Nebwôgte 22 - NTSHOB NSI

Nenabte ju nga mbaṅ ndà

¹ A be z'o yen nyàmna' ke njùmbwe mfèl o z'a bi là, mb'a ke' bwô ndù o kaṅ mvèn o; a bwô ndù o ghom i nse' mfà mfèl o.

² A be ze mfèl ke' be tswe a mbaṅ o, o ke bèn ndèn i là, mb'a bwô ndù o yab nyàm ndà o, a tswe bwe tà nkum ndùse mfèl o, lo' nyàm i là, k'o njôg mfà i yi.

³ O nsi ghù a be ndaṅndaṅ num kekwèn, ghù a be ndaṅndaṅ num nzwe i, ghù a be ndaṅndaṅ num mba zit ju lo z'a bi yi, o fon nà. A ke' bwô ndù o kaṅ mvèn o.

⁴ A be z'o yen kekwèn ke nyàmna' i lo vù num manze, mb'a ke' bwô ndù o kaṅ mvèn o, ywimt'é bin yi bù' i nsi.

Nu neket nzwe

⁵ Mènnzwi ke nsi ket nzwe mandum, mandum ke ket nzwe mènnzwi, nummbe mba we lo z'a ghù tshen tshu là là ghù tshùaya'nu num miag Tshùaben Nsi o.

Nsaṅe boa nkàn tshobe

⁶ A be z'o be zinte num manze njen nkàn saṅ num tù ke num tsha' lo boa bon ke mbum no, ndù mà saṅ nô num bon ke mbum no là, mb'o ke nsi lo' mà saṅ boa bon;

⁷ o nsi faṅ mà saṅ a nène, o lo' nda' bon. A nsi tshùa ndùlala o tswe mebwô, lé'njù tsho bèn ntènte.

Nu ba' nekule, nekut ba' nswe

⁸ A be z'o kut ba' nswe là, mb'o a' kut mekam kàb num setghàm, mbwôg ndù kà lem tshùm num ba' o, ndùse mèn tum bwe ntam nsi là.

Netamte tshu num nà

⁹ Kà bwe nzwit ntù nzenze ntùm yu nà ntù ntàm ndu', mbwôg ndù k'o be ke fin bu o num ju z'o ywit là ke ju ze ntù ntàm ndu' yàm nà lo.

¹⁰ Kà taṅ nyàmna' bo kekwèn num ju nedù' nà yi ndo' nke mfa' yi yoṅ ntshù'.

¹¹ O ke ket nzwe ze bo lo' ndeb nzenze, ndeb nyiaṅ njùmbwe mba ndeb z'a fùag ze bo tamte dù' ntshù' mba' yi là.

¹² A bwô ndù o taṅte ntsha' num ntôg nzwe o nkuà, nzwe z'o be mbomte wul o yi là.

Nebagte lén mènnzwi nandà

¹³ Be tshob mbe ta' mèn so mènnzwi, ndo' i, ntum mànjam ke bèn nekô i,

¹⁴ a be z'a tshob ba kebwô num i, mbagte lén se ntshob ndù: Me lo so yen mènnzwi li, ndo' i, njen ndù bo ya tabt'é,

¹⁵ mb'a bwô yen ngelaṅ nà ndù tà mènnzwi bo màab lo' ba keki ts'a tshwèt nda'te ndù bo ke' tabte ngon yub là nèn yi mbwe ghakwé mbwe ntùm tusô, nèn yi num nsém.

¹⁶ Tà mènnzwi bo màab nsi tshob ghakwé mbwe ndù: Me lo fà ngon àm yen mandum ni ndù a be nzwi i, ndonni a ke' bèn nekô i;

¹⁷ a tshwèt nke ntshob kebwô num i, nke ntshob me ndù: Me tèt ndù bo yà tabte ngon o. Là tshù ba keki ts'a tshwèt nda'te mbe mèn ke' tabte ngon àm ni. Bo tshob ndùlala nké'te nzwe ngon yub mbwe ghakwé mbwe ntùm ngô.

¹⁸ Yen ngelaṅ nà ghakwé mbwe ntùm ngô nsi ghom yen mandum nà naṅ ntsha tu i;

¹⁹ nummb'a bagte lén ta' ngon Israél ze bo ke' ntabt'é là. Bo nsi tam ju tu i; ndô nkàb silba nkù, z'a nsi fà ntse i là. Mènnzwi là nsi tù' ze ndu i, a ke' ku'ni neta' i ndùs'a ke' ntùn nà.

Ju neghù num mènnzwi z'a sagte wul i là

²⁰ Là, a be ze bo tabte nzwi i là,

²¹ mba bo a' lo' mènnzwi ntum yi ndà tàab, ben tse bo be tusô là tamt'é ndoṅ a kwù, nummb'a fa' kua' kebwô ntùm ngô Israél, nkat ntùm ndà tàab. O nsi sô nukebwô netèl o ndùlala me Israél.

Ju neghù num ghaghù màndà

²² A be ze bo yen mandum bo mènnzwi z'a nandà nke nô là, mba bo a' zwi yub ntu tshob bàa fa, nzwi mandum ze bo mènnzwi nô là mba mènnzwi ze. O nsi sô nukebwô netèl o ndùlala me Israél.

²³ A be ze bo ka ménngon ze bo ke' yoṅ ntabt'é, ta' mandum bumte bo yi ntùm tusô, nô bo yi là,

²⁴ mba bin nsi lo' ntu tshob bàa fa nèn yi num nsém tusô, tamte yub ndoṅ bo kwù. Ménngon kwù z'a nummb'a ke' kua' ntùm tusô, mandum kwù ze nummb'a bagte nzwi mfèl i. O nsi sô nukebwô netèl o ndùlala me Israél.

²⁵ Là, a be ze mandum bumte bo mènnzwi bo ka i a tshwèt, kà ntshùb i nô bo yi là, mandum nà ze bo yi nô là bèn kwù tù' i.

²⁶ O ke nsi ghù sàm ju yen metshab ménngon nà; a ke' ghù kebwô ze bo ku'ni nezwi i num bwe là. Nummbe lèn yen dù' nu li tswe à mba mèn tsho' ngwù num mfèl i nzwi i là.

²⁷ Yen metshab ménngon ze bo ka i, mandum bumte bo yi tshwèt là kua' kà mèn ke tum num neywimt'é.

²⁸ A be ze mèn bumte bo metshab ménngon, ze bo ke' ka i, ke tabt'é, ntshùb i nô bo yi, tà bo ghom yub là,

²⁹ mba mandum ze bo yi nô là nsi fà ndô nkàb silba tà ngon ṅam ntàn; a nsi lo' ngon ghù nzwi i yi mb'a bagt'é là, ke bèn ku'ni neta' i ndùs'a nsi ke' ntùn nà.