Nebwôgte 31 - NTSHOB NSI

Yoshua jù ndà Mosé

¹ Mosé bèn ntshob ba Israél ndù:

² Tshù, sènni me ghù ngu'njù bon bàa nkù (120); me ke' bèn nku'ni neke ntsho ntume, mbèn mbe Tshùaben tshob me ndù me ke dut ntse Yordan.

³ A b'a Tshùaben Nsi o a' bèn nkwé mbwe num yu tu; tu wul i bèn biagte tshen ngô là fà tsha' tshob wù me Israél. Yoshua nsi tshagte zin mba tu wut Tshùaben tshob là.

⁴ Tshùaben nsi ghù num tshen ben nà be kua' mb'a na' ngù num Sion bo Og fenfen Moab, mbiagte yub mba ngô yub ndo' ngù ju banban yi là.

⁵ Tshùaben nsi swèn yub mum mbu mu, o ghù num bo kua' mba me na' ntshob wù là.

⁶ Fènntù, ndo' neta. Kà bwôg yube, ke vètte, nummb'a b'a Tshùaben Nsi o bèn nkwé mbwe, nke nzin mbwe o, mbe ndù bin yi nsi bèn ke be. A ke nsi ghua' o sàm ngelaṅ.

⁷ Mosé tsiaṅ Yoshua ntshob yi mbwe ba Israél fa ndù: Be tshùb nkwù bwe, mbèn ngù tànntù. A b'a wù bèn tsho bin ba Israél ntùm ngô ze Tshùaben na' nsaṅlaṅ num bwe tà tsho ndù a' fà bo là. A wù nsi bèn ghabte ngô bo.

⁸ Tu wut Tshùaben nsi ke zin mbwe o, bin yi ke mbe. A ke nsi ghua' o, ke kag bu o. Kà bwôg ke bèn mvètte.

⁹ Mosé kite yen ntshù' li, mfà ghale'te, tse nshum Lévi, tse bo ke nket Koṅ Kàn Tshùaben nà, mba ghakwé mbwe fa netèt ba Israél.

¹⁰ Mosé tshob ndù: A nsi ke be njoṅ ngu'njù sammbàa fa, num ngu' nekag ba kuan, o siaṅ yen ntshù' li,

¹¹ ndùse ba Israél se' mbwe Tshùaben Nsi o num jùa ntàb là. Yen nà nsi ke tôg a dù' tu wut Tshùaben tsho' là.

¹² Tsiaṅ ngô fa, bandum, bènnzwi, bon, ngùn z'a be ntùm ntusô mu là, ndù mba we lo ju'u, ntshùa bwe nzi'te neke mbwôg Tshùaben Nsi o, nke mbèn nke nze ntshob yen ntshù' li.

¹³ A nsi tshùa ndùlala bon tsho tse bo ke' to' ju' ntshù' Tshùaben Nsi o là ju'u, nzi'te neke mbwôg Tshùaben njoṅ ndù fa bo nsi tswe ntùm ngô z'o dut Yordan tsho bwe lo' là.

¹⁴ Tshùaben tshob Mosé ndù: Tshù, ngelaṅ z'o kwù là ghebte. Tsiaṅ Yoshua bin yi se' ntsin ntùm ntàb mbumte, me tshob ju me tshob là yi. Mosé bo Yoshua nèn ntsin ntùm ntàb mbumte.

¹⁵ Tshùaben ṅwag ntùm ntàb, num mo' mbwoṅ ndot; mbwoṅ ndot là tsin ntshu ntàb.

¹⁶ Tshùaben tshob Mosé ndù: Yen mb'o nsi nô netèt tà tsho. Nzwit mèn ni a' lo nsi, nkat boa tse nsi ba tum ntùm ngô z'a nsi tsho bwe là. A nsi ghua' àm, bagte kàn sàm se bag yi wat là.

¹⁷ Yantù àm nsi kam num i sen lé'njù là. Me nsi ghua' yube, lem yub se àm. Bo nsi biagt'é, nge' yàm boa ngùtni nsi ma'ni i, a tshob yen ngelaṅ nà ndù: Tshen nge' li ke tsho àm mba Nsi àm ke' bèn nebe netèl àm ké?

¹⁸ Num sen lé'njù là, me nsi lem i se àm num nukebwô z'a ghù, ntam njam tsemo' nsi là.

¹⁹ Ndonni bin kite sen kwi li, ntswite bon Israél yi, bin yab sen kwi là ntshu bo; sen kwi là nsi be yàm kwénta num bon Israél.

²⁰ Nummbe me nsi nèn yen nzwit mèn ni ntùm ngô me na' ntshob nsaṅlaṅ num bwe tà tse nefà yi là. Mbùn bo ṅwa' be nké nswe' ntùm yen ngô là, a nsi jù, ywèle, tshobte; yen ngelaṅ nà, a nsi tam njam tsemo' nsi, ke fa' bo, wag àm bèn bagte kàn sàm;

²¹ ndùse nge' boa ngùtni yàm nsi tsho i là, mba sen kwi li nsi be kwénta num yen nzwit mèn ni, nummb'a ke nsi lagte sen kwi li s'a nsi ke be ntshu nzwil i là. M'a lèn mba ntù i be là, ndèn mba ju z'a be ntù i là fe ndonni, kà njôg ndo' i ntsho yi ntùm ngô me na' ntshob nsaṅlaṅ num bwe nefà yi là.

²² Mosé kite kwi là sen lé'njù là, ntswite bon Israél yi.

²³ Tshùaben tshob ntshob mi Yoshua nshum Nun, ntshob ndù: Lo' neta, ngù tànntù, nummb'a wù bèn lo' bon Israél tsho yi ntùm ngô ze me na' ntshob nsaṅlaṅ num bwe nefà bo là, kua' tu wul àm nsi ke be bag wù.

²⁴ Ndùse Mosé miagte nekite ntshob yen ntshù' là ntùm bu' ṅwa'ni là,

²⁵ a tshob ben Lévi tse bo ke nket Koṅ Kàn Tshùaben nà ndù:

²⁶ Bin lo' sen bu' ṅwa'ni ntshù' li, njab mbaṅ Koṅ Kàn Tshùaben Nsi zin, a ke mbe bwe, nke mbe kwénta num o me Israél.

²⁷ Nummbe me lèn yu tatu, ndèn mb'o be ntùn tu yi là. A be ze bin be nta tu Tshùaben ndonni me ke' ntùn netèt bin nà, mba me lèn mbe bin nsi ta tu tshùate ndùse me nsi kwù là.

²⁸ Bin kùmte njoṅ ghakwé mbwe fa boa tàmànjô fa tse bo be ntùm tsin nzwit là mbwe àm, me tshob men ntshob li a mbwe bo. Me lo' kamànyam bo tsha' mba nkwénta là num bo.

²⁹ Me lèn kua' ndù bin nsi sagte wut tsin ndùse me nsi kwù là, mba ndù bin a' kag nze ze me kite bin nà, nge' nsi kab mbu num bin ndùse bin ghù kebwô num miag Tshùaben, kà lo' mfa' mbu min du'te yantù i yi là.

Kwi Mosé

³⁰ Ndùlala Mosé siaṅ njoṅ ntshob kwi là fa mbwe mbumte bon Israél.