Matio 6 - NTSHOB NSI

Nele'te Nsi ntùm nenùne

¹ Bin bam nà neghù nunetsin num miag benntùn ndù bo yen zine; a be ndùlala mba bin ke ghù ntsho'fa' mbaṅ Tà zin z'a be mfe kamànyam nà.

² Ngelaṅ z'o tshwèt mfà ju neywimte ghayennge' là, kà bu' ke' mbwe o kà mfà, mba ghamfùm be ngù ntùm ba sinagogue mba num manze ndù benntùn ghamte yub là; kua' nenùne, me tshob bin ndù bo à kwé mub ntsho'fa'.

³ Là ngelaṅ z'o tshwèt mfà ju neywimte ghayennge' là, kà bu o ze kwéb lèn ju ze bu o ze zwim tshwèt ngù là,

⁴ ndù yu ju neywimte ghayennge' là tôg à ntùm tsham; Tàan z'a be njen ntùm tsham nà nsi ba' wù.

⁵ Ngelaṅ bin tshwèt nde'te Nsi là, kà bin be mba ghamfùm nà, nummbe bo num nkô netsin tù ntùm sinagogue mba mfagte manze kà nde'te Nsi, ndù benntùn yen yub là. Kua' nenùne, me tshob bin ndù bo à kwé mub ntsho'fa'.

⁶ Là ngelaṅ z'o tshwèt nde'te Nsi là, o tsho ndà o, mfùn nzendà, nde'te Tàan z'a be ntùm dù' tsham nà; tàan z'a be njen ntùm tsham nà nsi ba' wù.

⁷ Ngelaṅ bin le'te Nsi là, kà bin tshob ntshob zwiaṅte, mba ghakelèn Nsi là, nummbe bo num nkwate ndù a neyob ntshob yàm bèn ghù Nsi ju' yube.

⁸ Kà bin fute yube, nummbe Tà zin lèn ju z'a bwoṅ bin nà, ke bin yoṅ mbètt'é mba nebètte.

⁹ Bin ke nde'te Nsi ndù: Tà yag z'a be mfe kamànyam nà, ghù lén so be nelàne;

¹⁰ ghù nufen so se'e, ghù yu nekô bumte mba mfe kamànyam mba num nsitsha'a.

¹¹ Fà yag jujù z'a ku' num bag sènni là.

¹² Lagte mfànnu mage, mba bag num ndagte yag mi ben bo num mfàn nu bag là.

¹³ Kà tshag yag ntùm laṅte, là kwé yag bu nukebwô. Nummbe nufen, neta, mba nekuni, b'a yu yoṅ ntshù' là, amén.

¹⁴ A be ze bin num ndagte mfànnu benntùn bo là, mba Tà zin mfe kamànyam nsi lagte zin ze.

¹⁵ Là, a be ze bin ke' be lagte benntùn nà, mba mba Tà zin ke nsi lagte min mfànnu.

¹⁶ Ngelaṅ bin tshwèt ntswe nziku' là, kà bin nyamte se zin mba ghamfùm nà; bo num ṅu'te se tshobe, ndù benntùn lèn ndù bo tshwèt ntswe nziku'u. Kua' nenùne, me tshob bin ndù bo à kwé mub ntsho'fa'.

¹⁷ Là tu wul o, ngelaṅ z'o tshwèt ntswe nziku' là, o se' labinda tu o, mbèn nsôg se o,

¹⁸ ndù kà benntùn lèn ndù o tshwèt ntswe nziku'u; là nda' Tàan z'a be ntùm dù' tsham nà, Tàan z'a be njen ntùm tsham nà, nsi bèn ba' wù.

Tshunkàb tse nenùne

¹⁹ Kà bin ke ntse'te tshunkàb tsin num nsitsha'a, dù' ze nse'ngo' mba kùafe num mbagte ju bwe, dù' ze ba tshô be ntswe' ndà njé là.

²⁰ Là bin ke ntse'te tshunkàb tsin mfe kamànyam, dù' ze nse'ngo' ke kùafe lo ke' be bagte ju, ba tshô ke bèn ntswe' ndà, njé là;

²¹ nummbe dù' ze junkàb o be là, mba mba ntù o b'a bwe.

²² Lag b'a lambo wut mèn; a be ze lag so be mebwô là, mba njoṅ wul o fa a' b'a ntùm nelàne.

²³ A be ze lag so ke' be mebwô là, mba njoṅ wut fa a' b'a ntùm njame. A be ze nelàn z'a be num o là tù' njam nà, mba yen njam nà nsi sèn neshu.

²⁴ Sàm mèn ke' ku'ni nefa' tà bàa; nummbe a' ke mbàn mo', nke nkô mo', ke neke ndat wul i num mo', nke ngwag mo' newag lo. Be bin ke ku'ni nefa' Nsi bo nkàb.

²⁵ A b'a ju z'a ghù me tshob bin ndù: Kà bin ke ndab wut tsin num yôg sine, ntshob ndù: Bag jù à ke? Bag nsi nu à ke? Mba num wut tsine, ntshob ndù: Bag nsi ma' à ke? Yôg ke' tanjoṅ ntshùa jujù, wut ke bèn ntanjoṅ ntshùa nzwe ké?

²⁶ Bin lôte bon nsaṅ mfe kamànyam njene, bo ke' be ywit, ke bèn ntsho'o, ke bèn ntse'te ju njab kandà, mba ndùlala Tà zin mfe kamànyam num nkém yube. Bin ke' tanjoṅ ntshùa yub ké?

²⁷ We z'a netèt bin ndù a ku'ni nekwi'te ta' mfi' num ntsewul i njam nelab wul à?

²⁸ Numke bin nke ndab wut tsin num nu nzwe à? Bin lôte nsàm nenà njen mb'a tshwèt nku' njene, bo ke' be fa', ke se' ndeb.

²⁹ Mba ndùlala me tshob bin ndù mba Salomon ntùm nkuni mi fa, lo ke ket nzwe mba ta' i netèt bo là.

³⁰ A be ze Nsi num ma' nzwe num yen nenà li z'a be sènni, bo ma' i mbwôg ndamnjù là, mb'a ke' ku'ni nema' nzwe mba num bin zin ké, ghabamntù metsili?

³¹ Ndùlala kà bin ke ndab wut tsine, ntshob ndù: Bag nsi jù à ke? Bag nsi nu à ke? Ke ndù bag nsi ma' à ke?

³² Njoṅ tshen tshu là fa, ghakelèn Nsi bèn nke ndiage; Tà zin mfe kamànyam lèn ndù bin bwoṅ tshen tshu là fa.

³³ Bin bwôgmbwe ndiag à nufen Nsi mba nunetsin Nsi, njoṅ tshen tshu là fa nsi se' bin njam bwe.

³⁴ Ndùlala kà bin ke ndab wut tsin num ndamnjù, nummbe ndamnjù nsi lab wut num ze nu. Mba sit lé'njù lo bo ze nge'.