Nebwôgte 23 - NTSHOB NSI

¹ Sàm mèn ke nsi lo' nzwi tàab, ke bù' nzwe mfùag tàab.

Ben ts'a bwô nesô yub ntùm mbumte là

² Mèn ze mba ntshàm mi tsile, ke ket se tsho' lo là ke nsi bèn be ntùm mbumte Tshùaben.

³ Mèn ze bo bwe i a bo nzwi tum nà ke nsi tsho ntùm mbumte Tshùaben. Mba zwiaṅ bon tse mbatte gham ke nsi tsho ntùm mbumte Tshùaben.

⁴ Mèn Ammon bo ze Moab ke nsi tsho ntùm mbumte Tshùaben, mba num mbatte zwiaṅ bon tse gham tà nèn nkum mba ndùke lo,

⁵ nummbe bo lo ke se' mbwe bin num manze boa bàn mba ntse ndùse bin tum Egipto là. Bo lo lo' nkàb njunte Balaam nshum Béor yi Petor mà Mesôpôtamia ndù a se' mbwe o nso ndon tu o.

⁶ Là, Tshùaben Nsi o lo ke kô neju' ju ze Balaam tshob là; Tshùaben Nsi o lo kaṅ ndon a tù' mbotni num o, nummb'a num nkô o.

⁷ A ke' bwô nenywin num yôg sobe, ke lab wut num yub ntswe mebwô mba metsili ndùs'o nsi ke' ntùn nà.

⁸ O ke nsi wag ze Edom nummb'a b'a mfèl o, ke wag ze Egipto, nummb'o lo be ngùn ntùm ngô i.

⁹ Nshumnshum tse bo nsi bwe yub num mbatte benntùn tat là nsi tsho ntùm mbumte Tshùaben.

Nelànte tusô

¹⁰ Ndùs'o ma' ghakeban tsho ntsho là, mb'o a' zete netsho ntùm fa' kebwô.

¹¹ A be ze ntse wut mo' mèn netèt bin tum num mo' ta' tèttswe' là, mb'a' tum mbàn ke bèn netsho bwe.

¹² A ghù nesôg wul i ntse ndù mfetnjù, ndùse nyam tshwèt mbi là, mbèn mbèn njam ntùm mbàn.

¹³ O nsi ghù dù' njam mbàn, ke ghua' bu o à bwe.

¹⁴ O nsi ghù meju ntshùag netèt tshu tsho, ke lo' tswe'te dù' yi kà nèn bén nu bwe sôg tsha'a, ndùs'o kô neghua' bu o là.

¹⁵ Nummbe Tshùaben Nsi o num nzin netèt yu mbàn num neke nkabt'o mba neke ma' ghakeban tsho mbwe o; ndùlal'a bwô yu mbàn ke mb'a be nelàne, ndù kà Tshùaben tèt sàm ju netèl o z'a be ze nesagte là, nkaṅ mvèn i ntam o yi.

Nkuan z'a kù tàab là

¹⁶ A ke' bwô ndù o fà nkuan z'a kù là tàfa' i, ndùs'a kù i nse' ndà o là.

¹⁷ A nsi tswe netèl o, la' o, num dù' ze tu wul i kô là, ntùm semo' tusô so, dù' ze ntù i bèn nkô là. A ke' bwô ndù o ma'ni i.

¹⁸ Kà sàm mandum ke mènnzwi lo netèt bon Israél swèn wul i, mo' nsi ntùm nekale,

¹⁹ mba nelo' nkàb, bin nekale, nse' mfà ndà Tshùaben Nsi, num mo' nu z'a bam yi neghù là. Tshùaben num mbàn tshen lèn nu là.

Nefà nkàb bo bin

²⁰ A be z'o fo nkàb mfèl o, ke netshwé' tshu jù yi lo là, mb'o ke nsi bètt'é bin i. Kà bin yi tsho ntùm sàm ju z'o bètt'é bin nà.

²¹ O ghù nekwé bin ngùn, là, o ke nsi kwé bin mfèl o. Ndùlala ndù Tshùaben Nsi o tam ntse wù num mba ke lo z'o to'te ntùm ngô z'o nsi tsho bwe là, a tù' yu là.

²² O ngù nka'ni Tshùaben Nsi o, o nànte nzwiagte; nummbe mba Tshùaben Nsi o a' bètt'o nu num bwe, o ket nukebwô num nu tse.

Nebam ju mbwe Tshùaben

²³ A be z'o ghom wul o neghù ta' nka'ni là mb'o ke nsi ghù tsho nukebwô.

²⁴ Là, o nsi zwiagte nu z'a tum num nkub ntshu mu là, mebwô mebwô nka'ni z'o ghù a kua' yu nekô, ntshu o bèn ntshob nu bwe là.

²⁵ A be z'o tsho ntùm nà ntù ntàm ndu' mfèl o là, mb'o ghù nejù ntàm tù ndu' mb'o kô là kà ywèle; nda' ndù o ke nsi ma' lèn i bàm o.

Jujù ntshùanze

²⁶ A be z'o tsho ntùm nà nsa mfèl o là, mb'o ghù nelo' mbu mu mfag nsa yi. Nda' ndù o ke nsi lo' ṅwi nsa keb nsa mfèl o yi.