Matio 8 - NTSHOB NSI

¹ Ngelaṅ Yésu swe' num mbat là, bwoṅ benntùn yàm tam njam i.

² Tshù, mo' ngankin se' ntèl i, ngwù mbwe i, ntshob ndù: Tshùaben, a be z'o kô là, mb'o ku'ni neghù me làn.

³ Yésu nyit bu i, nkwag i, ntshob ndù: Me kô, làne. Be kua' ndùse, a sôg ndàne, nkin mi mi.

⁴ Yésu tshob yi ndù: Bam nà, kà soṅ mèn, là nèn nda'te wul o ngale'te Nsi, mfà ju neghamte Nsi ze Mosé na' ntshob là, a be yub ju nekwé nta.

⁵ Mba Yésu ke ntsho Kapernaum nà, mo' mfen ba soyé se' ntèl i, mbu' mbu yi,

⁶ ntshob ndù: Tshùaben, mônke' àm num ntùm ndà ndù be'tewut tshùb i, a tshwèt njen nge' neshu.

⁷ Yésu tshob yi ndù: Tu wul àm nsi kum bwe, yat'é.

⁸ Mfen ba soyé bùnte ntshob ndù: Tshùaben, me ke' ku'ni mèn ze be o tsho tun ngàmndà màm nà. Là, tshob ta' ntshob ntshù', mônke' àm nsi yate.

⁹ Nummbe tu wul àm, me b'a mènntùn njam ben ndùbndùb, ndù mba me bèn ngù ba soyé njam àm. Me num ntshob mo' ndù: Nène, a nèn; ntshob mo' ndù se'e, a se', ntshob ngafa' àm ndù: Ghù yen ju li, a ghù.

¹⁰ Yésu be ju'u, ntshàme, ntshob ben tse bo ke mbwe i là ndù: Kua' nenùne, me tshob bin ndù: Mba ntùm ngô Israél, me ke' yoṅ mfon bamntù ndùb mba yen ni là.

¹¹ Là me tshob bin ndù; benntùn yàm nsi fe bag ntumnyam mba bag mbinyam, tswe téblé boa Abraham, Isak mba Yakob ntùm nufen kamànyam.

¹² Là bon nufen, bo nsi sô yube, ma' njù ntùm dù' njame. Nekua' mba nefèt nsô nsi be yen dù' là;

¹³ Yésu tshob mfen ba soyé ndù: Nène, a ghù num o mb'o bam nà. Be ndùse, mônke' là yate.

Mba Yésu yate màntse Pétro là

¹⁴ Yésu tsho ndà Pétro, njen màntse Pétro ndù a tshwèt ngon saṅtewut.

¹⁵ Yésu kwag bu i, saṅtewut tum num i, a lo nsi mfa' yi.

¹⁶ Njù be sène bo lo' ben tse bo ghù ywètkebwô là yàme, nse' yi mbwe Yésu. A lo' ta' ntshob ntshù', nta' ba ywètkebwô yi, a yate ben tse bo na' ntswe kebwô là.

¹⁷ Ndùlala ndù men ntshob li mi Esaya ngatshob ntshob Nsi na' ntshob là, bumte ndù: Tu wul i kwé nge' be mbèn nket ngokèt be num i.

Mb'a bwô ndù mèn tam njam Yésu là

¹⁸ Yésu be yen bwoṅ benntùn yàm mbaṅ i, ntshob ndù bo dut nèn mo' yoṅ.

¹⁹ Mo' ngalèn ṅwa'ni Nsi se' mbwe i, ntshob yi ndù: Ngatswite, m'a' ke mbwe o ntùm njoṅ dù' fa ts'o nsi ke nèn nà.

²⁰ Yésu tshob yi ndù: Ba mbàbndun ghù ntô tshobe, bon nsaṅ bèn ngù nkàn tshobe, là Mén mèn ke' ghù dù' neyab tu i bwe, mfite.

²¹ Mo' mèn netèt ghazi'te nu i tshob yi ndù: Tshùaben, bam me ndù me bwôgmbwe nèn ntshoṅ tàa.

²² Là Yésu tshob yi ndù: Tam njam àm, faṅ fe ben tshoṅ tshob fe ben.

²³ Ngelaṅ a tsho ntùm kenu là, ghazi'te nu i tam njam i.

²⁴ Tshù, mo' fetmbaṅ lo num dibantse, nyi'te ntse, tà ntse tsho ntùm kenu. Là tu wul i nke nzi.

²⁵ Ghazi'te nu i se' mbaṅ i, ntshob ndù: Tshùaben, yôg yage, bag tù' nebi.

²⁶ A tshob bo ndù: Numke bin mbwôg à, ghabamntù metsili? A lo nsi, ntshobte fetmbaṅ mba dibantse; dù' tswe ndù kam.

²⁷ Tshen ben nà tshàm yen nu là, ntshob ndù: Yen mèn ni b'a we kà mba fetmbaṅ nke nju'ni i à?

Ghaghù ywètkebwô ntùm ngô Gadara

²⁸ Ngelaṅ Yésu kum mo' yoṅ dibantse ntùm ngô ba Gadara là, tsemo' ghaghù ywètkebwô bàa tum ntùm ba' tufi, nse' mbwe i; bo lo ke ntshùag neshu kà sàm mèn ke be laṅte netshùa num yen nze là.

²⁹ Tshù, bo kua' ntshob ndù: Ke z'o ghù ntùm yag nu, Mén Nsi? O se' à neghùtni yag ke ngelaṅ yoṅ nku' ké?

³⁰ Là mo' bwoṅ, ngùnyàm lo be ngùanesà mbaṅ bo, nke njù dù'.

³¹ Ba ywètkebwô bu' mbu yi ntshob ndù: A be z'o ta' yag là, o tum yag netèt yen bwoṅ ngùnyàm nà.

³² A tshob bo ndù: Bin nène. Bo tum, nèn ntsho num ba ngùnyàm. Njoṅ bwoṅ ngùnyàm nà bùn tu mbale, nswe' ngwù ntse, mbite ntùm ntse.

³³ Ben tse bo ke mbéb yub là kù, nèn nkum ntùm ngô, nsoṅ njoṅ nu fa mba nu num nu ghaghù ywètkebwô.

³⁴ Tshù, njoṅ benntùn fa ntùm ngô tum, nèn mbwe Yésu. Ngelaṅ bo yen i là, bo bu' mbu yi ndù a tum ntùm ngô yub nène.