Nahum 3 - NTSHOB NSI

Nukebwô tse Ninive num nke ngù là, boa ntsha ze bo nsi naṅ tu i là

¹ Nge' tu ngô z'a be mfètte lem, z'a dun tatte bo nefètte lem nà; a ke' be fite neke njé'é!

² Bo tshwèt nju' tshu'te fet shua'a, tshu'te nku nkalige, tshu'te nku nyàmdiaṅ z'a tshwèt ntôg là, mba ze nkalig mi bo tshwèt mbùn nde là!

³ Nke nju' tshu'te nko'nyàm z'a tshwèt ndab nyàm ndù a kù nde là; ṅwi tshwèt ṅwa'a, kô nke nké'é. Bwoṅ nke'kèt, bwoṅ fe ben! fe ben sa tshwèt kà nze tshùa ke be! Bo ke mfa't'a num fe ben!

⁴ A b'a num nu kattù z'a be nkat yàm nà. A ghù ntshù fùte, mbe kua' ngabatte z'a be ndo' ntù mèn nà. A lo ke nta ngôngô ntùm kal i, nke nta ntumntum ntùm kal i, nke nta ntumntum ntùm batt'é.

⁵ Tshùaben tàndà ntsho tshob ndù: Tshù, me lo nsi num o. M'a' bù' ntôg nzwe num se o, m'a' ghù ngôngô yen o tunntôg, ngù nufen nzenze yen o ntùm tuswe.

⁶ Me nsi tam ṅu' mvèn o, ghù bo wag o, o tù' ju komzwi.

⁷ Mba we lo z'a nsi yen o là nsi le' o, tsin tà ngùanesà mbaṅ o, tshob ndù: Bo sate Ninive, kua' we z'a nsi ko ndèn mi à? Me nsi diag ngafite ntù o à yà?

⁸ O bwô tshùa No-Ammon, z'a na' nke ntswe netèt nta'ntse, ntse diaṅ i mbume, dibantse be ze nsam, dibantse be ze kàbngô là ké?

⁹ Etiopia bo Egipto na' mb'a ze neta njoṅ ndù fa. Put bo Libia b'a ghaywimt'é.

¹⁰ Bo lo' mba yi ntsho yi ntùm kuan, a b'a ndà kuan. Bo zwite tse bontsit bonfi num njoṅ mfagte manze fa. Bo lo' kamkam tse ntam tô yi, ntaṅ njoṅ tse ben ndùbndùb fa nkù tùne.

¹¹ Mba wù nsi bum ndu' ke leme; mba wù nsi diag ndàlem num ngakeban.

¹² Njoṅ tsho neta kàbngô fa b'a mba ntù mbatsi mi mbwe mbatsi ba bwe là; a be ze bo nyi'te nkaṅ mub là, mba mbatsi a' vù ntshu mba we lo z'a kô nejù là.

¹³ Yen ndù tsho ba la' b'a mba bènnzwi là netèl o; nzendà yu ngô tete nge mbwe ghakeban tsho, mbwôg kù tsho fùnndà fa.

¹⁴ Tu' ntse mba bo tshwèt ndo' o là, nabte tsho kàbngô! Tsho ntùm netob, nyiaṅ tsha'a, bèn nabte tô tsha' nton tsha' ts'o bom tsha' bwe là.

¹⁵ Tshù, mbwôg nsi kù o bwe, ṅwi nsi biagt'o bwe, a nsi biagt'o mba ngamntàn nà. Tam ntsha' mba ngamntàn nà!

¹⁶ Tsho ghatantàn tse bo yàm ntshùa nsa mi a kamànyam b'a mba ngamntàn ts'a be nga'te mbàb mi mfùt là.

¹⁷ Tsho kamkam b'a mba ngamntàn nà, tsho fenfen be mba bwoṅ ngamntàn tse bo be njabte num kàb ndùse lé'njù fite là; nyam be ntume, bo fùtte, mèn ke bèn ndèn dù' ze bo bwe là.

¹⁸ Mfen Asiria, tsho ghabéb mbwe tshwèt me' miaglo. Tsho tàndà ntsho tshwèt nzi, tsho ba la' sate num ba mbale, sàm mèn ke kùmte yube.

¹⁹ Fu nekut yub mfaṅ yi ke bwe, so keko' tù' à se vù; njoṅ benntùn fa bo nsi ju' nu num o là nsi tam bu yube; a kua' we ze yu tshùagntù ke' yab mbu num i à?