù nèn lem tu i bwe, ntùm mo' ta' tusô netèt men nà.

⁴³ Men ntusô là na' mb'a: Betser num kônkwa, ntùm tômbo'o, num tse tsha' ben Rubèn; Ramot Galad, num tse tsha' ben Gad; Golan Basan num tse tsha' ben Manasé.

Nebèn nkwimte ntshù' nsoṅ Mosé mbatte bàa

⁴⁴ Tshù ntshù' Mosé la'te bon Israél li:

⁴⁵ Tshù ntage, ntshù' boa nkàn mi Mosé kite bon Israél ndùse bo tum Egipto li:

⁴⁶ A na' mb'a mo' yoṅ Yordan, tômbo'o, se Bet-Béor ntùm ngô Sion mfen Amor z'a ke ntswe Hesbon nà. A yi ze Mosé boa bon Israél na' nton i ntsho ndùse bo tum Egipto là.

⁴⁷ Bo lo lo' ze ngô mba ze Og mfen Basan. Tshen fenfen Amor bàa li na' mb'a mo' yoṅ Yordan, nze ntumnyam.

⁴⁸ Yub ngô ke nto' a fe Aroer num nkaṅ Arnon nèn nkum num mbat Sion z'a b'a Hermon nà,

⁴⁹ ngù mo' yoṅ tômbo' Yordan fa, nze ntumnyam tà nkum dibantse z'a tômbo'o, tun Pisga là.