Nebwôgte 13 - NTSHOB NSI

Nenaṅ ntsha tu ghaghamte neto

¹ A bwô bin tshùbe, nze njoṅ tshu fa tse me tshwèt ntshob bin nà, kà bin kwi'te sàm ju bwe, ke bèn nsébte sàm ju bwe.

² Israél, a be ze ta' ngatshob ntshob Nsi tum netèl o; ke ta' nzinjem no, nke ntshob nu netshàm ke keki lo,

³ kà tshu ts'a tshob nke mbumte mb'a tshob wù ndù bin yi nèn mbaṅ tsemo' nsi, tshen nsi là ts'o ke' lèn yube, mfa' bo là,

⁴ mb'a ke' bwô ndù o ju' ntshob yen ngatshob ntshob Nsi là ke yen nzinjem nà lo; nummbe mba Tshùaben Nsi zin bèn nke ndaṅte zine, neyen a be ze bin num nkô i ngô ntù zin fa, njoṅ zwiag sin fa là.

⁵ A bwô bin ke mbwe be njam Tshùaben Nsi zin, nke mbwôg i; bin ke ntshùb nkàn mi, nke nju' nz'é, nke mfa' yi mbèn nke nso wut num i.

⁶ Yen ngatshob ntshob Nsi là ke yen nzinjem nà lo nsi kwù, nummb'a tshob ndù bin ta tu Tshùaben Nsi zin z'a na' nsô zin ngô Egipto, ntshu' zin ndà kuan nà. A bèn ndiag nesô o num manze Tshùaben Nsi o na' ntshob ndù o ke nzin bwe là me Israél. O nsi ke sô nukebwô netèl o kua' ndùlala.

⁷ A be ze mfèl o, mén màan, ke nshum o, ke ngon o, ke nzwi o z'o num nkô i là, ke nshum o z'o num nkô i mba yu tu wut, nànt'o ntùm tsham ntshob ndù: Be nèn mfa' tsemo' nsi, nsi tse mba tà tsho na' mbe ke lèn yube,

⁸ netèt nsi ntumntum tse bo lam zin mbume, tse bo ghebte mba tse bo nesà, mbaṅ o, nelo mo' taṅ tsha' nkum num mo' là,

⁹ mb'o ke nsi bam ju z'a tshob là, ke bam neju' mba neju'u; kà te lag kondèn num i, kà kag i, ke kabt'é.

¹⁰ Là a bwô ndù o zwi i; a bwô ndù o bèn mbwôgmbwe mbù' bu nsi num i nezwi i, kà bu ngô tum z'a mànjam.

¹¹ O nsi tamt'é ndoṅ a kwù, nummb'a ke ndiag nesô o njam Tshùaben Nsi o z'a na' nsô o ngô Egipto, ndà kuan nà.

¹² A nsi b'a ndùlala, ndù ba Israél fa tshùa njam bwe mbwôge, mba ndù kà sàm mèn bèn ngù lèn yen nukebwô là netèl o me Israél.

¹³ A be z'o ju' bo tshob nu mfà num mo' ta' tusô netèt men nà mi Tshùaben Nsi o fà wù mba dù'ntswe, ntshob ndù:

¹⁴ Ben kebwô tum netèl o, mbagte ben bo ntùm sob tusô ntshob ndù boa bo nèn mfa' tsemo' nsi, tshen nsi là tse tu wul o ke' lèn nà,

¹⁵ mb'o nsi diage, tswe' ntun mi, bètte kua' mebwô. A be z'o yen ndù nu b'a nenùne, mbe ndaṅndaṅ, mbe ndù yen tshùaya'nu là tôg kua' netèl o là,

¹⁶ mb'o nsi lo' ntshùag ṅwi zwite ben bo be ntùm sen tusô là là yi, tam ntshù' num mba ke lo z'a ntùm bwe là, bèn lo' ṅwi zwite nyàm yi fa.

¹⁷ O nsi kùmte ntsha' fa netèt ngô ton tusô fafa boa ntsha' ntsho num miag Tshùaben Nsi o. Sen tusô là nsi tù' z'a ta' fèt se ndùlala, mèn be ke bèn nkul i.

¹⁸ A ke' bwô ndù sàm ju ze bo tam ntshù' bwe là ghô bu o, mbwôg ndù kà tonte yantù Tshùaben kam num o, mba a fà kondèn i wù, ntshàm ndèn mu, ngù o yàm, nsin mb'a na' ntshob nsaṅlaṅ bwe tà tsho là.

¹⁹ Sen fu' li b'a ndùs'o ju' nze Tshùaben Nsi o, nke nze nkàn mi me tshwèt nkite wù sènni là, mba ndùs'o tshwèt ngù ju z'a bwô là num miag Tshùaben Nsi o.