Mika 7 - NTSHOB NSI

Nsindàvù ngatshob ntshob Nsi nummbe njoṅ benntùn fa bagte yub nu

¹ Njennge' mba me là! Me b'a mba ngatsho' tshu ngelaṅ ndùdum nà; me b'a mba ntsha' ze bo be ndénte fèn ndùse bo à tsho' tshu là: Lèn tsha ju ke bwe ze mèn jù là, lèn tshom s'a yôg mfi se lag sàm be nge'te là ke' bèn mbe.

² Mèn mebwô ke' bèn mbe mum ngô, mèn netsin ke bèn mbe netèt benntùn; njoṅ yub fa tamte ndem num nefètte lem, mba we lo nke mbùn mfèl i nkù.

³ mbu mub be mfùag wut neghù nukebwô; nkam be mbètte nuntse, ngatsho'te nke mbètte nkàbfa', ndùb nke ntswite ndaṅndaṅ ndù mba ze ntù tshwèt nkù, ndù a tshùa ndùlala nzin ku ntshù' boa bo.

⁴ Mènntùn z'a netèt bo là b'a mba kwékwénàndô là, mèn netsin z'a netèt bo là bag mba kàb njô là. Lé'njù nge' se tsho ghatshob ntsho Nsi na' ntshob là ghebte. Bo nsi tswe à ntùm tuswe yen ngelaṅ nà.

⁵ Kà bam ju ze nshun o tshob là, ke so ntù num yu kwùntshaṅ; tshùb lém so mbwe mènnzwi z'a be nzi ndàntù o là.

⁶ Nummbe nshum tshwèt ntute tàab, ngon nke nte'te màab zwe', Ghakeban mba we lo tum à be ntùm ndà i.

⁷ Mba me là, me nsi ke lôte dù' ze Tshùaben be bwe là. M'a' yab yàm nenywinte num Nsi ngayôg àm. Nsi nsi ju' nz'àm, bùnte me.

⁸ A ke' bwô ndù ngakeban àm tsiaṅte num yàm nu! Nummb'a be ze me vù nsi là mba me nsi bèn lo; a be ze me tswe ntùm njam nà mba Tshùaben b'a yàm nka'.

⁹ Me nsi fènte yantù tshùaben, nummbe me lo ghù nukebwô num i; tshù me nsi fènte i tà kum ndùs'a tshètte njam àm, ngù nu ndaṅndaṅ me là; a nsi tshagt'àm mbaṅ nelàne, me nyàmte ze nunetsine.

¹⁰ Ngakeban àm nsi yen i tuswe ko i, yi z'a ke ntshob me ndù: Tshùaben Nsi o b'a yà là! Miag màm nsi be yen i me tsiaṅte. Bo nsi nyiaṅt'é nku, ndaṅndaṅ mba bo be nyiaṅte netob num manze là.

¹¹ Lé'njù se bo nsi bèn kut mu nkumba' là te nsi; bo nsi kù'te tsho ndùnsi sen lé'njù là.

¹² A nsi be mum sen lé'njù là, bo fe Asiria, Egipto, nto' Egipto nèn nkum mbaṅ ta'ntse, nto' num dibantse nèn nkum num mo', nto' num mbat nèn nkum num mo', nse' mbaṅ o.

¹³ Njoṅ ngô fa nsi tù' kônkwa ntshùat'a num tu ba la'; ntshùat'a num ntàm mi ngùninu mub num njam nà.

¹⁴ Lo' shua' so ntshagte yu nzwit mèn yi, bwoṅ nyàm z'a be yu ju ntsi' là, a ke ntswe à tù' i mum fèn netèt Karmél! A bwô ndù bo fèt nenà num Basan mba Galad, mb'a na' mbe num mo' ngelaṅ njù là.

¹⁵ Ghù bag yen tshu netshàm mb'a na' mbe lé'njù s'o sô yag ntum yi mà Egipto là.

¹⁶ Ngôngô nsi yen tuswe ko yub boa njoṅ neta yub fa. Bo nsi yab bu ntshu bo, ntoṅ mub nùne.

¹⁷ Bo nsi lat mbab mba nyu là, mba bon tshu tse bo be nsoṅ bam sob num tsha' là. Bwôg nsi ghom yub njam tshob kàbngô; bo nsi vètte mbwe tshùaben nsi yag. Bo nsi bwôg o.

¹⁸ Zit Nsi z'a fut'o à? Zit Nsi z'a be ndagte mfànnu, ke ke nte lag num nukebwô tshé' ntsi' mu à? A ke' be lé' yantù i matmat, nummb'a be ṅwate num kondèn.

¹⁹ A bwô ndù o bèn nko ndèn mage, ma' mfànnu mag nsi te ku o bwe. Ma' nukebwô tshag fa ntùm dibantse.

²⁰ Kwé nta yu nunetsin num Yakob, kwé nta bwôntù o num Abraham mb'o na' nka' ba tà tshag fe mbwembwe là.