Mika 5 - NTSHOB NSI

Nu z'a nsi ghù num ngelaṅ Mésia là

¹ Wù Bétléhém, Efrata, mba mb'o b'a metsit tunndà netèt bwoṅ tunndà Yuda là, mèn z'a nsi sa' Israél me là nsi tum à wù, mèn ze ngùt tse fe à tà yà lo, fe mum lé'njù ts'a be mbwe là!

² A ndùlala, Nsi nsi ghua' yube, tà nkum ndùse mènnzwi z'a bwô ndù a bwe nsi bwe, tshé' fèt tse bèn njam ntamte num bon Israél là.

³ A nsi lo tù tshagte bwoṅ ben tse ntùm neta Tshùaben, num ghamte lén Tshùaben Nsi i, dù'ntswe yub ke nsi kamte. Nummbe ze netô nsi nèn tà kum num ntôg njù.

⁴ A yi nsi bèn lo' fite se' yi! Ndùse Asiria nsi tsho ntùm ze be ngô, ndùs'a nsi nyiaṅte tse be tsha' nku là, yen ngelaṅ nà bag nsi ghù ghatshagte sammbàa lo nsi num i, mba kamkam benntùn fome.

⁵ Fenfen tse nsi lo' ṅwi tshagte Asiria yi; bo nsi lo' bi tshagte ngô ts'a Nimrod là yi. A nsi tshùa ndùlala, a tshu' be bu Asiria, a be z'a tsho ntùm ze be ngô, a be z'a te ku i num tse be tsha' là.

⁶ Tshé' bon Yakob nsi be netèt nzwit nzenze mba meme' mi a fe Tshùaben nà, mba ntàm ntse mi a ghette num nenà là. Tshé' bon Yakob là ke' be nywinte num mènntùn, ke be béb sàm ju bon mèn nyiaṅtu.

⁷ Tshé' bon Yakob nsi be netèt ngô nzenze, netèt nzwit nzenze mba ngwayit be mbe netèt nyàm tshwèt là, mba mén ngwayit be mbe netèt njùmbwe là; a be mbe ndùs'a tshùa, nyiaṅte nku, nsé'te là, sàm mèn kekwé ju z'a ghom nà yi.

⁸ Tshùaben, a bwô ndù o bù' bu o nsi num ghamaṅt'o. A bwô ndù o biagte ghakeban tsho!

⁹ Tshùaben tshob ndù: A nsi be mum sen lé'njù là me biagte tsho nyàmdiaṅ ntsho, bagte mu nkalige;

¹⁰ me nsi biagte nkam la' mi à ntùm yu ngô là, sate tsho kàb nebéb ngô.

¹¹ Me nsi biagte ka mum mbu mu, o ke nsi bèn ghù ghatshaṅ ngàm netèl o.

¹² Me nsi sô njoṅ tshu nekom fa mba neto ts'o ghù là netèl o, ndù k'o bèn nevù nsi mbwe mfa' mbu mu, nke ngamte yube.

¹³ Me nsi sô neto Astarté netèl o; bèn sate tsho ngô.

¹⁴ Me nsi lo' yantù yagte mba' yi mum ngô tse bo ke' ju' ntshu là.