Mfa' Ghantum 2 - NTSHOB NSI

Mba ghantum kwé Ywèt Nelàn nà

¹ Lé'njù Pentekôte lo be se' ndù njoṅ yub fa tse'te dù' ntshù'.

² Be ndùse, mo' tshu'te swe' kamànyam mba fetmbaṅ ndùb là, ndun ntùm ndà dù' ze bo tswe là.

³ Tsemo' tshu mba ngwatmbwôg là ṅwag bo, njabte num tu bo.

⁴ Bo dun Ywèt Nelàne, nto' neke ntshob ntshob nzenze mba Ywèt Nelàn ke mfà bo ndù bo tshob là.

⁵ Ba Yuda ghabwôg Nsi tse bo na' mfe ntùm njoṅ nzwit benntùn fa tse bo be tun bam kamànyam nà, lo be Yérusalém.

⁶ Bwoṅ benntùn be ju' yen tshu'te là, nkù nde nse'e; tu tshob tshu', nummbe mba we lo netèt bo lo ju' mba ghantum tshwèt ntshob ko' ntshob mi là.

⁷ Bo tshàm neshu, mbwôge, nke ntshob ndù: Tshen ben ni bo tshwèt ntshob là ke b'a ba Galiléa ké?

⁸ A ghù à ndùke kà mba we lo netèt be nke nju' bo ntshob kua' ko' ntshob mi bo bwe i yi l'à?

⁹ Ba Partia, Media, Elam, ba Mèsôpôtamia, Yudéa, Kapadôkia, Pontô, Asia,

¹⁰ Frigia, Pamfilia, Egipto, mba ngô Libia mba ben tse bo fe Roma,

¹¹ ba Yuda mba ben tse bo bam nu ba Yuda là, ba Krèta mba ba Arabia; be tshwèt nju' bo nke ntshob nu ndùbndùb tse Nsi ntùm ntshob be.

¹² Nu tshùa njoṅ yub fa, bo tshàm, nke ntshob bo bo ndù: Yen ni tswit'à ndùke?

¹³ Là tsemo' ben bèn nke ntshabte yub ntshob ndù: Bo bum à ndu'.

Ntshob Pétro

¹⁴ Pétro lo tù boa tse ntshob ntshù' gham, ntshob bo kua' mà neta ndù: Ba Yuda mba njoṅ ba Yérusalém fa, bin lèn yen nu li, nkù' ntoṅ nju' ntshob màm.

¹⁵ Tshen ben ni ke' bum à ndu' mba bin tshwèt nkwate là, nummbe a ke' à nyam bwe'e nkebnjù.

¹⁶ Là yen ni b'a kua' nu ze ngatshob ntshob Nsi Yoél na' ntshob là ndù:

¹⁷ Nsi tshob ndù: Me nsi naṅ Ywèt tshàm num njoṅ benntùn fa num miagte lé'njù, bon tsin tse bandum mba tse bènnzwi nke ntshob ntshob Nsi; tsin bonnshum yen njem, tsin ywèn benntùn zi njem.

¹⁸ Ṅ, num tshen lé'njù là, me nsi naṅ Ywèt tshàm num ghafa' tshàm tse bandum mba tse bènnzwi ndù bo ke ntshob ntshob màm.

¹⁹ Me nsi ghù nu netshàm mfe kamànyam mba nsà num nsitsha'a: Lem, mbwôge, mba nzembwôge.

²⁰ Lagnyam nsi kaṅ tù' njame, maṅwù tù' lem, kà lé'njù Tshùaben se ndùb mba se neghamte se'e;

²¹ là mba we lo z'a nsi tsiaṅ lén Tshùaben nà nsi yôge.

²² Ba Israél, bin ju' men ntshob li ndù: Yésu ze Nazarèt, mèn ze Nsi kwé nta mi mbwe bin njam mfa' neta, nu netshàme, mba nsa ts'a ke ngù netèt bin, mba bin lèn nà,

²³ yen mèn nà ze Nsi fà mb'a na' nkô, nabte mbèn mbwôgmbwe ntshob là, bin lo zwi i, ngù mbu ben kebwô kwimt'é num fanta'tù,

²⁴ Nsi lo kwé i ntùm ngùtni vù, mbam i num vù, nummbe vù lo ke ku'ni netshùb i ntùm ze neta.

²⁵ Nummbe David num ntshob num i ndù: Me lo ke njen Tshùaben mbwe àm njoṅ ngelaṅ fa, nummbe a b'a num bu àm ze zwim, ndùlala ndù kà sàm ju nyi't'àm.

²⁶ A ndùlala ntù àm tshwèt nke ntsiaṅte, lém sàm nke njob kwi tsiaṅte; mba wul àm nsi fite ntùm nenywinte.

²⁷ Nummbe o ke nsi faṅ yôg sàm ntùm ngô fe ben, ke bam ndù Mèn o ze nelàn bi.

²⁸ O ghù me lèn manze yôg, o nsi ghù me dun tsiaṅte mbwe o.

²⁹ Fèt tshàm, bin bam me tshob bin mba me lèn mfà num tà be David là ndù: A lo kwù, bo tshoṅ i, fi se bèn neke' netèt be tà nkum sènni.

³⁰ Là, a na' mb'a ngatshob ntshob Nsi, ndèn ndù Nsi lo ka' yi, ntshob nsaṅlaṅ bwe ndù mo' mèn ntùm nzwil i nsi tswe num diaṅfen se,

³¹ a lo bwôgmbwe njen nelo num vù Kristô, a yi là z'a na' ntshob ndù: Bo lo ke faṅ i ntùm ngô fe ben, wul i ke bi là.

³² Yen Yésu li, Nsi bam i num vù; njoṅ yag fa b'a ghakwénta.

³³ Ngelaṅ ze bu Nsi ze zwim bù' i là, a kwé Ywèt Nelàn ze Tà na' nka' là, naṅ i, mba bin tshwèt njen mbèn nju' là.

³⁴ Nummbe David ke' ko' nèn kamànyam, là tu wul i num ntshob ndù: Tshùaben tshob Tshùaben àm ndù: Tswe num bag bu àm ze zwim;

³⁵ tà nkum ngelaṅ ze me nsi yab ghakeban tsho tun nku mo, ndù bo be nko' nku mu là.

³⁶ A bwô njoṅ ndà Israél fa lèn kua' nenùn ndù Nsi lo' yen Yésu li ze bin kwimt'é num fanta'tù là, ngù Tshùaben mba Kristô yi.

³⁷ Bo be ju' men ntshob li a kwag yub tà ntùm ntù tshobe; bo tshob Pétro mba tsemo' ghantum ndù: Fèt tshag, bag nsi ghù à ndùke?

³⁸ Pétro bùnte bo ndù: Bin kaṅ ntù tsine, bo nyu' mba we lo netèt bin ntse num lén Yésu Kristô ndù Nsi lagte nukebwô tsine; ndùlala bin nsi kwé Ywèt Nelàne.

³⁹ Nummbe nka'ni b'a mine, mi bon tsine, mba mi ben tse bo be ngùanesà, ben yàm tse Tshùaben Nsi be nsi tsiaṅ yub là.

⁴⁰ A tshùa num memo' ntshob yàme, nkwé nta, mfà ntag bo, ntshob ndù: Bin yôg wut tsin netèt yen zwiaṅ ben kebwô li.

⁴¹ Ben tse bo bam ntshob Pétro là, bo nyu' yub ntse. Benntùn nguan ntsha' tat kwi'te num ghantum sen lé'njù là.

Netamte mbwe ben Kristô

⁴² Bo nke nkagtùn ntùm ju nezi'te ghantum mba ntùm netamte fètfèle, nke mbe'te bàn, mbèn nke nde'te Nsi njoṅ yub fa.

⁴³ Nebwôg tshùb ntù njoṅ yub fa, nummbe ghantum lo ke ngù nu netshàm mba nsà yàme.

⁴⁴ Njoṅ benntùn fa tse bo bam nà nke mb'a ntshu ntshù', tshu tshob b'a ntam.

⁴⁵ Bo nke nswèn nà yub mba tshu tse bo ghù là, ngabte nkàb i netèt bo, mfà mba we lo be mb'a ku'ni num i là.

⁴⁶ Bo nke nkagtùn nèn Ndà Nsi njoṅ lé'njù fa ntùm ntù ntshù', nke mbe'te bàn, mbèn nke njù jujù yub ntùm tsiaṅte mba ntùm nefite ntùm ndà tshobe,

⁴⁷ nke ngamte Nsi, nke ngù nu ts'a bwô benntùn nà. Tshùaben nke nkwi'te ben ts'a ke njôg yub là ntùm ntse'te.