Mika 3 - NTSHOB NSI

Nenaṅ ntsha bo nka'ni

¹ Me tshob ndù, bin ju' me fenfen Yakob, bon mfen, kamkam tunndà Israél, a ke b'a bin bèn nku'ni nelèn nunetsin, nu ndaṅndaṅ ké?

² Bin be mbàn numebwô, nke nkô nukebwô; bin be ntsho', mfét ngub mba mbàb num mvôg mube,

³ bo tse bo be mfèt yàm nzwit mèn, nke nkém ngub z'a be nkabte yube, nke mbe'te mvôg mube, nke nkute mvôg mub mb'a b'a ntùm kab mbwôg là, mba mbàb z'a be ntùm mba là!

⁴ Ndùlala bo nsi kua' tsiaṅ Tshùaben, a ke bùnte bo; là, a nsi lem yube se i num yen ngelaṅ nà, nummbe bo ghù tshu ts'a ke' bwô là!

⁵ Tshùaben lo tshob ghatshob ntshob Nsi tse bo be nsate yàm nzwit mèn nà ndù: Bin be ntshob ndù la' b'a tshaṅ ndùse bin ghù jujù là, nke ntshob ndù ntsho num ntùm ngô ndùse jujù bwoṅ bin nà.

⁶ A nsi tshùa ndùlala bin be ke zi njem tèttswe', a nsi tshùa ndùlala bin be ke tshaṅ ngàm njame; lagnyam nsi bi num ba ghatshob ntshob Nsi, mbwôgtshù tam njam mbaṅ bo.

⁷ Tuswe nsi ko ghayente, tuswe nsi ko ghatshaṅ ngàme, njoṅ yub fa nsi tshùb nyiaṅ ntshu tshob mbu, nummbe Nsi ke' bèn mbùnte nu bo.

⁸ Mba me là, neta ze Ywèt Tshùaben fà me là dun num àm; Ywèt nunetsin mba fènntù num num àm, ndù me tshob mfànnu Yakob mba nukebwô Israél.

⁹ Fenfen tunndà mba bon mfen kamkam tunndà Israél, bin ju' yen nu li: Nunetsin be mbag zine, bin be ṅu'te nu ndaṅndaṅ.

¹⁰ Bo kut Sion a ntùm lem, nkut Yérusalém ntùm nuketsin.

¹¹ Tse fenfen ke ntsho't'a num nu ntse, tse ghale'te ke ntswit'a num ntsho'fa'. Tse ghatshob ntshob Nsi ke ntshob nu ndamnjù a num nu nkàb; nke mfa'te njé'te num Tshùaben ntshob ndù: Tshùaben ke b'a netèt bag ké? Nge' ke nsi yab mbu num bag.

¹² Là, a nsi tshùa num tu bin Sion tù' nà ze bo dù' là, Yérusalém tù' fam, mbat ndà Tshùaben nsi tù' fèn.