Mfa' Ghantum 23 - NTSHOB NSI

¹ Paulo te miag num ntse'te ghatsho'te ntsha, ntshob ndù: Fèt tshàm, nzentù àm ze mebwô tshwèt nsoṅ àm ndù me zin mbwe Nsi mba ménla' là tà nkum sènni.

² Là ngale'te Nsi ze ndùb, lén se Anania tshob ben tse bo be mbaṅ Paulo là ndù bo lab ntshu i.

³ Ndùlala Paulo tshob yi ndù: Kumba' ze bo se' mbem nà, Nsi a' lab o! O tswe nke ndiag netsho't'àm ntshùa num ntshù', o tshwèt mbagte ntshù', nummbe o tshob ndù bo lab àm.

⁴ Ben tse bo be bwe là tshob ndù: O ke nso ndon à tu ngale'te Nsi ze ndùb!

⁵ Paulo tshob ndù: Fèt tshàm, me lo ke lèn ndù a b'a ngale'te Nsi ze ndùb; nummbe bo lo kite ndù: O ke nsi tshob nukebwô num nkam ngô o.

⁶ Paulo be lèn ndù ntse'te ghatsho'te ntsha ghù benntùn bag bàa, bag ba Sadukai mba bag ba Férésia, nkua'a, ntshob netèt bo ndù: Fèt tshàm, me b'a mèn num bag ba Férésia, mbe mèn ba Férésia. Bo ke ntsho't'àm à num nenywinte mba num nelo benntùn num vù.

⁷ Men ntshob li kag tantshu netèt ba Férésia mba ba Sadukai, ntse'te ghabte bag bàa.

⁸ Nummbe ba Sadukai num ntshob ndù nelo num vù ke' be, Angél mba Ywèt ke be, là ba Férésia num mbam njoṅ tshen nà fa.

⁹ Tshu'te ndùb vù netèt bo, tsemo' ghalèn ṅwa'ni Nsi num bag ba Férésia lo tù, nta ntshu kua' neta, ntshob ndù: Bag ke' yen sàm nukebwô num yen mèn ni, là, a' be ndù Ywèt ke Angél lo tshob nu yi.

¹⁰ Tantshu bèn nke nèn mbwe, mfen ba soyé bwôg ndù bo a' tsho'te Paulo mfémfé, ngù ba soyé swe', nsô i netèt bo, ndo' i mbèn yi ndà ba soyé.

¹¹ A be tèttswe', Tshùaben ṅwag, ntshob Paulo ndù: Fèn ntù, mb'o à kwé nta màm Yérusalém nà, a bwô ndù o bèn nkwé nta màm mba Roma.

Mba ba Yuda tsin tsham nezwi Paulo là

¹² Njù be làne, ba Yuda tsin tsham, nkàn mfe num tu wut tshob ntshob ndù: Ndon tsho tu bo, a be ze bo jù, mbèn nu ke be ndù bo zwi Paulo là.

¹³ Ben tse bo tsin tsham nà lo tôg benntùn ṅam nkuà.

¹⁴ Bo nèn ntèt ghale'te Nsi tse ndùbndùb mba ghakwé mbwe, ntshob bo ndù: Bag kàn mfe, nso ndon num tu wut tshag ndù bag ke yab ju ntshu bag ke be ndù bag zwi Paulo.

¹⁵ Bin à ntse'te ghatsho'te ntsha be ntshu ntshù' mbètte mfen ba soyé ndù a fà i bin, mba bin nekwé i nelôte tun ntsha i kua' mebwô là; ndùlala bag a' zwi i a ke yoṅ nkum nsen ni, bag à nabte njoṅ nu fa.

¹⁶ Là mén ngomna Paulo lèn nu sen ywi' là, nèn ndà ba soyé, nsoṅ Paulo yen nu là.

¹⁷ Paulo tsiaṅ mo' tà ba soyé, ntshob yi ndù: Nèn bin yen ménnshum ni mbwe mfen ba soyé, nummbe a ghù nu netshob yi.

¹⁸ A lo' i bo yi nèn mbaṅ mfen ba soyé, a tshob ndù: Ngandàtsha Paulo tsiaṅ àm nde't'àm ndù me lo' ménnshum ni z'a ghù nu netshob wù là, nse' mfà wù.

¹⁹ Mfen ba soyé tshùb bu ménnshum nà, mbènte bo yi njam, mbètt'é ndù: Ke z'o ghù netshob m'à?

²⁰ A bùnte ndù: Ba Yuda nabte netèt bo nele't'o ndù ndamnjù o lo' Paulo nèn yi mbwe ntse'te ghatsho'te ntsha mba bo nekwé i nelôte tun ntsha i kua' mebwô là.

²¹ Là bam nà neju' ntshu yube! Ben ṅam nkuà kà ntôg netèt bo bùn i ywi', bo kàn mfe num tu wut tshob ndù ndon tsho tu bo, a be ze bo jù mbèn nu ke be ndù bo zwi Paulo là; bo à nabte njoṅ nu fa, bo ke ntù' béb, a be z'o bam nà.

²² Mfen ba soyé lé'te ménnshum nà, ntshob yi ndù: Kà ghù sàm mèn lèn ndù o soṅ àm yen nu là.

Mba bo tshag Paulo Késaréa là

²³ A tsiaṅ tsemo' tà ba soyé, ntshob ndù: Bin nabte soyé nkù bàa, ghako' nyàmna' ṅam sammbàa mba ghama' nkô nkù bàa, bin nèn Késaréa neto' nyam bwe'e tèttswe',

²⁴ mbèn nabte mba ba nyàm tse Paulo nsi ko' bwe là ndù bin lo' i nèn mfà ngomna Félix be kua' mebwô.

²⁵ A kite yen ṅwa'ni li ngomna ndù:

²⁶ Klaudia Lisia num ngomna ndùb Félix, me tsha't'o!

²⁷ Yen mèn ni ba Yuda lo tshùb i, nke ndiag nezwi i, me se' bag à soyé nkwé i ngelaṅ me ju' ndù a b'a ze Roma là.

²⁸ Me diag nelèn nu ze bo bot'é num bwe là, ngù bo lo' i nèn yi mbwe ntse'te ghatsho'te ntsha.

²⁹ Me yen ndù bo na' mbot'é à num nu tantshu mfà num ntshù' yub, là mo' sàm ju neghù ndù bo zwi i ke nema' i tsha lo ke be.

³⁰ Ngelaṅ bo soṅ àm ndù ba Yuda bùn i ywi' là, be ndùse kà me njoṅ ntum i wù. Me bèn ntshob ben tse bo bot'é là ndù bo lo' ntsha nse' ntèl o yi.

³¹ Ba soyé lo' Paulo mba bo lo ntshob bo là, nèn tèttswe' nte i Antipatri.

³² Njù làn, bo faṅ i boa ghako' nyàm, nène; ba soyé bèn njam ndà bo.

³³ Ghako' nyàm kum Késaréa, mfà ṅwa'ni ngomna, nte Paulo mbwe i.

³⁴ Ngelaṅ a miagte nesiaṅ ṅwa'ni là, a bètte Paulo bag ngô z'a be mèn bwe là; mbe ju' ndù a b'a ze Kilikia,

³⁵ ntshob ndù: M'a' bètt'o nu ngelaṅ ze ben tse bo bot'o se' là. A tshob bo lé' i ntùm ntshwèt Hèrodé na' nkut là.