Mfa' Ghantum 19 - NTSHOB NSI

Paulo mà Efésô

¹ Ngelaṅ Apôlô na' mbe Korintô là, Paulo tshùa bag ngô z'a be mfe tu là, nswe' nèn Efésô.

² A tèt tsemo' ghazi'te nu Yésu bwe, ntshob bo ndù: Bin lo kwé Ywèt Nelàn ngelaṅ bin na' mbam Yésu là ké? Bo bùnte yi ndù: Bag lo ke yoṅ nju' nu mfà num Ywèt Nelàne.

³ Paulo bèn mbètte yub ndù: Bin na' nkwé à zit kwéntse à? Bo bùnte ndù: Kwéntse Yohané.

⁴ Paulo tshob bo ndù: Yohané lo ke mfà kwéntse ze nekaṅ ntù, nke ntshob benntùn ndù bo bam mèn z'a tshwèt nse' njam i là, yen nà b'a ndù Yésu.

⁵ Bo be ju' ndùlala bo nyu' yub ntse num lén Tshùaben Yésu.

⁶ Paulo yab mbu num bo Ywèt Nelàn swe' num bo; bo to' netshob ntshob nzenze, mbèn nke ntshob mba ghatshob ntshob Nsi là.

⁷ Bo na' mb'a nguan ntshob bàa gham.

⁸ Paulo tsho sinagogue, nke ntshob nu num nufen Nsi ke bwôg, num maṅwù tat, fa' se ke tshùa banban.

⁹ Là tsemo' ben nke nta be ntù ke bam, nke mbagte manze Tshùaben mbwe benntùn; a tum netèt bo, mfagte ghazi'te nu Yésu num bo, nke ntswite nu Yésu njoṅ lé'njù fa ntùm ndà ṅwa'ni Tirano.

¹⁰ A ghù ndùlala num ngu'njù bàa; njoṅ benntùn fa tse bo ke ntswe Asia, ba Yuda mba ba Grikia là ju' ntshob Tshùaben,

¹¹ Nsi tshùa njam Paulo, ngù ba nsà nekuni,

¹² ndùlala kà benntùn nke ndo' nkam nzwe mba kob ts'a kwag ngub i là, nèn nke ntshwinte ghangokèt yi; ngokèt mi num bo, mba ba ywètkebwô bèn nke ntum num bo.

Ba Yuda ghata' ywètkebwô

¹³ Là mba tsemo' ba Yuda ghata' ywètkebwô tse bo ke nzin be tùtù là, to' netsiaṅ lén Tshùaben Yésu num ben tse bo ghù ywètkebwô là, nke ntshob ndù: Me tshob bin num lén Yésu ze Paulo tshwèt ntshob là.

¹⁴ Bo na' mb'a sammbàa, bon mo' ze Yuda ngale'te Nsi, lén se Skéva; bo na' mbèn nke ngù ndùlala.

¹⁵ Là ywètkebwô bùnte ntshob bo ndù: Me lèn Yésu, mbèn ndèn mèn ze Paulo be yi là; là bin, bin be zin à ba we?

¹⁶ Mèn ze ywètkebwô be num i là, tsho' ngwù num bo, ntù' ngatô tse bàa, ntsham yub kà bo kette mfaṅ, mbèn ntum à tunntôg yen ndà là kà nkù nène.

¹⁷ Njoṅ ba Yuda fa mba ba Grikia tse bo ke ntswe Efésô là lèn yen nu là; bwôg tshùb njoṅ yub fa, lén Tshùaben be neghamte.

¹⁸ Tsemo' ben netèt tse bo na' mbam Yésu là to' netshobe, nke ntote nu tse bo na' nke ngù là.

¹⁹ Benntùn yàm netèt tse bo na' nke ngù ka là lo' ba ṅwa'ni ka nse' yi, nton mbwe benntùn. Bo siaṅte, njen ndù njoṅ i fa b'a drakma ntsha' ṅam ntàn.

²⁰ Ndùlala ntshob Tshùaben nke nta nèn mbwe, nke nda'te neta i.

Mba Demètriô tshu' tu ngô Efésô là

²¹ Tshen nu li lo be tôge, Paulo nabte ndù a nsi tshùa Makédônia mba Akaya kà nèn Yérusalém, mbèn ntshob ndù: Ngelaṅ me nsi kum Yérusalém, lôte dù' là, mb'a bwô ndù me nèn njen mba Roma.

²² A tum tsemo' ghaywimt'é bàa Makédônia, Timôtio mba Erasta, ntù' mbèn ntswe Asia mo' mén ngelaṅ.

²³ Num yen ngelaṅ nà, mo' tshu'tu ndùb tum num nu Yésu.

²⁴ Mo' mèn lén se Demètriô, ngave z'a ke ndo' tùn nabte bontsit tèmpèl Artémis yi là, lo ke ngù ghave tse ghù bin yàme.

²⁵ A tse'te mba tsemo' ghafa' tse bo be ghave là, ntshob bo ndù: Ben tshen, bin lèn ndù be ke njôg à num sen fa' li.

²⁶ Bin yen ndù ke b'a nda' Efésô, là ntùm ngô Asia fa, Paulo tshwèt ntswite, mbèn nke mbagte tu benntùn ntshob ndù: Ba nsi tse benntùn nabte mbu mub là ke' b'a ba nsi.

²⁷ Nge' z'a be bwe là ke' b'a nda' ndù fa' be a' bagte, là, a b'a ndù mba tèmpèl Artémis, Nsi ndùb ke nsi bèn be sàm ju, lén se se njoṅ ba Asia fa mba njoṅ njù fa num ngamte là bèn mbi.

²⁸ Men ntshob li so yantù ntùm ntù tshobe, bo kua' neta ntshob ndù: Artémis ba Efésô b'a ze ndùb.

²⁹ Tshu'te vù ntùm ngô, njoṅ yub fa tèn bwoṅ ngwù num ndà dù' neghù sa, nsoṅ Gayô mba Aristarkô ba Màkédônia, shun zin Paulo.

³⁰ Paulo nke ndiag netsho netèt benntùn, là ghazi'te nu Yésu to' i.

³¹ Mba tsemo' kamkam Asia tse bo na' mb'a shun tse là tum bo nèn ntagt'é ndù k'a nèn ndà dù' neghù sa.

³² Tsemo' nke ntshob yen ni, tsemo' nke ntshob yen nà, nummbe tshu'tu lo vù ntùm ntse'te kà ben yàm ke bèn nelèn tu nu ze bo lo ntse'te bwe là.

³³ Bo sô Aléksaṅdre netèt bwoṅ benntùn, ba Yuda tènt'é ntshag mbwe. Aléksaṅdre ma'te bu, ndiag netshob nu benntùn.

³⁴ Ngelaṅ bo lèn ndù a b'a mén Yuda là, njoṅ yub fa kua' nze ntshù' nguan nyam bàa, ntshob ndù: Artémis ba Efésô b'a ze ndùb.

³⁵ Là ngakite ṅwa'ni ngô ghù bwoṅ benntùn mi', a tshob ndù: Ba Efésô, we z'a netèt benntùn ndù a ke' lèn ndù ngô ba Efésô bèn nke ndé' tèmpèl Artémis ze ndùb mba neto i z'a swe' mfe kamànyam n'à?

³⁶ Sàm mèn ke' be ta ntshu num yen nu là, a bwô ndù bin mi ntswe ke ke ngù ju ntùm nenànte.

³⁷ Nummbe bin lo' tshen ben ni nse' yi; bo ke bagte tèmpèl ke bèn ntshabte Nsi be Artémis.

³⁸ A be ze Demètriô mba ghave tse bo à bo be là ghù ntsha boa mèn nà, a bwô bo bot'é; lé' netsho'te ntsha num bwe mba ba ngomna bèn mbe!

³⁹ A be ze bin bèn ngù tsemo' nu là, mba bo a' tsho't'a ntùm ntse'te ntshù' ngô.

⁴⁰ Be bo lo' be mba ghabagte ngô là num nu z'a tôg sènni là, nummbe be be ke soṅ tunu z'a ghù be tse'te là.

⁴¹ A tshob ndùlala, ngù ntse'te sate.