Mika 2 - NTSHOB NSI

Negha ze nu gha jù bin

¹ Nge' num tu ben tse bo be nô num kunndà sob ntàmte nu, nabte nukebwô ntù bo, njù yoṅ mbe làne, bo ghù be ndaṅndaṅ ndùse bo ghù mba' neta mum mbu mub là.

² Bo be nge'te nà, ndo' njoṅ i fa, nge'te mba' nkab mbu bwe, bo be mfètte lem ta' mèn mba tunndà i nsi, bo be nge'te ta' mèn mba ntsi' mi.

³ Ndùlala, tshù ju ze Tshùaben tshob li: Tshù, me tàmte nge' num yen nzwit là; be bin ke tum ntshu yen nge' là; ke bèn mbe zin ke tshag tu zin tù. Nummbe yen ngelaṅ nà nsi b'a ze nge'

⁴ Bo nsi tshob tànkùt bin mum sen lé'njù là, tôte vù tshob nu bin ntùm neta tshob ndù: Yag nu mi! Bo biagte yage. Bo ghabte ntsi' tunndà yage. Bo diag nekwé i me numke? Bo fà tshu tshag ghako'tewut.

⁵ A ndùlala, sàm mèn ke nsi tum ntùm mbumte Tshùaben fi' yu bag ntsi'i.

⁶ Bo be ntshob ndù: Kà netshob ntshob ngatshob ntshob Nsi, kà bo nelo' ntshob ngatshob ntshob Nsi ntshob lèn tshen tshu là yi. Tuswe ke nsi yab mbu num bag.

⁷ Tunndà Yakob, be a be ndùlala ké? Tshùaben be nja ntù ndende ké? Yen nà b'a ze mat z'a be ngù là ké? Ntshob mi ke' b'a mi mebwô mèn z'a be mfi'te mi nzin num mi mèn netsin nà ké?

⁸ A ghubte mba bo tshwèt ndo' yàm nzwit mèn mba ngakeban nà; bin be mfin kummbaṅ num nzwe ben tse bo be ntshùa mbaṅ bin ntùm fite, ngelaṅ nefe ntsho là.

⁹ Bin be nsô zwi yàm nzwit mèn ntùm ndà tshob ts'a tanjoṅ bo là. Bin be nsô yàm ju kwiwut ghamte num bon tshob matmat.

¹⁰ Bin tsin tù, nzine, nummbe yen dù' li ke' b'a dù' nefite. A nsi tshùa num ngùninu min mvèt kebwô tsho tô bin!

¹¹ A be ze mo' mèn fùte zine, ntshob tatte ndù: Me tshob wù ndù o nsi ghù ndu' mba neta ndu' là, mba yen mèn nà bèn mbe ngatshob ntshob Nsi ntùn yen nzwit mèn nà.

¹² O Yakob, me nsi kùmt'o fafa, me nsi kùmte tshé' Israél; me nsi tse'te yub mba njùmbwe là ntùm ta' kin, mba bwoṅ nyàm nà dù' ze bo be mfèt là. Mà tshu'te benntùn ze ndùb nsi be bwe.

¹³ Mèn z'a tshwèt nzin mbwe bo là nsi tsin mbwe bo; a nsi kwé mbwe bo, bo nsi tôg nzendà tume; mfen yub nsi tsin mbwe bo. Tshùaben nsi kwé mbwe bo.