Mfa' Ghantum 11 - NTSHOB NSI

Pétro mbwe benkristô Yérusalém

¹ Là ghantum mba fètfèt tse bo ke ntswe Yudéa là ju' ndù mba ghakelèn Nsi kwé ntshob Nsi.

² Ngelaṅ Pétro bèn njam Yérusalém nà, ba Yuda tse bo bam nu Yésu là ghù i ntsha,

³ ntshob ndù: O nèn ju ben tse bo ke' si ket là, mbèn njù ju bin à bo.

⁴ Pétro soṅ yub njoṅ nu fa neto'te tà nèn miagte,

⁵ ntshob ndù: Me lo ke nde'te Nsi ntùm ngô Yôbé, ngwù nsi ntù àm tum, me yen ntùm njem: Mo' ju mba kam nzwe ndùb ze bo tshùb ntôg mi nkuà là, swe' mfe kamànyam, nse' tà nkum num àm.

⁶ Me lôte kua' mebwô, njen nyàm nku nkuà tse bo be num nsitsha' là, nyàm tse bo num ntswe tshwèt là, bon nyàm tse bo num nsoṅ bam sob nsi là mba bon nsaṅ mfe kamànyam.

⁷ Me ju' mba mo' nze nke ntshob me ndù: Pétro, lo tù nzwi mfèle!

⁸ Me bùnte ndù: Nga me Tshùaben, nummbe sàm ju z'a sagte là mba z'a ke' làn nà ke' yoṅ nto' tsho ntshu àm.

⁹ Nze là bèn ntshob me mbatte yoṅ bàa mfe kamànyam ndù: Ju ze Nsi lànte là, kà lo' i mba ju z'a sagte là.

¹⁰ Yen nà tum ndùlala yoṅ tat, njoṅ i fa bèn nko' mbèn kamànyam.

¹¹ Be yen ngelaṅ nà, ben tat tsin nzendà ba' ze me na' mbe bwe là; bo na' ntum yub à mà Késaréa.

¹² Ywèt Nsi tshob me ndù me nèn bag à bo kà me me'te. Tshen fètfèt ntôg li nèn ntshag àm, bag à bo nèn nkum ndà Kôrneliô.

¹³ Yen mèn ni tshob bag ndù a yen mo' Angél ntùm ndà i, a tsin mbwe i, ntshob yi ndù: Tum bo nèn mà Yôbé, ngù Simon ze mo' lén se be Pétro là se'e.

¹⁴ A nsi tshob ntshob wù, ntùm men ntshob là, o nsi yôge, wù mba njoṅ tunndà o fa.

¹⁵ Ngelaṅ me na' nto' netshob nu bo là, Ywèt Nelàn swe' num bo, ndaṅndaṅ mb'a na' nswe' num be mbwe là.

¹⁶ Me kwimte ntshob Tshùaben mb'a na' ntshob ndù: Nummbe Yohané lo ke nyu' benntùn à ntse, là bin, bo nsi nyu' zin à ntùm Ywèt Nelàne.

¹⁷ Nsi lo fà ju z'a na' mfà be tse be na' mbam Tshùaben Yésu Kristô là bo be ndaṅndaṅ. Me b'a we, me ku'ni netshètte Nsi à ndùke?

¹⁸ Ngelaṅ bo ju' men ntshob li là, ntù tshob fite, bo ghamte Nsi, ntshob ndù: A kua' nenùn ndù Nsi bam nu nekaṅ ntù, nse' njôg mba ghakelèn Nsi.

Barnaba mba Saulo mà Antiôkia

¹⁹ Fètfèt tse bo na' nsate fe ngelaṅ bo tsho' nku mub kebàn num nu Etiènne nà, nèn ntùm dù' nzenze tà nkum mà Fénikia, Kiprô, mba Antiôkia. Bo tshob nkùn mebwô be nda' ba Yuda.

²⁰ Là tsemo' ben netèt bo na' mb'a ba Kiprô mba ba Kiréné. Ngelaṅ bo se' Antiôkia là, bo tshob nu Tshùaben Yésu mba ba Grikia yub.

²¹ Bu Tshùaben be bo à bo, njwimte yube, ben yàm bam nu Yésu, nkaṅ ntù tshobe, ntam njam Tshùaben.

²² Yen tshô là nèn nkum toṅ ntse'te benkristô Yérusalém. Bo tum Barnaba Antiôkia.

²³ A kum bwe, njen kondèn Nsi ntsiaṅte, ntagte yub ndù bo ghô njam Tshùaben ntùm ntù ntshù'.

²⁴ Nummbe a na' mb'a mèn mebwô, Ywèt Nelàn mba bamntù bèn ndun num i. Mo' bwoṅ benntùn yàm bèn nkwi'te num Tshùaben.

²⁵ Barnaba nèn Tarsô diag Saulo, njen i, ndo' i nèn yi Antiôkia.

²⁶ Ntu tshob bàa fa tswe netèt yen ntse'te benkristô là tamngu', nke ntswite nu benntùn yàme. A b'a Antiôkia là ze bo na' nto' netsiaṅ ghazi'te nu Yésu ndù benkristô là.

²⁷ Là ntùm tshen lé'njù là, tsemo' ghatshob ntshob Nsi fe Yérusalém nse' Antiôkia.

²⁸ Mo' ta' i netèt bo, lén se Agabô tshùa njam Ywèt Nelàn ntshob ndù kekua ndùb nsi vù num njoṅ nsitsha' fa. Yen nu là bumte, ngelaṅ Klaudia be num fen nà.

²⁹ Ghazi'te nu Yésu tshob bo bo ndù a bwô mba we lo fà ju z'a tum yi là, bo tamte njwimte fètfèt tse bo be Yudéa là yi.

³⁰ Bo ghù ndùlala, ntum Barnaba mba Saulo, bo lo' nèn yi, mfà ghakwé mbwe.