Nebwôgte 1 - NTSHOB NSI

Mbwe nsoṅ Mosé Tshu ts'a bwô nekwimte là boa ntage

¹ Tshù ntshob mi Mosé tshob njoṅ ba Israél fa, mo' yoṅ Yordan, num kônkwa, ntùm tômbo'o Araba mbwe Suf, netèt Paran, Tofél, Laban, Hatserot mba Di-Zahab li.

² Nelo Horéb, ntshùa manze z'a num mbat Seir là tà nèn nkum Kadèsh-Barnéa ghù lé'njù zin ntshob ntshù' gham.

³ A lo be num mbatte ngu'njù ṅam nkuà, mum ṅwù ntshob ntshù' gham, num mbwe lé'njù ntùm ṅwù, Mosé tshob nu bon Israél, kua' mba Tshùaben na' ntshob yi ndù a tshob bo là.

⁴ A lo be be ndù a yà tshùa Sion mfen Amor ntsho. Sion na' nke ntswe à Hesbon. Mbe be ndù a yà tshùa mba Og mfen Basan ntsho. Og na' nke ntswe Ashtarot bo ma' ntsho Edrei.

⁵ A lo be mo' yoṅ Yordan ntùm ngô Moab. Mosé to' neke ntote yen ntshù' li ntshob ndù:

⁶ Tshùaben Nsi be, lo tshob nu be Horéb ntshob ndù: Bin tswe num yen mbat li neshu.

⁷ Bin kaṅ wut zin nène; bin lo nsen ni. Bin tshùb manze z'a nèn num mbat ba Amor là boa dù' ts'a diaṅ i mbum nà: Tômbo'o, mbale, ngô z'a mà tun nà, mà ntèn, num dibantse, ngô ba Kanaan mba Liban, nèn ndùlala tà nkum ta'ntse ndùb, ta'ntse Efrat.

⁸ Tshù, me yab ngô là mbwe bin. Bin tsho bwe ndo' a tù' zine. A ngô ze me Tshùaben na' mbam, mbù tà tsin Abraham, Isak mba Yakob nefà bo boa nzwit yub fafa là.

Nete ghatsho'te ntsha

⁹ Tshù, me lo tshob bin yen ngelaṅ nà ndù me ke' ku'ni tshàm tù' me neket lèt num bin.

¹⁰ Tshùaben Nsi zin ghù bin yàm ndonni kà ntù' b'a mba nsa mi a mfe kamànyam nà.

¹¹ A bwô ndù Tshùaben Nsi tà tsin kwi'te zin ndùlala yoṅ ntsha' mbùm ntshùate, mbèn ntam ntse bin mb'a na' mbù bin nà.

¹² Be me ket lèt zin, nge' zin mba ntanta zin tù' m'a kua' ndùke?

¹³ A bwô ndù mba zit nzwit zin no tsho' benntùn tse bo ghù zenu, nke nzete, mba benntùn tse bo lèn yub là, me yab yub tu netèt bin.

¹⁴ Bin lo bùnte me ntshob ndù: Ju z'o bètte bag là b'a ze ntùn.

¹⁵ Ndùlala me lo lo' fenfen nzwit tsine, kum benntùn tse bo lèn yub là, njab yub tu netèt bin, tsemo' num ben ntsha' mbùm, tsemo' num ben nkù, tsemo' num ben ṅam ntàn, tsemo' num ben gham. Tshen ben ni bèn ngù mba' neke ntô tsin nzwit.

¹⁶ Me bèn ntshob men ntshob li tsin ghatsho'te be num yen ngelaṅ nà ndù: A bwô bin ke nju' nze fèt tsine, ndo' a nunetsin ntsho'te yi ndùse ntanta be netèt mèn bo mfèl i, ke netèt mèn bo ngùn no là.

¹⁷ Kà bin lôte mba mèn be là ndùse bin tshwèt ntsho'te ntsha là. Bin ju' ze nze mônke' mba ze ndùb là; kà bin bwôg sàm mènntùn, nummbe netsho'te fe a Nsi. A be ze bin yen ndù mo' nu ta neshu là, mb'a bwô ndù bin lo' nse' yi mbwe àm me ju'u.

¹⁸ Tshù mba me na' nkite tshu tse bin ghù là num yen ngelaṅ nà.

Neton ngô Kanaan mbwe tatu

¹⁹ Be lo Horéb nzinte num yen mà bagkèt zi kônkwa là fa ze bin yen nà, be lo ntshùb manze mbat ba Amor, kua' mba Tshùaben Nsi be na' ntshob be là, nzin nkum Kadèsh-Barnéa.

²⁰ Me tshob bin ndù bin lo zin nkum num mbat ba Amor ze Tshùaben Nsi fà be là.

²¹ Israél yen ndonni ndù Tshùaben Nsi o yab ngô mbwe o; ko' nèn ndo' ngô a tù' yu ndaṅndaṅ mba Tshùaben Nsi tà tsho na' ntshob wù là; kà bwôg, ke bèn mvètte.

²² Ndùlala bin lo se' mbaṅ àm, ntshob me ndù: Be tum benntùn mbwe be, bo nèn ntsha' ngô, nsoṅ be manze be nsi ko' bwe là, mbèn nsoṅ be ntusô mi be nsi tsho bwe là ndùse be zin nkum nà.

²³ Yen nkwate li lo bwô àm, me yen a be ze ntùn; ndùlala me lo' ben ntshob bàa gham netèt bin, ta' mèn mba ntùm zit nzwit lo.

²⁴ Bo nèn, nja' num mbale, nzin nkum tômbo' Eshkol, ntsha' dù'.

²⁵ Bo lo' ntàm tù yen ngô là bu bo se' nda'te bag ntshob ndù: Ngô ze Tshùaben Nsi be fà be là b'a ze ntùn.

²⁶ Là bin lo ke kô neko' nèn bwe, ntù' ghatatu num nu ze Tshùaben Nsi be tshob là.

²⁷ Bin lo zwete tun ntô ntùm ntàb tsine, ntshob ndù: A b'a nummbe Tshùaben bàn yage, ndùlala bèn ngù k'a nsô yag Egipto, neswèn yag mum mbu ba Amor ndù bo biagte yage.

²⁸ Be nsi ko' nèn a yà? Fèt be lo kag nyu' num be ntshob mbe bo yen mo' nzwit mèn ndùb ndù a ta ntshùa ze be, njen ntusô ndùb mi kàbngô ts'a sag tà nkum mfe kamànyam nà; bo tshob mbe bo lo yen mba bon Anak bwe.

²⁹ Me lo tshob bin ndù: Kà bin bwôg, kà wut zin vètte mbwe bo.

³⁰ Tshùaben Nsi zin z'a num nzin mbwe bin nà nsi ma' ntsho ze tu wut num tu bin, kua' mb'a na' ngù njoṅ i fa num miag min Egipto,

³¹ mba kônkwa là. A bwe là z'o na' njen Tshùaben Nsi o kel o mba mèn be nket nshum i là me Israél. A lo ghù ndùlala num manze fa ze bin zin bwe tà nse' nkum nsen ni là.

³² Mba tà ndùlala bin lo ke yab ntù num Tshùaben Nsi zin;

³³ z'a na' nke nèn mbwe bin num manze, num nediag dù' mbàn bin nà. A lo ke nzin ntùm mbwôg tèttswe' ndùlala ndù a la'te manze ze bin zin bwe là bin, nke nzin ntùm ndot mbwôgtshù.

³⁴ Tshùaben ju' tshu'te zin, nja ntù nsaṅlaṅ bwe, ntshob ndù:

³⁵ Sàm mèn netèt yen zwiaṅ ben kebwô li ke nsi yen mbwô ngô ze me na' nu ngu tà tsin ndù m'a' fà bo là.

³⁶ A b'a nda' Kaléb nshum Yéfuné bèn yen tù' i. Ngô z'a zinte bwe là, me nsi fà yi boa bon tse, nummb'a zin kua' mba me Tshùaben kô là.

³⁷ Tshùaben lo ya ntù mba me num tu bin, ntshob ndù: Mba kua' wù Mosé yu ke nsi tsho bwe.

³⁸ A b'a nda' Yoshua nshum Nun, ngafa' o nsi bèn tsho bwe; a bwô ndù o fà tànntù yi, nummb'a yi bèn lo' Israél tsho yi ntùm yen ngô là.

³⁹ Bon tsin tse bin na' nke ntshob mbe bo a' lo' yub mba ntsha' ntsho là, tsin nshum tse bo ke' yoṅ ndèn mebwô bo kebwô sènni là, tshen ben nà nsi bèn tsho bwe. Me nsi fà ngô bo, a tù' kua' yube.

⁴⁰ Là, mba bin nà, bin kaṅ wut zin nèn kônkwa, nze nenèn dibantse meba.

⁴¹ Bin lo bùnte me ndù: Bag ghù kebwô Tshùaben. Bag a' ko' nèn ma' ntsho mba Tshùaben Nsi be tshob be là. Ndùlala mba zit mèn no lo' tse tshu ntsho, bin na' kwate ndù bin a' ko' num mbat ke tshàm.

⁴² Tshùaben tshob me ndù: Tshob bo ndù kà bo nèn num mbale, ke bèn nkam ntsho, nummbe me ke tshàm netèt bo. Bin to' ntsho mba ghakeban tsin nsi tshùa zine.

⁴³ Me lo tshob bin, là bin ke ju' ntshu àm. Bin bam nebe ghatatu mbwe ntshob Tshùaben, nko' nèn tsin num mbat ke tshàm.

⁴⁴ Ndùlala ba Amor tse bo num ntswe num yen mbat là tum, njab njam bin mba ba ṅwa' là; bo tshùa zin ntsho nelo Seir tà nèn nkum Horma.

⁴⁵ Ndùse bin bèn njam nà, bin làn mbwe Tshùaben; là Tshùaben ke ju' nze zin, ke kù' tse ntoṅ num sàm nu.

⁴⁶ Ndùlala bin tswe Kadèsh dù' ze bin tswe bwe ngelaṅ yàm nà.