Nebwôgte 19 - NTSHOB NSI

Ntusô ndàlem. Netsho' ndùnsi. Ghakwénta tse tatte

¹ Ndùse Tshùaben Nsi o nsi biagte ngôngô ts'a fà tsha' tshob wù, k'o ta' yub ntswe ntùm ntusô mub boa mba' mub là,

² o nsi yab ntusô ntat njam netèt ngô ze Tshùaben Nsi o fà wù, a tù' yu là.

³ O nsi tswe' ba nze bwe, ghabte ngô ze Tshùaben Nsi fà wù là nkam ntat, ndù ngazwi mèn fon ndàlem ntùm men ntusô là.

⁴ Yen ntshù' li a' ke nkabte ngazwi mèn, a kù nèn ndem tu i ntùm ntusô ndàlem, ndùs'a be zwi mfèl i ke be ndù a ko' a ntù i, ke be ndù bo yi lo bwôgmbwe nke mbàn nà.

⁵ Be tshob mbe ta' mèn nèn keb ntshwèn bo mo' mèn, ntùm fèn, ntshùb njàm bu i, ngwù num ta' tù nke nkebe. Yen ngelaṅ nà njàm tsho' num mvèn i, ngom nshun mèn nà nzwi i. Yen ngelaṅ nà mb'a nsi kù nèn lem tu i ntùm semo' sen tusô là,

⁶ ntag ndùlala kà ngayagte mba'a lo' yantù njoṅ i num nezwi i, mb'a yen ndù manze sage nenèn nkum num tusô ndàlem nà, a ke' bwô neghù i ntsha nummbe bo yi lo ke nke mbàne.

⁷ A ndùlala me tshob wù ndù o nsi yab ntusô ntat njam.

⁸ A be ze Tshùaben Nsi o gha'te yu ndùnsi mb'a na' ntshob nsaṅlaṅ bwe tà tsho, kà mfà ngô fa z'a bù bo wù là,

⁹ mb'a bwô ndù o kwi'te ntusô ntat num men ni ntat li. Nda' ndù a bwô o bwôgmbwe nze njoṅ nkàn Tshùaben Nsi o mi me tshwèt nkite wù sènni là, nke nkô Tshùaben Nsi o, nke nzin be num tse manze njoṅ ndù fa.

¹⁰ A nsi tshùa ndùlala lem mbu' be ke fètte nsi ntùm ngô ze Tshùaben Nsi o fà wù a tù' yu là, lem be ke fètte num o me Israél.

¹¹ Là, a be ze ta' mèn kù nèn ntùm semo' sen tusô, mbe ndù a bùn mfèl i nkù, ngù kebàn num i, ndab i num mat z'a ghù nekwù là,

¹² mba ghakwé mbwe ntùm se tusô a' tum bo nèn ngom i, bo fà i mum mbu ngayagte mba' lem, ndù a zwi i.

¹³ A ke' bwô neghù sàm kondèn num i. A bwô nesô lem mbu' ntùm ngô Israél, kà ntshùa bwe ntswe mebwô.

Nebate ndù la'

¹⁴ Kà tsho' se saṅ ndùnsi mfèl o se tà tsho tse mbwe bèn njag nsi ntùm ntsi'i, ngô ze Tshùaben Nsi o fà wù a tù' yu là.

¹⁵ Ghakwénta ke' ku'ni num nu nezwi mèn ke mba mo' zit nukebwô lo. Nu a' ghù mbe be ndù ghakwénta bàa ke tat lo tum ntshob ju mfà bwe.

¹⁶ A be ze ngakwénta tatte tum mbote mèn ndù a ghù nukebwô là,

¹⁷ mba tshen ben bàa là tse bo ghù ntanta là nsi tsin ndà ntsha mbwe Tshùaben, mbwe ghale'te boa ghasa'kam tse bo be num fa' yen ngelaṅ nà là.

¹⁸ Ghasa'kam nsi diag ntun kua' mebwô, yen mbe ze ngakwénta ke' b'a ze tatte, mbe ndù a ke' tshob a tatte num mfèl i là.

¹⁹ A mbe ndùlala bin ghù yi mb'a lo nke ndiag neghù num mfèl i là. A nsi tshùa ndùlala o sô nukebwô netèl o.

²⁰ Tsemo' ben nsi ju' ke bwôge, lèn yen kebwô be ke bèn nebe netèl o.

²¹ A ke' bwô ndù o ghù sàm kondèn: Yôg num yôg, biag lag num lag, ntsho' sô num sô, mbe' bu num bu, mbe' ku num ku.