Nebwôgte 32 - NTSHOB NSI

¹ Kamànyam, bin kù' ntoṅ, m'a' tshob nu; tsha' ju' ntshob mi a tum ntshu àm nà.

² Yàm ju nezi'te ke nsa à mba mbaṅ nà, ntshob màm ke naṅ nsi à mba meme' là, nke naṅ à mba befe mbaṅ nà num bon ntù, nke naṅ à mba tubtub mbaṅ nà num nenà;

³ nummbe me tshwèt nkô nesoṅ lén Tshùaben, ngamte lén Nsi be.

⁴ Tshùaben b'a gholoṅ sàm; mfa' mi bwô neshu, nummbe njoṅ tse manze fa b'a tse ntùn, a b'a Nsi nenùne, mfànnu ke tse num i, a b'a mèn netsine, mbe mèn ndaṅndaṅ.

⁵ Bo ghù nukebwô num Nsi; bo ke bèn mb'a bon tse, là nzwit mèn z'a sagte wul i là. Bo b'a nzwit mèn z'a bagte wul i, mbe nzwit kebwô là.

⁶ Bin ke ndo' à Tshùaben mba mfànnu là ké? Nzwit mèn z'a ke' ghù siaṅte ke ghù zenu? A ke b'a tàan, mbe mbom o ké? A ke yi bèn nabt'o mbèn ntswe'te ntù o ké?

⁷ Kwimte njwèn lé'njù ts'a tôg là, kwimte njwèn ngu'njù, ndo' zwiaṅ njù lôg; bètte tàan nu a zi't'o, bètte tsho ywèn benntùn nu bo soṅ o.

⁸ Nsi z'a tà mfe tù là lo fà tse tsha' mba zit ngô lo, njab ndùnsi mba zit ngô lo nsi tswe bwe là ndùs'a ke nsate benntùn nà. A lo ghù njoṅ i fa à mfi' mba tse nshum Israél lo' njàm yi là;

⁹ nummbe ze kam Tshùaben b'a ze ze nzwit mèn; nzwit Yakob b'a mi ntsi' mi a lo' là.

¹⁰ A lo fon mo' dù' tsha' njum, ntùm mo' dù' banban dù' tonte tshu'te nyàm tshwèt be là; a kut tshen dù' là, nke mbébe, nke mbéb i mba kua' nyilag i là.

¹¹ A lo ghù à mba ghammàtat z'a be mbéb bon tse, nke mfùtte be num nkàn i, nke nyitte mbàb mi nket bon tse, njab yub num mfe mi là.

¹² Tshùaben tshagte ze nzwit mèn a kua' tù' i, a lo ke be à bo mo' nsi ba tum.

¹³ A lo ghù a ko' nèn dù' neṅate ts'a ntùm ngô là. Israél lo jù ntàm tù mi a tshwèt là; Tshùaben lo ghù a jù ṅwa' z'a ntùm gholoṅ nà, njù mfèt mi a tum ntùm gholoṅ z'a ta neshu là.

¹⁴ Mfèt mbùn mfô boa mbùn mbwe mi a kut nta là, boa nzit njùmbwe, nzit nkomnjù mi a Basan boa mfot mbwe là, boa bàn nsa, nu ndu' meba, ntse ntàm tù ndu', mi a fute lem nà.

¹⁵ Israél tshote nto' tatu; o tshote, ngu'u, ndunte! A ghua' Nsi z'a be mbom i là, a wag gholoṅ se yôg be mfe yi bwe là.

¹⁶ Bo tshùa njam tse nsi ba tum ndu'te lànghe' ntù i, bo lo' tshùaya'nu nkamte yantù i yi.

¹⁷ Bo fà tshule'te ba neto ndù bo ke' b'a Nsi, tshen nsi là b'a tse bo na' mbe ke lèn i là, tshen nsi là yôg nebe, ndù tà tsin lo ke be bwôg yube.

¹⁸ O ghua' gholoṅ s'a ghù bo bwe o là, ndag Nsi z'a mbwe o là.

¹⁹ Tshùaben lo yene, nja ntù, là ngua' tse nshum mba tse ngon.

²⁰ A tshob ndù: M'a' lem yub se àm, njen yàm mb'a nsi miagte yi num bo là. Nummbe bo b'a ta' nzwit kebwô, mbe bon tse bo be nta tu là.

²¹ Bo lo tshùa njam ju z'a ke' b'a Nsi là ndu'te lànghe' ntù àm, ntshùa njam neto tshob nkamte yantù àm; tu wul àm yàm nsi tshùa njam ngô kagni du'te lànghe' ntù bo, tshùa njam ngô femni benntùn kamte yantù yube.

²² Nummbe mbwôg yantù lo' mbwôge, a nsi kù tà kum ngô fe ben; a nsi kù tsha' boa tshu tse, kù ba tun mbale.

²³ M'a' nso nzenze nge' num bo, ma' nkét màm num bo k'a mi.

²⁴ Nziku' a' jum yube, saṅte wut kù yube, tonkèt ngokèt bèn nkù yube; m'a' ghù tshùagkèt nyàm fèt yube, ntshag nyu num bo.

²⁵ Bo a' kwù ṅwi ntshundà, nge' zwite yub ntùm ndà à ntùm bwôg: A nsi be num ménnshum à mb'a be num ménngon nà, be ménfi z'a num nyô bùn n'a mb'a be num njwèn mèn nà.

²⁶ Me tshob à mbe m'a' lo' à fet mfùag ṅwat yub yi, m'a' biagte yub netèt nzwit mèn nyiaṅtu!

²⁷ Là me ke tshwèt mbwôg tute ngakeban, nke mbwôg ndù kà ghakeban tshob ghamaṅte yub fùte wut tshobe, ntshob mbe bu yub bèn mfà yube, ke bam ndù Tshùaben bèn ngù tshen tshu là fa.

²⁸ A ta' ngô ndù a bi nesiaṅte, zenu ke bèn mbe tse netèt bo.

²⁹ Bo lo mb'a ghazenu mba tshù mb'a be bo ju', nkwate mfà num nu z'a tum bo li:

³⁰ A ndù ke kà ta' mèn nke njab njam ben ntsha' mbùm, ben bàa nke njab njam ben ntsha' gham kà bo kù à? A' tswe mbe ndù Tshùaben z'a be gholoṅ sob là swèn yube, mbe ndù Tshùaben kag yube.

³¹ Nummbe sob gholoṅ ke' b'a mba se be là. Ghakeban be lèn kua' ndùlala.

³² Sob tù ntàm ndu' tum à num se Sodom, tsha' tse b'a mba tse Gomora là; ntàm tù ndu' mub ghù tsheb ntùm bwe, tsha tse nke nzwe.

³³ Ndu' mub ghù njoṅ nyu bwe, a b'a tsheb, mb'a mba njoṅ nyu ntshwèn nà.

³⁴ Tshùaben lèn ju ze ghakeban tshob ghù là, a ke ntù' béb à ngelaṅ ntùn kà yab nu.

³⁵ Neyagte mba' bo neyab nu lôt'a Tshùaben ndùse ku yub nsi tiag là! Sob lé'njù nge' yà ghebte, ju z'a tshwèt ndôte yub là ke ghubte.

³⁶ Tshùaben nsi tsho'te ze nzwit mèn; nda' ndù a' ko ndèn ghafa' tse, ndùs'a yen mbe yub neta kôge, nkuan ke ménla' lo ke bèn mbe là.

³⁷ Tshùaben a' bètte dù' ze nsi tshob be là, dù' ze gholoṅ se bo ke ndem bwe be là.

³⁸ Bo lo ke mfèt nzit tshule'te tshobe, nke nu ndu' mi bo ma' nsi là. Bo se' ndonni njwimte zine, bo se ndonni nkabte zine!

³⁹ Bin lèn ndonni ndù me bèn mbe Nsi, ndù mo' nsi ke tse mbaṅ àm. Me num mfà yôg, mbèn nzwi mèn, nke nkag mfaṅ mbèn ntshwinte, sàm mèn ke ku'ni nekwé ju bu àm.

⁴⁰ Nummbe me bù' bu àm mfe kamànyam ntshob ndù me b'a ntùn matmat!

⁴¹ A be ze me kùa ṅwi àm ze neziag, a be ze me tshùb nunetsin bu àm nà, mba m'a' yagte mba' ghamaṅt'àm, njab nu num ben tse bo num mbàn àm nà; me nsi be bèn njam to ben tse bo num mbàn àm nà.

⁴² Nkét màm a' bum lem, ṅwi àm ywèt mbàb, lem ben bo ket mfaṅ nà mba tse kuan ntsho, bo tu fenfen ngakeban.

⁴³ Ngôngô, bin ghamte ze nzwit mèn! Nummbe Tshùaben nsi yagte mba' lem ghafa' tse; a nsi yagte mba' num ghakeban tse, tamte fa num ze ngô mba ze nzwit mèn.

⁴⁴ Mosé bo Yoshua nshum Nun tshob ntshob sen kwi là mbwe ngô, ngô ju'.

⁴⁵ Ndùse Mosé miagte netshob men ntshob là mbwe ba Israél fa là,

⁴⁶ a tshob bo ndù: Bin yab ntù bin ndù bin nsi tswite bon tsin njoṅ ntshob yen ntshù' li me tshwèt ntagte zin num bwe sènni là, ndù bo tshùbe, mbèn nke nze.

⁴⁷ Nummbe yen nà a' ywimte zin kua' neshu; yôg sin b'a bwe, bin a' tshùa bwe kà ntswe'njù min ntènte ntùm ngô bin nsi tsho bwe, a tù' zine, ndùse bin dut Yordan nà.

⁴⁸ Be sen lé'njù là Tshùaben tshob Mosé ndù:

⁴⁹ Ko' num yen mbat Abarim, num mbat Nébo z'a ngô Moab, mbwe Yériko là; yen ngô Kanaan ze me fà bon Israél mba ntsi' là.

⁵⁰ O nsi kwù num mbat z'o ko' num bwe là mba mfèl o Aron na' nkwù num mbat Hor là.

⁵¹ Nummbe ntu tsin bàa fa lo ghù nukebwô num àm mbwe bon Israél, mbaṅ ntse Mériba Kadèsh, num kônkwa Sin, ke ghamte lén sàm se nelàn mbwe bon Israél.

⁵² O nsi yen ngô mbwe o; là, o ke nsi tsho ntùm ngô ze me fà bon Israél là.