Nebwôgte 20 - NTSHOB NSI

Ntsho num lén Nsi. Nekab mbu num ntusô

¹ Ndùs'o nsi tsho tshwèt ntsho num ghakeban tsho, yen ba nyàmdiaṅe, nkalig bo ta' nzwit mèn z'a yàm ntshùa o là, mb'o ke nsi bwôge, nummbe bin Tshùaben Nsi o z'a na' nsô o ntùm ngô Egipto là bèn mbe.

² Ndùse ntsho ghebte là, mba ngale'te nsi nèn mbwe, tshob ngô kà ntsho to'te ndù:

³ Israél, bin ju'u. Ndèn ndù bin nsi le' ghakeban tsin ntsho sènni. Kà ntù tsin mvètte; kà bin bwôg, kà ntù zin tam, kà tu zin tshu' mbwe bo.

⁴ Nummbe bin à Tshùaben Nsi zin bèn nke nzine, mbe ndù a bèn nke nde' ghakeban tsine, mbe ndù a' yôg zine.

⁵ Yen nà nsi be tôg ba tàndà ntsho tshob nu ngô, ntshob ndù: We z'a nsen ni ndù a kut ba' nswe ke yoṅ ntswe ntùm bwe à? Ng'é bèn njam ntùm ndà i, mbwôg ndù k'a kwù tshwèt ntsho mo' mèn tswe ntùm ba' i.

⁶ We z'a bwe ntù ntàm ndu' ke yoṅ mfin bu i bwe à? Ng'é bèn njam ntùm ndà i, mbwôg ndù k'a kwù tshwèt ntsho mo' mèn bèn njù bin.

⁷ We z'a kàà mènnzwi ke yoṅ ndo' i à? Ng'é bèn njam ntùm ndà i, mbwôg ndù k'a kwù tshwèt ntsho mo' mèn lo' nzwi i.

⁸ Tàndà ntsho nsi ke tshob ngô nèn mbwe ndù: We z'a tshwèt mbwôge, ndù fènntù bwoṅ yi à? Ng'é bèn njam ntùm ndà i, ndùlala ndù kà fèt tse bwoṅ fènntù mba yi là.

⁹ Ndùse tàndà ntsho nsi miagte netshob nu ngô là, bo nsi yab ghatô ntshu ntsho mbwe ngô.

¹⁰ Israél, ndùs'o ghebte num ta' tusô nke nto' i ntsho là, mb'a bwô ndù o bwôgmbwe mbù fite yi.

¹¹ A be ze sen tusô là bam fite, ntsho' tse nzendà nte wù nge là, mba benntùn tse bo ntùm bwe là nsi ke fà ntshub wù, bèn ke fa' wù.

¹² A be ze sen tusô là gha fite, nkô be nele' o ntsho là, mb'a bwô ndù o kab mbu num i ndo' i.

¹³ Ndùse Tshùaben swèn i mum mbu mu là, mb'a bwô ndù o watte njoṅ bon bandum fa.

¹⁴ Là, o nsi lo' bènnzwi bo tù' tsho, lo' bon, nyàm mba njoṅ tshu fa ts'a be tusô là, njoṅ ntsha' ntsho fa, jù ntsha' ghakeban tsho tse Tshùaben Nsi o fà yub ntùm mbu mu là.

¹⁵ Tshù mb'o nsi ghù mum ngô fa tse bo be ngùanesà mbaṅ o là, tshen ngô là tse bo ke' ghù tsha' ntshù' boa tshen ngô li là.

¹⁶ Là, o ke nsi faṅ sàm ju z'a tshwèt nzwiag là ntùn ntùm ntusô ngô tse Tshùaben Nsi o fà wù mba ntsi' là.

¹⁷ Nummb'o nsi tam ntshù' num tshen ngô là: Ba Hétia, ba Amor, ba Kanaan, ba Férésia, ba Hévia boa ba Yébusia. Ghù num bo kua' mba Tshùaben Nsi o na' ntshob wù là,

¹⁸ ndùlala ndù kà bo zi'te zin njoṅ tshùaya'nu fa tse bo num ngù nsi tshob là, mbwôg ndù kà bin ghù nukebwô num Tshùaben Nsi zin.

¹⁹ Ndùs'o ke nkagtùn nekab mbu num ta' tusô là, mb'a ke' bwô ndù o keb ntù mi a be njam ntàm nà, nummbe o nsi lo' a ntàm mi kém wul o yi. Jù ntàm tù, là kà keb ntù; bo ke' b'a benntùn, ndù bo tù' ghakeban tsho.

²⁰ Là, o ghù nekeb ntù mi bo ke' be jù ntàm mi là, ndo' nkut dù' yi num tusô s'a tshwèt nde' o ntsho tà nkum ndùs'o kab mbu num i là.