Mfa' Ghantum 28 - NTSHOB NSI

Paulo mà Malta ngô tètntse

¹ Ngelaṅ bag na' njôg ndùlala là, bag ju' ndù lén yen ngô là b'a Malta.

² Ba ntùm yen ngô là la'te mo' mat ze bag ke' to' yen nà, ntsiaṅte num bag. Bo lo' njoṅ yag fa nèn njab mbaṅ mbwôg ndùb ze bo kwé'te là, nummbe mbaṅ lo ke ndo, mfùag bèn nke nko.

³ Là Paulo tswitte mo' mbe' ntshwèn njum njab mbwôge, mo' swenyu tum bwe, nummbe dù' lo ke ndume, nko' ndamte num bu i.

⁴ Ngelaṅ ba ntùm yen ngô là yen mba swenyu tshùaṅ mum bu Paulo là, bo tshob bo bo ndù: Kua' nenùne, yen mèn ni b'a ngazwi mèn, a lo njôg ntùm ntse, là yantù Nsi ke' bam ndù a yôge.

⁵ Là Paulo miagte bu i, swenyu vù ntùm mbwôge, a ke ju' mo' sàm nukebwô num i.

⁶ Bo lo ke mbéb ndù bu Paulo nsi mole ke ndù a' vù nsi nkwù lo, là mba bo béb yàm njen ndù mo' sàm ju ke' ghù i là, bo bate nkwatenu mube, ntshob ndù Paulo b'a Nsi.

⁷ Là Publiô mbwe mèn ndùb ntùm ngô tètntse, lo be mbaṅ yen dù' là. A lo' yag ghùn kua' mb'a bwô là, bag tswe ndà i lé'njù tat.

⁸ Là tà Publiô lo be num kunndà nke ngone, ndù a ghù saṅtewut mba tshobome. Paulo tsho ndà i, nde'te Nsi, njab mbu mi num i, njat'é.

⁹ A tshùa ndùlala, tsemo' ghangokèt bo be ntùm ngô là se' yub, Paulo yate yube.

¹⁰ Bo ghù nku'ni bag, nke mfà tshu ts'a ku'ni neywimte yag ngelaṅ bag nèn nà.

Paulo mà Roma

¹¹ A lo be tshùa maṅwù tat, bag tsho ntùm mo' sitima ba Aléksaṅdria se bo na' nkom neto ba Diôskuri num bwe là, ndù a be bwe fe ndùsàne,

¹² ndo bwe, nèn nkum Surakus dù' ze bag tswe bwe lé'njù tat là.

¹³ Ndo bwe, ntshùb kaṅ ntse ndaṅndaṅ, nèn nkum Règiô. A be mbatte lé'njù, fetmbaṅ fe nze mà ntèn, ngù bag zin à be bwe lé'njù bàa, bag kum Putéôli.

¹⁴ Bag yen fètfèt bwe, bo labte yag ndù bag à bo tswe lé'njù sammbàa. Tshù mba bag zin nkum Roma là.

¹⁵ Fètfèt be ju' bwe ndù bag tshwèt nse'e, nse' lo' yage, bag à tsemo' bumte ntàn Apius, bag à tsemo' bumte mo' dù' lén se mba' ghùn ntat. Paulo be yen yube, ndabte Nsi, mbèn ndo' fènntù.

¹⁶ Ngelaṅ bag kum Roma là, bo bam Paulo ndù a tswe dù' z'a kô là, nda' ndù bo yab ta' soyé a nke mbéb i.

¹⁷ Lé'njù tat lo be tshùa, Paulo tsiaṅ kamkam ba Yuda. Ngelaṅ bo tse'te là, a tshob bo ndù: Fèt tshàm, mba mba me ke' ghù sàm nukebwô mum ngô be mba num mat ngô be là, me be se' mba ngandàtsha, ndù fe Yérusalém bo lo ghom àm, mfà àm mbu ba Roma.

¹⁸ Tshen ben ni lo lôte njoṅ nu fa, nke ndiag nekag àm, nummbe sàm ju lo ke be z'a ku'ni neghù bo zwi àm nà.

¹⁹ Là mba ba Yuda na' nga là, ntù àm nànt'àm ndù me tsiaṅ Kàsà num yàm ntsha ke bote ngô àm num mo' sàm nu.

²⁰ Tshù ju z'a ghù me tsiaṅ zin ndù bag à bin tshobte là; nummbe nu nenywinte Israél bèn ngù kà me mbe ntùm ntùne.

²¹ Bo bùnte yi ndù: Bag ke' kwé sàm ṅwa'ni z'a fe Yudéa num o là; sàm mèn netèt fètfèt ke' to' se' ntshob ke nesoṅ sàm nukebwô lo num o.

²² Là bag ke' gha neju' ju z'o kwate là. Bag lèn ndù nu z'o be mèn ntùm bwe là, bo num ntshabt'é njoṅ dù' fa.

²³ Bo ka' lé'njù boa Paulo, bo zi mbe se' mbèn njam kua' neshu, nse' ntèl i ntùm ndà i. Neto' nkebnjù nèn nkum mfetnjù, a nke ntote nu bo num nufen Nsi, nke nkwé nta, nkagtùn ntshùa num ntshù' Mosé mba ghatshob ntshob Nsi, ndù bo bam nu Yésu.

²⁴ Tsemo' bam nu ts'a tshob là, tsemo' tswe ke bam.

²⁵ Mba bo be ke be ntshu ntshù' netèt bo là, bo tumte nène, ngelaṅ Paulo ke ntshob men ntshob li bo ndù: Ywèt Nelàn lo ku'ni netshob ba tà tsin ntshùa num ntshu ngatshob ntshob Nsi Esaya ndù:

²⁶ Nèn ntèt yen ngô li, ntshob yi ndù: Bin a' ghù nju' ntoṅ mine, ke tshùb ju bin ju' là; nke ndôte yàme, ke yen.

²⁷ Nummbe ntù yen ngô li sage, a fùn ntoṅ mi, a mem miag mi, mbwôg ndù k'a yen miag mi, ke bèn nju' ntoṅ mi, mbwôg ndù k'a ju' ntù i ke bèn nkaṅ ntù i ndù me yat'é!

²⁸ Bin lèn ndonni ndù sen yôg li s'a fe Nsi là, a lo tum ghakelèn Nsi; tshen ben ni nsi ju'u. [

²⁹ Ngelaṅ Paulo tshob ndùlala là, ba Yuda tum nène, nkam ntsha be bo bo.]

³⁰ Paulo tswe ntùm ndà z'a tshwé' là ngu'njù ndaṅndaṅ bàa. Boa ben tse bo ke nse' lôt'é là nke ntshobte kua' mebwô.

³¹ A nke ntshob nufen Nsi, mbèn nke ntswite ntshob Tshùaben Yésu Kristô kua' ndaṅndaṅ, sàm netshètte ke be.