Matio 7 - NTSHOB NSI

Kà bin tsho'te mèn

¹ Kà bin tsho'te ntsha mèn ndù kà bo tsho'te zine.

² Nummbe ndaṅndaṅ mba bin nsi tsho'te ntsha mèn nà, bo nsi tsho'te zin be ndaṅndaṅ.

³ Bo nsi lo' à be zin mfi', fi' zin yi. Numk'o nke ndôte ntàn nenà z'a be lag mfèl o là, ke yen kam ntshwèn z'a be lag o l'à?

⁴ A be o bèn ntshob mfèl o à ndùke ndù: Bam ndù me sô nenà ntùm lag so; tshù, ndù kam ntshwèn num lag o à?

⁵ Mènmfùm, bwôgmbwe nsô kam ntshwèn lag o, kà njene, njôg nsô nenà lag mfèl o.

⁶ Kà bin fà ju nelàn ba mbù, ke bèn ma' ntôgntse min mbwe ngùnyàm, mbwôg ndù kà bo tse' nku mube, mbèn nkaṅ wut yub, mfèt zine.

Ntag nzenze

⁷ Bin lon bo a' fà bin; bin diage, bin a' fon; bin ke'te, bo a' tsho' bin.

⁸ Nummbe mèn z'a lon nà mb'a' kwé; mèn z'a diag là, mb'a' fon; mèn z'a ke'te là, bo a' tsho' yi.

⁹ A zit mèn netèt bin ze mén i lon bàn yi, mb'a nsi fà loṅ yi à?

¹⁰ Ke nelon ngontse yi, mb'a nsi fà nyu yi à?

¹¹ A be ze ben kebwô mba bin nà num ndèn nefà tshu mebwô bon tsin nà, mba Tà zin mfe kamànyam ke nsi fà tshu mebwô ben tse bo lon yi là ntshùa ndùlala ké?

¹² Njoṅ tshu fa tse bin num nkô ndù benntùn ke ngù bin nà, mba bin bèn nke ngù zin be ndaṅndaṅ num bo; nummbe a b'a ntshù' mba ghatshob ntshob Nsi.

¹³ Bin tsho à nzendà z'a fét là, nummbe a b'a nzendà ndùb mba manze negho' tse bo be nèn nkum ntùm nebi là; ben yàm b'a tse bo tsho bwe là.

¹⁴ Nummbe a b'a nzendà nefét mba manze nekag tse bo be nèn nkum ntùm yôg là; ben metsili b'a tse bo fon i là.

Ghatshob ntshob Nsi tse tatte

¹⁵ Bin bam nà num ghatshob ntshob Nsi tse tatte tse bo be nse' mbaṅ bin ndù bo ma' ngub njùmbwe num bo, là ntùm bwe, bo b'a nzwimàntô tse bo be mfèt bon mbwe là.

¹⁶ Bin *gi*nsi lèn yub ntàm mube. Be bo kàb mbatsi num tù nka' ké, ke tshom no num tù nga'lon ké?

¹⁷ Ndùlala njoṅ tù mebwô fa ke njam à ntàm mebwô, tù kebwô nke njam ntàm kebwô.

¹⁸ Be tù mebwô ke yam ntàm kebwô, ke tù kebwô lo neyam ntàm mebwô.

¹⁹ Njoṅ ntù fa mi a ke' yam ntàm mebwô là, bo num nkeb i ma' mbwôge.

²⁰ Ndùlala bin nsi lèn yub ntàm mube.

²¹ A ke b'a mèn z'a ke ntshob me ndù: Tshùaben, Tshùaben nà bèn nsi tsho ntùm nufen kamànyam, a b'a nda' mèn z'a be ngù nekô Tà z'a be mfe kamànyam nà.

²² Ben yàm nsi tshob ntùm sen lé'njù là ndù: Tshùaben, Tshùaben, bag lo ke tshob mba ghatshob ntshob Nsi là num lén so, nta' ywètkebwô num lén so, mbèn ngù mba ba nsà num lén so ké?

²³ Ntùm sen lé'njù là me nsi tshob bo ndaṅndaṅ ndù: Me lo ke to' lèn zin tshàm, bin lo mbaṅ àm, nène, bin ghaghù nukebwô.

Ba' bàa

²⁴ Ndùlala, mèn z'a be nju' njoṅ men ntshob màm nà fa, nke nze là, fut'a nzenu mèn z'a kut ba' i num loṅ nà.

²⁵ Mbaṅ lo, ntsitmbaṅ se', fetmbaṅ tshu', ntamte ngwù num yen ba' là, a ke vù, nummbe bo na' ntshoṅ tun i à num loṅ.

²⁶ Mèn z'a be nju' njoṅ men ntshob màm nà fa ke be ze là, fut'a nkagni mèn z'a kut ba' i num nkwa là.

²⁷ Mbaṅ lo, ntsitmbaṅ se', fetmbaṅ tshu', ntamte ngwù num yen ba' là, a vù; ze nevù yen ba' là bag neshu.

²⁸ Ngelaṅ Yésu miagte netshob men ntshob li là, bwoṅ benntùn nyàmte nu z'a tswite là neshu.

²⁹ Nummbe a ke ntswite yub à mba mèn z'a ghù ngù', ke tswite yub à mba ghalèn ṅwa'ni Nsi là.