Nebwôgte 29 - NTSHOB NSI

Nebèn ngwat kàn

¹ Mosé tsiaṅ ba Israél fa, ntshob bo ndù: Bin lo yen njoṅ i fa ze Tshùaben na' ngù num miag min nà. A na' ngù a ntùm ngô Egipto, num Faraon, kamkam tse fa mba njoṅ ngô i fa.

² O lo yen tshen nsa ndùb là, tshen nu netshàm nà ts'a tshùa njam laṅte ndùbndùb ngù là.

³ Là, tà nse' nkum ndonni, Tshùaben ke' fà ntù bin neju' yi, ntshùbe, ke fà miag bin neyen yi, ke fà ntoṅ bin neju' yi.

⁴ Me lo tshagt'o num kônkwa num ngu'njù ṅam nkuà, là nzwe tsho lo ke fagte num o, nketo' mu ke bèn mfagte nku mu;

⁵ bin lo ke jù bàn, ke nu ndu', ke neta ndu' lo ndù a tshùa bwe bin lèn mbe me b'a Tshùaben Nsi zin.

⁶ Bin lo zin nkum yen dù' li, Sion mfen Hesbon bo Og mfen Basan lo tum nse' mbwe be, num nema' be ntsho, nda' ndù be tshùa yub ntsho.

⁷ Be lo lo' ngô yube, mfà yen ngô là ben Rubèn, ben Gad, bo mo' kam ben Manasé, a tù' tshob tsha'a.

⁸ Bin nsi ke ze ntshob sen kàn ni, ke tshùbe, a tshùa ndùlala mba ke lo bin to'te là ke ngwù be lag.

⁹ Sènni bin b'a mbwe Tshùaben Nsi zin dù' bin tsin nà, bin a fenfen tunndà, ghakwé mbwe tsine, kamkam tsine, mba njoṅ ben tsin fafa;

¹⁰ bon tsine, zwi tsin mba ngùn z'a be netèt yu mbàn nà, neto' num z'a be nkeb ntshwèn nà tà nkum num z'a be ntu' ntse mu là.

¹¹ Sènni o tsho ntùm kàn Tshùaben Nsi o, kàn se bin yi wat sen lé'njù li là. A wat sen kàn nà mbam nu bwe.

¹² A nsi tshùa ndùlala nte o sènni o be ze nzwit mèn, tu wul i bèn mbe yu Nsi mb'a na' ntshob wù, mbe ndù a lo yà saṅlaṅ bwe tà tsho, Abraham, Isak mba Yakob là.

¹³ Me ke' wat sen kàn ni me bam nu bwe l'a bag nda' bin tù' bin, Tshùaben bèn ntshob ndùlala.

¹⁴ Là me wal a bag Nsi be sènni là, mba ben tse bo ke' be netèt be sen lé'njù li là.

¹⁵ Bin lèn mba be na' ntswe yi Egipto là, ndèn mba be na' ntôg yi netèt ngôngô tse be na' ntshùa bwe là.

¹⁶ Bin lo yen tshùaya'nu tshobe, neto tshob, neto ntshwèn boa tse ndoṅ, tse silba boa tse gol, ts'a be netèt tshen ngô là là.

¹⁷ A ke' bwô ndù mandum, mènnzwi, tunndà ke ta' nzwit lo tum netèt bin ket ntù i num Tshùaben Nsi be sènni, nèn nke mfa' tse nsi tshen ngô là. A ke' bwô ndù mo' tù kebwô taṅ nga netèt bin, njam ntàm tsheb bo ju nezwe.

¹⁸ A ne mbe ze mèn ju' men ntshob ndon ni, nzwi tse ntù i, ntshob ndù: Me bwô tshàm, nummbe me ghô tshàm num manze ze ntù àm num nge'te là, nummbe a b'a nenùn ndù: Ntù mèn kù a nu ntse mba ntù i a' fite.

¹⁹ Tshùaben ke nsi lagte tse lèn yen mèn nà. Là yantù bo lànghe' Tshùaben nsi kam num yen mèn nà, njoṅ ndon fa bo kite ntùm yen ṅwa'ni li là tsho tu i, Tshùaben be bèn mbwete lén se tun bam kamànyam.

²⁰ Tshùaben a' sô i nte njam num nge' i, sô i ntùm tunndà Israél fa, kua' mb'a be ntùm ndon fa ts'a ntùm kàn bo kite ntùm ṅwa'ni yen ntshù' li là.

²¹ Bon tsin tse bo nsi bwe yub là boa ghùn tse bo fe ngô ts'a ngùanesà là nsi yen nge' boa ngùtni tse Tshùaben se' yi mum ngô zin nà.

²² Ba nà yàm nsi jum ka tsha'a, njôg bo ngwa kab bwe; bo ke nsi bèn bwe sàm ju bwe, sàm ju be ke bèn mbit yen dù' là. Yu ngô nsi fut'a ntusô Sodom bo Gomora, Adma bo Tseboim, tse Tshùaben na' nsate yub ndùse tonte yantù i kamte là.

²³ A nsi tshùa ndùlala ngô njù fa ke mbètte ndù: Numke Tshùaben ngù num ngô li ndù à? Yen tonte yantù li, yen mà yantù li b'a numke?

²⁴ Bo nsi bùnte ndù: A b'a nummbe bo ghua' kàn se boa Tshùaben Nsi tà tshob wat, ndùse a sô yub ngô Egipto là;

²⁵ a b'a nummbe bo nèn mfa' tsemo' nsi, nte nkekwi' mbwe bo, nsi tse bo na' mbe ke lèn, Tshùaben ke bam bo ndù bo ke mfa' bo là.

²⁶ Ndùlala, yantù Tshùaben kam num yen ngô li, a ghù ndon fa tse bo kite ntùm yen ṅwa'ni li là se' num i.

²⁷ Tshùaben lo sô yub ntùm ngô yub ntùm yantù, ntùm tshùagntù, ntùm nenywin ze ndùb, kà ma' yub ntùm mo' ngô, mba be tshwèt njen sènni là.

²⁸ Tshu ts'a lemte là b'a tse Tshùaben Nsi be; tshu ts'a la'te wul i là b'a tse be mba tse bon matmat, ndùlala ndù be ke nze njoṅ ntshob yen ntshù' li fa.