Matio 9 - NTSHOB NSI

Neyate kekale

¹ Yésu tsho ntùm kenu, ndut diaṅnkat ntse, nèn ntùm ngô i.

² Tshù, bo se' mo' kekat mbwe i ndù a nô num kunndà. Yésu be yen bamntù yub ntshob kekat ndù: Mén àm, fèn ntù, nukebwô tsho mi.

³ Tshù, tsemo' ben netèt ghalèn ṅwa'ni Nsi tshob bo bo ndù: Yen mèn ni tshwèt ntshabte Nsi.

⁴ Yésu lèn nkwatenu mube, ntshob ndù: Numke bin ngù men nkwate nukebwô là ntùm ntù tsin à?

⁵ Netshob ndù nukebwô tsho mi, ke netshob ndù lo tù, nène, a mit ntshob netèt men ni ndù a fùag à?

⁶ Là ndù bin lèn ndù Mén mèn ghù ngù' nelagte nukebwô ntùm yen njù li. Ndùlala a tshob kekat là ndù: Lo tù nket kun su, nèn la' o.

⁷ A lo tù, nèn la' i.

⁸ Bwoṅ benntùn be yen yen nu là, mbwôge, bo ghamte Nsi z'a fà lèn yen ngù' là benntùn nà.

Mba Yésu tsiaṅ Matio là

⁹ Yésu tum yen dù' là, mbe tshùa, njen mo' mèn bo ke ntsiaṅ i Matio là, ndù a tswe dù' nekwé fé', a tshob yi ndù: Bwe àm! A lo tù, mbwe i.

¹⁰ Mb'a na' mbe num téblé ntùm ndà là, ghakwéfé' mba ben kebwô yàm se', ntswe boa bo mba ghazi'te nu i num téblé.

¹¹ Ba Férésia be yen ntshob ghazi'te nu Yésu ndù: Numke ngatswite zin nke njù jujù boa ghakwéfé' mba ben kebwô à?

¹² Là, a be ju' ntshob ndù: A ke' b'a benntùn tse bo tswe mebwô là ke ndiag ngaghù fu, là nda' ben tse bo tswe kebwô là.

¹³ Bin nèn nzi'te tun men ntshob li ndù: Me kô à kondèn ke b'a ju nele'te Nsi. Nummbe me ke na' nse' netsiaṅ à ben netsine, là ben kebwô.

Netswe nziku'u

¹⁴ Ghazi'te nu Yohané se' mbaṅ Yésu, ntshob ndù: Numke bag mba ba Férésia nke ntswe nziku'u, là ghazi'te nu o ke be tswe yub à?

¹⁵ Yésu bùnte bo ndù: A be shun ndungon tswe ntùm ntsenyà ngelaṅ boa ndungon ke' l'a ndùke? Tsemo' lé'njù nsi be se' bo lo' ndungon netèt bo, a yen ngelaṅ nà ze bo nsi tswe nziku' là.

¹⁶ Sàm mèn ke' be yab kam nzwe nswe num njwèn nzwe, nummbe kam nzwe a' tshùb ze njwèn, ntsho't'é, tô se bèn mbag neshu.

¹⁷ Be bo ke ne mbèn naṅ ndu' nswe ntùm ntu' njwèn; a be ze bo ghù ndùlala là, mba ntu' a' tsit, ndu' fètte, bo bi ntu'. Là bo num naṅ ndu' nswe ntùm ntu' nswe, ngù njoṅ i bàa fa.

Ngon Yairô

¹⁸ Yésu nke ntshobte, tshù, mo' ngalôte sinagogue se' ngwù nsi mbwe i, ntshob ndù: Ngon àm kwù, a ke' yoṅ ngubte, là se' njab bu o num i, a nsi yôge.

¹⁹ Yésu lo nsi, ntam njam i boa ghazi'te nu i.

²⁰ Tshù, mo' mènnzwi z'a na' ngù ntsekebwô fe ngu'njù ntshob bàa gham nà, se' njamnjam, nkwag nzwe Yésu.

²¹ Nummbe a lo ke ntshob ntù i ndù: A be ze me kwag mba nda' nzwe i là, mba m'a' yôg.

²² Yésu kaṅ wul i njam, njen i ntshob yi ndù: Ngon àm, fèn ntù, bamntù o yôg o. Be num yen ngelaṅ nà yen mènnzwi là yôg.

²³ Yésu be kum ndà ngalôte sinagogue, njen ghatô ndô mba bwoṅ benntùn ntùm tshu'te vù,

²⁴ ntshob ndù: Bin tume, nummbe ménngon ke' kwù, là, a nezi. Bo zwi i.

²⁵ Ngelaṅ bo sô benntùn ntshag njù là, a tsho ndà, ntshùb bu ménngon, ménngon lo nsi.

²⁶ Tshô yen nu là sa ntùm yen bag ngô là.

Neyate nzenze

²⁷ Yésu tum yen dù' là, mbe tshùa, tsemo' mfùmiag bàa tam njam i, nke nkua' ntshob ndù: Mén David, ko ndèn mage!

²⁸ Ngelaṅ z'a tsho ndà là, ba mfùmiag se' mbwe i. Yésu tshob bo ndù: Bin bam ndù me ku'ni neghù yen nu là ké? Bo tshob ndù: Ṅ, me Tshùaben.

²⁹ A kwag miag mub ntshob ndù: A ghù num bin ndaṅndaṅ mba bamntù zin be là.

³⁰ Miag mub gha'. Yésu tshobte yub ntshob ndù: Bin bam nà neghù mèn lène.

³¹ Là bo tum nèn nsa yen tshô là ntùm yen bag ngô là.

³² A ke yoṅ ngubte mba tshen ben nà tum nà, tshù, bo se' mo' ketshob ze ywètkebwô ke ntô i là mbwe i.

³³ A ta' ywètkebwô, ketshob to' netshobe. Bwoṅ benntùn nyàmte, ntshob ndù: Nu z'a be ndaṅndaṅ mba yen ni là ke' yoṅ nto' tum ntùm ngô Israél.

³⁴ Là ba Férésia tshob ndù: A ke ndo' à mfen ba ywètkebwô, nta' ba ywètkebwô yi.

³⁵ Yésu nke nzin ntùm njoṅ ngô fa mba ntaṅla'; nke ntswite ntùm ba sinagogue tshobe, nke ntshob nkùn mebwô nufen Nsi, nke njate njoṅ ngokèt fa mba njoṅ lo' nzenze fa.

³⁶ A be yen bwoṅ benntùn, ndèn mub ko i, nummbe bo lo bole, njobe, mbe ndaṅndaṅ mba njùmbwe tse ngabéb yub ke' be là.

³⁷ Ndùlala a tshob ghazi'te nu i ndù: Tshu netsho' yàm, là ghafa' b'a metsili.

³⁸ Bin bu' mbu Tàfa' ndù a tum tsemo' ghafa' ntùm dù' fa' se.