Nebwôgte 15 - NTSHOB NSI

Ngu'njù lagte, nelagte njo, ghayennge', kuan

¹ Israél, o nsi ke kag njo yu nganjo ndùse ngu'njù sammbàa tôg là.

² Tshù mb'a nsi ke lo' tôg yi li: Mba zit mèn Israél lo z'a fo nkàb mfèl i là nsi faṅ yen njo là yi. A ke' bwô ndù a nànte mfèl i ndùse bo yob njo ndù a bwô nefaṅ njo nganjo là, nummbe yen nà b'a num lén Tshùaben ze tu wul i na' mfaṅ ze be njo be là.

³ O ghù nenànte ngùn nkwé yu njo, nda' ndù mfaṅ ze njo mfèl o yi.

⁴ Njôg mbe be, mbwoṅ ke nsi be la' o, nummbe Tshùaben nsi tam ntse wù ntùm ngô ze yi Nsi nsi ghù a tù' yu, mbe mu ntsi' là.

⁵ Yen nà b'a ndùs'o ke nju' nze Tshùaben Nsi o, nke nze nkàn mi kua' mebwô, nkàn mi me kite wù sènni là.

⁶ Tshùaben Nsi o nsi tam ntse wù mb'a na' ntshob là. O nsi fà tshu ngô Tshùaben, ke lon sàm ju kua' yu tu wut. O nsi tô ngô yàme, tshen ngô là ke tô o tshobe.

⁷ A be ze mo' mfèl o ze Israél be mbwoṅ ntùm mo' ta' tusô netèt ntusô mu, ntùm ngô ze Tshùaben Nsi o fà wù là, mb'a ke' bwô ndù o mem miag mu, ke bèn ṅu' bu o mbwe mfèl o mbwoṅ.

⁸ A bwô ndù o nyit bu o mbwe i, mfà ju z'a bwoṅ nà yi.

⁹ Zete ndù kà men nkwate kebwô li se' ntù o, o tshob ndù: Ngu'njù nefaṅ njo ghebte! Zete nebe ke ko ndèn mfèl o z'a be mbwoṅ nà, nga ju yi. A be z'a kua' ntsiaṅ Tshùaben nà, mba kebwô nsi tsho o num bwe.

¹⁰ Fà ju yi, ndù kà ntù i ghù a ke ntsham zwe; a nsi tshùa ndùlala Tshùaben Nsi o tam ntse wù num njoṅ mfa' mu fa, mi o to'te là, njoṅ i fa vù lag.

¹¹ Bwoṅbwoṅ nsi ke be ze be ntùm ngô; a ndùlala ze me fà sen kàn ni wù là: O a' ke nyit bu o mfèl o, z'a ke' ghù ju, mbe mbwoṅ ntùm yu ngô là.

¹² A be ze mfèl o mén Héber, mandum ke mènnzwi lo swèn wul i wù là, mb'a bwô ndù a fa' wù ngu'njù ntôge, là a be mbatte ngu'njù sammbàa, o kag i a tum la' o.

¹³ Nda' ndù o ke nsi kag i mbu ndaṅe;

¹⁴ O nsi fà ju yi num nyàm tsho, fà ju yi num nsa mi o tsham nà, fà ju yi num tshu ts'o tshab là, fà ze ju num tshu tse Tshùaben Nsi o tam ntse wù, o ghù là.

¹⁵ Kwimte ndù o lo be ndà kuan Egipto me Israél, ndèn ndù Tshùaben Nsi o lo tshu' o bwe. A ndùlala ze me fà sen kàn ni wù sènni là.

¹⁶ A be ze nkuan o tshob mb'a ke tum wù ndà, mb'a nummb'a kô o, nkô ndà o, mbe ndù a tswe mebwô bwe là,

¹⁷ mb'a bwô ndù o lo' nto, ndo' nto toṅ i yi num nzendà, a tù' nkuan o matmat. O nsi ghù be ndaṅndaṅ mba num nkuan o ze mènnzwi.

¹⁸ A ke' bwô ndù nu nekag i toṅ o, nummb'a yà fa' wù num ngu'njù ntôge, mbe ndù yen ngelaṅ nà b'a nkàbfa' ngafa' yoṅ tse bàa. A be ndùlala mba Tshùaben Nsi o nsi tam ntse wù num njoṅ mfa' mu fa.

¹⁹ O nsi fà njoṅ mbwe bon nyàm tsho tse bandum Tshùaben Nsi o, nyàm tse ndùb boa tse nke'e. O ke nsi lo' mbwe mén mfô fa' yi, ke kebte nyiaṅ mbwe mén njùmbwe tsho.

²⁰ Là, o nsi fèl i mba zit ngu'njù lo bin yu tunndà mbwe Tshùaben Nsi o, num dù' z'a tsho' num bwe là.

²¹ A be z'a ghù lo', mbe nke'kèt, mfùmiag, ke tsemo' tshu tsi num i lo, mb'a ke' bwô ndù o fà i Tshùaben Nsi o mba jule'te là.

²² O nsi fèl i ntùm ndà o; mèn nelàn bo mèn nesagte nsi fèt ntu tshob bàa fa, ndaṅndaṅ mba bo be mfèt ngabnyàm nà.

²³ Nda' ndù o ke nsi fèt lem; o nsi fètte lem nsi mba ntse là.