Nebwôgte 18 - NTSHOB NSI

Tse tshu ghale'te, ben Lévi

¹ Ghale'te, ben Lévi, njoṅ ze nzwit Lévi fa, ke nsi ghù ju ke ntsi' lo boa bon Israél; bo nsi ke jù yub à tshule'te tse bo ton num nelo' ngamte Tshùaben yi, a be mi ntsi' Tshùaben nà.

² Ben Lévi ke nsi ghù ntsi' netèt fèt tshobe. Tshùaben bèn mbe mub ntsi', mb'a na' ntshob bo là.

³ Tshù ju ze ghale'te ghù neke nkwé ngô li! Ben tse bo ke mfà nyàmna' ke njùmbwe lo là, mb'a bwô ndù bo fà bu nyàm, ngag ntshu tse mba tshag se ngale'te.

⁴ O nsi ke fà mbwe nsa mu, ndu' mu, mba mfèt mu boa mbwe nyiaṅ njùmbwe ts'o kebte là yi,

⁵ nummb'a yi ze Tshùaben Nsi o na' ntsho' netèt nzwit bon Israél fa, ndù a ke mfa' num lén Tshùaben njoṅ ndù fa, yi mba tse nshum fa là.

⁶ Ndùse mén Lévi tum mo' dù' la' o, mba yà lo dù' z'a tshwèt ntswe bwe Israél, nke nèn mba yà lo dù' ntù i kô, dù' Tshùaben tsho' là,

⁷ a be z'a tsho bwe nke mfa' num lén Tshùaben Nsi o mba tsemo' fèt tse ben Lévi tse bo num ntsin mbwe Tshùaben nà,

⁸ mb'a bwô ndù mba yi kwé jujù be kua' njoṅ yube, mbèn mbèn nswèn tse tshu be kua' ze tu.

Nsi gha num ngàme

⁹ Ndùs'o nsi tsho ntùm ngô ze Tshùaben Nsi o fà wù là, o ke nsi fi'te tshen ngô là, zi'te tshùaya'nu tshobe.

¹⁰ Kà sàm mèn tum la' o z'a ton nshum i ke ngon i lo là. Kà sàm mèn tum la' o nke ntshaṅ ngàme, nke ndèn nu num nsà, nke ndèn nu ndamnjù, mbe ngangàme,

¹¹ mbe ngaka, mbe ngabètte ywèt nu ke nebe ngatshob njùa ka lo. Kà sàm ngabètte fe ben nu tum la' o.

¹² Nummbe mba we lo z'a ghù tshen tshu là là ghù tshùaya'nu num miag Tshùaben, a b'a num tshen tshùaya'nu là ze Tshùaben Nsi o tshwèt nta' tshen ngô là mbwe o là.

¹³ A bwô ndù o fà wul o fafa Tshùaben Nsi o.

¹⁴ Nummbe ngô tshen nà ts'o a' ta' yub là num nju' ntshu ghalèn nsà boa ghangàme; là, mba wù là, Tshùaben Nsi o ke' bam yen nà wù.

¹⁵ Tshùaben Nsi o, bù ghatshob ntshob mi tse nenùne ba Israél. A bwô ndù bin ju' ntshu i.

¹⁶ A b'a ju ze tu wul o na' mbètte Tshùaben Nsi o Horéb là. O lo tshob yi num lé'njù mbumte ndù: Me ke' kô nebèn nju' nze Tshùaben Nsi àm, ke bèn nkô neyen yen tonte mbwôg là, mbwôg ndù kà me kwù.

¹⁷ Tshùaben tshob me ndù: Ju ze bo tshob là bwô!

¹⁸ Me nsi tsho' ta' ngatshob ntshob Nsi mba wù là netèt fèt tshob fà bo. Me nsi yab ntshob màm ntshu i, a ke tshob mba ke lo ze me tshob yi là bo.

¹⁹ A be ze mèn ke' ju' ntshob màm mi a nsi tshob num lén sàm nà, mba tu wul àm tù' bèn bètte ng'é.

²⁰ Là, ngatshob ntshob Nsi z'a nsi kagtùn netshob ntshob num lén sàm ke be ndù me tshob nu yi, ke netshob nu num lén tsemo' nsi lo là, mba yen ngatshob ntshob Nsi là a' kwù.

²¹ Mo' ndù o a' tshob ntù o ndù: Bag a' lèn mbe Tshùaben ke' tshob ntshob mi à ndùke?

²² Ndùse ngatshob ntshob Nsi tshob nu a ke vù lag, ke bumte là, mb'a b'a ntshob mi Tshùaben ke' bèn ntshob là. Ngatshob ntshob Nsi mi nekagtùn ntshob tse men ntshob là. Kà bwôg i.