Nebwôgte 28 - NTSHOB NSIMbotni ze Nsi naṅ num ben tse là ( Lev. 26.3-13 ; Neb. 7.12-24 ) 1 A be z'o ju' nze Tshùaben Nsi o kua' mebwô, nke nze ntag mi fa mi me kite wù sènni là, mba yi Tshùaben Nsi o nsi ghù o zi ntshùa njoṅ ngô fa ts'a be num nsitsha' là. 2 A be z'o ju' ntshu Tshùaben Nsi o là, mba tshù njoṅ mbotni mi a nsi be wù, se' tà kum num o li: 3 Tshùaben nsi naṅ mbotni ntùm ntusô mo, naṅ mbotni num tsho nà fa. 4 Tshùaben nsi tam ntse wù bin à bon tsho, naṅ mbotni num tshu ts'o tsho' fèn nà, num nyàm tsho tse ndùb boa tse nke'e. 5 Tshùaben nsi naṅ mbotni num ngefel o mba num jujù z'o nsi lo' nabte yi là. 6 Tshùaben a' ghù ntam ntse wù ndùs'o kum nà mba ndùs'o tshwèt nèn nà. 7 Tshùaben a' ke ngù o tshùa ghakeban tsho tse bo bù' tu nsi num o là; bo nsi se' num o num ta' manze, be fe kù tshùa à num manze sammbàa, kà lo num miag mo. 8 Tshùaben nsi ghù bin mbotni ke mbe ku ntshù' ntùm nkandà mu, mba ntùm mit mfa' lo mi o to'te là. A nsi tam ntse wù ntùm ngô ze yi Tshùaben Nsi o fà wù là. 9 O nsi ke mb'a nzwit mèn nelàn Tshùaben mb'a na' mbam wù num bwe là, a be z'o ze ntag Tshùaben Nsi o, nke nzin num tse manze là. 10 Njoṅ ngôngô fa nsi yen ndù bo ke ndo' à lén Tshùaben ntsiaṅ o yi, ndùlala nke mbwôg o. 11 Tshùaben nsi fà bon wù yàme, fà nyàm wù yàme, fà jujù wù yàm ntùm ngô z'a mbam wù num bwe tà tsho ndù a' fà wù là. 12 A nsi tsho' nta i ze fen dun bwe kamànyam nà, là, tum mbaṅ wù num ngelaṅ i. A nsi tshùa ndùlala o fà tshu ngô yàme, ke bwoṅ sàm ju z'a b'o lon sàm ngô là. 13 Tshùaben nsi lo' o ghù a nkwémbwe yi ke b'a ntshèt njam; o nsi ke b'a be tù, ke b'a mànsi, a be z'o ze ntag Tshùaben Nsi o mi me nkite wù sènni, ntshùb njoṅ i fa, 14 ke sô ku o bwe, nèn bu zwim ke bu kwéb lo, num ntag fa mi me fà wù sènni, nèn njam tsemo' nsi nke mfa' bo là. Ntshob ndon; ju ze tatu num mfà là ( Lev. 26.14-46 ) 15 Là, a be z'o ke' ju' nze Tshùaben Nsi o kua' mebwô, ke bèn nke nze ntag mi fa boa ntshù' mi fa mi me kite wù sènni là, mba tshù ndon fa ts'a nsi tsho num o li: 16 Tshùaben nsi so ndon tu o ntùm ntusô mu, so ndon num tsho nà fa. 17 Tshùaben nsi so ndon num ngefel o mba num jujù z'o nsi lo' nabte yi là. 18 A nsi so ndon tu bon tsho, so ndon num tshu ts'o tsho' fèn nà mba num nyàm tsho tse ndùb boa tse nke'e. 19 Tshùaben a' ke nso ndon tu o ndùs'o kum nà mba ndùs'o tshwèt nèn nà. 20 Tshùaben nsi tum ndon wù boa va', dum ntshu o ntùm njoṅ mfa' mo fa mi o be mfa' là, bèn sat'o kà biagt'o kua' ndende num mfa' mo mi kebwô, mi a tènt'o kà ngù o ghua' i là. 21 A nsi tum keya' num o tà nkum ndùs'a biagt'o sàm yu mèn ke bèn ntù' ntùm ngô z'o tshwèt nèn tsho bwe là. 22 Tshùaben nsi lo' bot tsho o yi bo saṅte wut, wut nekù bo jumte, kwitshu' boa netswe, tshen nge' là yab njam o kà mbiagt'o fa. 23 Kamànyam nsi be mfe num tu o à mba tùn meba là, fùn neta tsha' be tun nku mu a mba tùn nà. 24 Mbaṅ ze Tshùaben nsi tsin mfe kamànyam tum mum yu ngô là b'a mbabe, mba njôg; tshen tshu là nsi swe' tsho num o kà kum ndùse bo biagt'o fa là. 25 Tshùaben nsi ghù ghakeban tsho tshùa o ntsho; o nsi tum num bo à num ta' manze be fe kù tshùa à num manze sammbàa kà lo num miag mube; o nsi tù' tunu mbwôg njoṅ nufen fa ts'a nsitsha' là. 26 Fe o a' tù' jujù nsaṅ boa nyàm tse bo nsitsha' là; sàm mèn ke nsi tum kam yub num bwe. 27 Tshùaben nsi lo' keko' Egipto tsho o yi, tshobome, mbàne mba mbàn nzine. O ke nsi ku'ni netshwinte kà njate. 28 Tshùaben a' ghù zenu o bi, fù ghom o, zwiaṅte kab mbu num o. 29 O nsi momte dù' mbwôgtshù mba njam nà; mfa' mu ke nsi ke zin tse mebwô. Nefétt'o mba nelag tshu tsho ke nsi tsine, sàm mèn ke ne ntum num neywimt'o. 30 O nsi ka ménngon mo' mèn zi bo yi; o nsi kut ba' be ke tswe ntùm bwe; o nsi bwe nkùa be ke nu ndu' mi. 31 Bo nsi wat nyàmna' o num miag mu, o be ke fèt lèn mbàb i; bo nsi lo' kekwèn o num miag mu, be ke bèn mba' i wù njam, bo nsi fà mbwe tsho ghakeban tsho, sàm mèn be ke tum neywimt'o. 32 Bo nsi swèn tsho nshum boa tsho ngon mo' nzwit ghua. Miag mu a' tàn nze neke ndôte ndù bo bèn njam, nda' ndù ke ku'ni neywimte yub sàm nu. 33 Tshu tse tsha' ts'o fa' fà là nsi kém nzwit mèn z'o ke' lèn i là, a bèn nke ngùtni o, nke mbiagt'o; 34 tu o nsi tshu' num tshu tse miag mu nsi yen nà. 35 Tshùaben nsi ghù mo' keko' kebwô te num ntammbwe mu mba njam ntsi' mu, be keko' ke yate. Sen keko' là nsi lo bam ku o nèn kà kum tèt tu o. 36 Tshùaben nsi lo' o bin mfen o nèn yi ntùm ngô z'o ke' lèn nà, wù ke tà tsho lo lo ke to' tswe ntùm yen ngô là. O nsi tsho bwe ke fa' nsi tse bo lo' ntshwèn bo loṅ nabte yi là. 37 O nsi tù' tunu fétwut, nu tshô bo nu komzwi netèt ngô tse Tshùaben nsi lo' o nèn yi bwe là. 38 O nsi ywit njwit tshu yàm ntùm nà o, là tsho' tshu a kag neshu, nummbe ngamntàn a' bagte nzwit tshu o ywit là. 39 O nsi bwe nkùa, nabte, be ke nu ndu' mi, nummb'o ke' diaṅ nkùa mba tàn nkùa jù nkùa fa là. 40 Nten nsi be ntùm yu ngô fa, là o ke bé'te mfèt mi, nummbe nten mu nsi vùte nsi fa. 41 O nsi bwe nshumnshum boa ngonngon, là o nsi bi yub fa, nummbe bo a' ghom yub nèn yi ndà kuan. 42 Bon tshu netshôgte nsi fèt ntù mu fa, fèt tshu ts'a bit num tsho tsha' là. 43 Ngùn z'a be netèl o là nsi zin tshùa o, tu wul o ke nkôg yu a be nekôg nèn nsi. 44 A nsi ke tshwé' ju wù, tu wul o be ke tshwé' yu yi. A nsi bèn be ntshùambwe, o be yu à ntshètnjam. 45 Njoṅ tshen ndon nà fa nsi yab njam o, be yu ju tà nkum ndùs'a biagt'o là, nummb'o ke' ju' nze Tshùaben Nsi o, ke bèn nze ntag mi boa ntshù' mi mi a kite wù là. 46 Yen nà nsi be keki tsho'te ntsha Nsi num o mba num yu nzwit matmat. 47 Mb'o na' mbe ke fa' Tshùaben Nsi o ntùm mfu' mi o be netèt bwe, ntùm tsiaṅte bo ntù mebwô là, 48 o nsi fa' ghakeban tsho tse me nsi tum yub num o là, fa' bo à ntùm nziku', ntùm nzi ntse, fa' bo tunntôg bo kekua. A nsi ma' kele' tùn tô o, tà nkum ndùs'a biagt'o là. 49 Tshùaben nsi kamte mo' ta' ngô tà num tôg tsha' tshag num o, ngô là nsi fe ngùanesà vù num o mba bebabsa' là. O ke nsi ju' ntshob yen ngô là. 50 Ntshù tshen ben nà kuni neshu, bo ke ke nko ndèn njwèn mèn, ke tshàm ndèn mén. 51 Yen ngô là nsi fèt nyàm tsho, jù tshu tse tsha' tsho fà là, tà nkum ndùs'a biagt'o là; a ke nsi faṅ sàm ju wù, ke ngefele, ndu', mfèt, nyàm tsho tse ndùb ke tse nke' lo, tà nkum ndùs'a biagt'o fa là. 52 A nsi kab mbu num o ntùm ntusô fa, tà tsho kàbngô vùte nsi, tshen nsànsà kàbngô neta là ts'o be njab ntù o a bwe ntùm yu ngô fa là. A nsi kàb mbu num o ntùm mu ntusô fa, ntùm yu ngô fa ze Tshùaben Nsi fà wù là. 53 Netèt nge' bo ngùtni ze ngakeban nsi te o bwe là, o nsi fèt ju z'a tum zwe' o là, mbàb nshumnshum tsho bo mbàb ngonngon tsho tse Tshùaben Nsi o na' mfà wù là. 54 Mén ng'é netèt bin, ze bo kwiagt'é a ntùm nku'ni là nsi yen mfèl i lag kebwô, yen nzwi i z'a be nzi ndà ntù i là lag kebwô mba tshé' ju z'a tù' yi num bon tse là. 55 Nummb'a ke nsi bam neghabte mbàb bon tse bo sàm mèn netèt bo. Tu wul i nsi bèn fèt tù' i, nummbe sàm ju ke nsi bèn tù' yi netèt ngùtni bo nge' ze ngakeban a' te o bwe ntùm ntusô mu là. 56 Tonte mènnzwi netèt bin, z'a be nkét wul i, ke be te ku i num tsha' mfa' sàm ju là, nsi lôte ndu i lag kebwô, ndu i z'a ke nzi ndà ntù i là, nshum i bo ngon i; 57 a' lamte ju z'a nsi tum bam i là, mén z'a nsi bwe là. Ntùm bwoṅ z'a nsi be ntùm bwe là, yen mènnzwi là nsi fèt mén z'a bwe là njam tsham netèt ngùtni bo nge' dù' ze ngakeban a' te i bwe ntùm ntusô mu là. 58 Tshùbe, nke nze njoṅ ntshob yen ntshù' li mi bo kite ntùm yen ṅwa'ni li là, ndo' nke ngamte kuni lén, lén nekuni Tshùaben Nsi o yi. 59 A be z'o ke' ghù ndùlala là, mba Tshùaben lo' nkeko' banban, mi kebwô, ngokèt kebwô boa tse netshùag lab o yi mba yu nzwit. 60 Tshùaben nsi lo' ngokèt Egipto fa ts'o ke mbwôg là se' yi netèl o, tshen ngokèt là ṅab o. 61 Tshùaben bèn tum mba tsemo' nzenze ngokèt bo ke' tsi ndèn mub ntùm yen ṅwa'ni ntshù' li là num o, tà nkum ndùse bo biagt'o fa là. 62 Bin tse bin na' njàm mba nsa mi a kamànyam nà, bin nsi mi kà tù' a me bwoṅ benntùn, nummbe bin ke' ju' nze Tshùaben Nsi zin. 63 Mba Tshùaben ke ṅwate neghù bin yàm nà, be ndaṅndaṅ a' ṅwate nebiagte zin fa. Bo nsi sô zin ntùm ngô bin tshwèt ntsho bwe a tù' zin nà. 64 Tshùaben nsi lo' o nèn yi ntùm ngô fa, neto' mo' tôg tsha' nèn nkum num mo'o, o tsho bwe mfa' tsemo' nsi, tse bo nabte ntshwèn ke ndoṅ no là; tshen nsi là tse wù ke tà tsho lo ke' lèn yub là. 65 Fite ke ntswe mebwô lo ke nsi be wù ntùm tshen ngô là, ke dù' nete ku o bwe lo. Tshùaben nsi ghù ntù o ke ntame, miag mu ke nsènte, zwiag so fame. 66 Yôg so nsi ghel a tù mbwe o, bwôg ke mbe njam mba mbwôgtshù, nenywinte yôg mi tse wù. 67 Ntù o nsi vètte num tshu ts'o yen nà, o ke ntshob ndù: Tù' nda' nkebnjù a be mfetnjù, tù' nda' mfetnjù a be nkebnjù. 68 Tshùaben nsi lo' o ntùm nsitima nèn yi Egipto, o zin yen manze là me na' ntshob wù ndù o ke bèn neyen nà. Bin nsi swèn wut tsin bwe ghakeban tsine, be kuan tse bandum mba tse bènnzwi; sàm mèn ke nsi tum z'a ku'ni nejun zin nà. 69 Tshù ntshob Tshùaben tshob Mosé ndù a wat kàn yi boa bon Israél ntùm ngô Moab li. Sen kàn ni ke' b'a s'a wat boa bo Horéb là. |
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
Bible Society of Cameroon