Nebwôgte 3 - NTSHOB NSI

Bo lo' ngô Og

¹ Bag kaṅ, ntshùb nze z'a tshwèt nko' nèn Basan nà. Og mfen Basan tum bo ze ngô nse' num bag, nkam yag ntsho Edrei.

² Tshùaben tshob me ndù: Kà bwôg sàm ju, nummbe m'a' swèn i mum mbu mu boa ben tse mba ze ngô fa; o nsi ghù yi mb'o na' ngù Sion mfen ba Amor, z'a na' nke ntswe Hesbon nà.

³ Tshùaben Nsi yag bèn nswèn mba Og mfen Basan mum mbu mage, mba ze ngô fa; bag ton yub ntsho, ke bam sàm ze mèn mba ntshù' tum ntshu vùkob.

⁴ Bag lo' njoṅ ntusô mi fa, sàm se tusô ke tum ntshu bag. Ntusô fa be ṅam ntôge, njoṅ ze bag ngô Argob fa, ze nufen Og mfen Basan.

⁵ Bo lo kut men ntusô là fa ntsham ntsiage, kàbngô tse nèn tù neshu, nzendà tse boa mbwoṅ; ntusô yàm lo bèn mbe, mi a ke' ghù kàbngô tse là.

⁶ Bag tam ntshù' ntùm njoṅ i fa mba bag na' ngù num Sion mfen Hesbon nà; bag tam ntshù' ntùm ntusô fa, num bandum, bènnzwi boa bontsit bônke' fa.

⁷ Nda' ndù bag lag ntsha', ndo' nyàm ngù tshag yi, ndag ntsha' ts'a ntùm ntusô là.

Bo ghabte Galad

⁸ Tshù mba bag na' ngù yen ngelaṅ nà, ndo' tsha' fenfen bàa, mfen Amor ngô z'a mo' yoṅ Yordan, neto' fub Arnon tà nèn nkum num mbat Hermon nà.

⁹ Ba Sidon na' nke ntsiaṅ Hermon à ndù Sirion; ba Amor nke ntsiaṅ i yub Senir.

¹⁰ Njoṅ tusô fa tômbo'o, njoṅ ngô Galad bo njoṅ ngô Basan fa tà nèn nkum Salka bo Edrei, ntusô fa mi a be mi Og Basan nà.

¹¹ Og na' mb'a nda' mèn z'a tù' num nzwit Refaim nà. Kunndà se se tùne, num nke'e, mb'a se kun tùne Rabba là. Rabba b'a tusô bon Ammon. A sag num mbu bwe'e kam, bam se mbu bàa, mbe njoṅ bu mènntùn.

¹² Bag lo' yen ngô là, a tù' yage. Me fà tsha' ben Rubèn boa ben Gad neto' Aroer num fub Arnon bo mo' kam mbat Galad boa ntusô mi.

¹³ Me fà tshé' kam tsha' Galad bo ze nufen Og mfen Basan mo' kam nzwit Manasé. Njoṅ tse tsha' Argob bo Basan fa, a bwe là ze bo num ntsiaṅ ngô Refaim nà.

¹⁴ Yair nshum Manasé lo' tsha' Argob nèn nkum ndùnsi ben Gueshur boa ben Maaka, mbèn mfà lén se ntaṅla' Basan. Mba kua' sènni bo ke nke' ntsiaṅ tshen dù' l'a ndù ntaṅla' Yair.

¹⁵ Me fà Galad Makir.

¹⁶ Me fà mo' bag Galad tà nèn nkum Arnon tse ben Rubèn boa tse Gad. Netèt yen dù' là bèn mbe ndùnsi tà nèn nkum fub Jabbok, ndùnsi bon Ammon;

¹⁷ me fà mba tômbo' bo, tômbo' se ndùnsi i b'a Yordan, nelo Kinnéret tà nèn nkum dibantse mi a tômbo' là, dibantse ngwa, mbaṅ tun Pisga nze ntumnyam.

¹⁸ Num yen ngelaṅ nà, me lo tshob bin ndù: Tshùaben Nsi zin swèn yen ngô li bin ndù a tù' zine. Njoṅ zin ba soyé fa, a bwô bin tshùb tshu ntsho nzin mbwe bon Israél.

¹⁹ Zwi tsine, bontsit bon tsin boa nyàm tsin nsi bèn tù' ntùm ntusô mi me na' mfà bin nà,

²⁰ tà nkum ndùse Tshùaben fà fite fèt tsin mba zin tu wut, bo ghù yub ngô ze Tshùaben zin fà bo mo' yoṅ Yordan nà. Yen ngelaṅ nà mba we lo netèt bin nsi bèn ntùm mi ntsi' mi me na' mfà bin nà.

²¹ Me lo tshob Yoshua yen ngelaṅ nà ndù: Miag mu yen njoṅ i fa ze Tshùaben Nsi zin ghù tshen fenfen bàa là là. Tshùaben nsi ghù num njoṅ nufen fa ts'o nsi nèn num bo là be ndaṅndaṅ.

²² Kà bwôg yube, nummbe tu wut Tshùaben Nsi zin nsi ma' ntsho num zin tu.

Mosé le'te Nsi

²³ Num yen ngelaṅ nà me lon kondèn Tshùaben ntshob ndù:

²⁴ Tshùaben Nsi, o lo to' nela'te mb'o zi là bo bu o ze neta ngafa' o; nummbe sàm nsi ke bwe kamànyam ke num nsitsha' lo z'a ku'ni nefi't'o num mfa' mo mi ndùbndùb là.

²⁵ Faṅ me tshùa, me le't'o, faṅ me yen yen mbwô ngô là mo' yoṅ Yordan, tshen mbat là bo Liban.

²⁶ Là Tshùaben z'a ya ntù num tu bin nà ke ju' nz'àm. A tshob me ndù: A ku' ndùlala, kà bèn ntshob nu me num yen nu là.

²⁷ Ko' num mbat Pisga, nèn ntshùa bwe, ma' miag mu mbinyam, tu, ntèn mba ntumnyam, ndo' miag mu njen dù' yi, nummb'o ke nsi dut Yordan.

²⁸ Tshob nu Yoshua, fà fènntù yi, so tànntù ntù i, nummb'a b'a yi bèn zin mbwe ngô lo' ngô tsho yi ntùm ngô z'o nsi yen nà.

²⁹ Bag tswe tômbo'o, mbwe Bét-Béor.