Matio 5 - NTSHOB NSI

Ghafen

¹ Yésu be yen tshen bwoṅ benntùn nà, nko' num mbale, ntswe nsi, ghazi'te nu i se' mbaṅ i.

² A gha' ntshu i, ntswite yub ntshob ndù:

³ Ghafen b'a ben bo bwoṅ ywèt là, nummbe nufen kamànyam b'a yube.

⁴ Ghafen b'a ben tse bo tshwèt nkua' là, nummbe Nsi a' ghù mfite ntù tshobe.

⁵ Ghafen b'a ghafite, nummbe tsha' a' ghù mbe ju ntsi' yube.

⁶ Ghafen b'a ben tse ntù tshob tshwèt nkù, nzi nunetsin bèn nke nja yub là, nummbe bo a' ghù njwèle.

⁷ Ghafen b'a ghakondèn, nummbe Nsi a' ghù nko ndèn mube.

⁸ Ghafen b'a ben tse ntù tshob làn nà, nummbe bo a' ghù njen Nsi.

⁹ Ghafen b'a ghatshùb fenkaṅ, nummbe Nsi a' ghù ntsiaṅ yub bon tse.

¹⁰ Ghafen b'a ben tse bo tsho' nku mub kebàn num nunetsin nà, nummbe nufen kamànyam b'a yube.

¹¹ Ghafen nsi b'a bin ngelaṅ ze benntùn nsi ke tshabte zine, tsho' nku min kebàn, tshob tatte, tete nzenze nukebwô tu bin num àm nà.

¹² Bin tsiaṅte, ṅwate ntùm tsiaṅte, nummbe ntsho'fa' min b'a mi ndùb mfe kamànyam, a be ndaṅndaṅ mba bo na' ntsho' nku ghatshob ntshob Nsi tse bo be mbwe bin nà kebàn nà.

Ngwa mba nka' ntùm njù

¹³ Bin b'a ngwa nsitsha'a, là, a be ze ngwa ghua' ndùm mi là, mba bo nsi bèn ghù à ndùke k'a mbèn ndùm à? A tù' bwô à nda' nema' i njù ndù benntùn nyiaṅte nku.

¹⁴ Bin b'a nka' ntùm njù. Ngô z'a be num tu mbat là ke' ku'ni nelemte.

¹⁵ Bo ke bèn ne nke nte mbwôg num lambo, nte à mum kab, là num téblé, a ké' njoṅ benntùn fa bo be ntùm ndà là.

¹⁶ Ndùlala ndù nka' zin ké' mbwe benntùn ndù bo yen mfa' min mi mebwô, ngamte Tà zin z'a be mfe kamànyam nà.

Ntshù' Nsi mba ghatshob ntshob Nsi

¹⁷ Kà bin kwate ndù me se' nebagt'a ntshù' ke ghatshob ntshob Nsi lo, me ke se' à nebagte, là ndù me ghù a bumte.

¹⁸ Nummbe me tshob bin kua' nenùn ndù: Ntùm ntshù' Nsi, ta' i ke tsho' i lo ke nsi bi, njoṅ i fa nsi bumte kà kamànyam mba tsha' tôge.

¹⁹ Mèn z'a nsi bagte mo' netèt tshen bontsit ntshù' li, bèn tswite benntùn nebagte là, mba bo nsi tsiaṅ i metsit mèn ntùm nufen kamànyam; là mèn z'a nsi ze, bèn tswite neze là, mba bo nsi tsiaṅ i mèn ndùb ntùm nufen kamànyam.

²⁰ Nummbe me tshob bin ndù: A be ze zin nunetsin ke' tshùa ze ghalèn ṅwa'ni Nsi mba ba Férésia là, mba bin ke nsi tsho ntùm nufen kamànyam.

²¹ Bin lo ju' mba bo na' ntshob ba mbwe ndù: Kà zwi mèn; mèn z'a zwi mèn nà, mba bo a' tsho't'é ndàntsha là.

²² Là tu wul àm, me tshob bin ndù: Mèn z'a ya ntù num mfèl i là, mba bo a' tsho't'é ndàntsha; mèn z'a tshob mfèl i ndù: nkagni là, mba bo a' tsho't'é mbwe ndàntsha ndùb; mèn z'a tshob yi ndù mbabun nà, mba bo a' tsho'te ntsha i, ma' i ntùm dù' mbwôge.

²³ A be z'o lo' ju neghamte Nsi, nèn yi tômbwôge, nkum bwe, nkwimte ndù bin mfèl o ghù ntsha là,

²⁴ o faṅ ju neghamte Nsi mbwe tômbwôge, mbèn njam bin mfèl o be ntshu ntshù', k'o njôg nse' mfà yu ju neghamte Nsi.

²⁵ Nànte netsho shun bin ngakeban o ngelaṅ ze bin yi ke' num manze là, mbwôg ndù kà ngakeban o fà o ngatsho'te ntsha, ngatsho'te ntsha fà o ngabéb ndàtsha, a ma' o ndàtsha.

²⁶ Kua' nenùn me tshob wù ndù, o ke nsi tum bwe ke be ndù o fà nkàb tà nèn nkum num miagte keba.

²⁷ Bin lo ju' mba bo na' ntshob ndù: Kà ghù màndà.

²⁸ Là, tu wul àm, me tshob bin ndù: Mèn z'a lôte mènnzwi, nge't'é là, mb'a ghù màndà bo yi ntùm ntù i.

²⁹ A be ze lag so se zwim ghù ndù o vù ntùm ywi' là, o tsho' i, ngua' ngùanesà mbaṅ o, nummbe a b'a mebwô wù nebi kam wul o, ntshùa mba be bo ma' njoṅ wul o fa ntùm mbwôg là.

³⁰ A be ze bu o ze zwim ghù ndù o vù ntùm ywi' là, o keb i, ngua' ngùanesà mbaṅ o, nummbe a b'a mebwô wù nebi mo' kam wul o, ntshùa mba be njoṅ wul o fa, nèn ntùm mbwôge, mbi là.

³¹ Bo lo bèn ntshob mba ndù: Mba we lo z'a sô nzwi i là, a fà ṅwa'ni nefagte nandà yi.

³² Là tu wul àm me tshob bin ndù: Mèn z'a sô nzwi i, k'a ke b'a nda' num yôg kat là, mb'a tsiagt'é nte num manze màndà. Mèn z'a so mènnzwi ze ndu i sô i là, mb'a ghù màndà.

³³ Bin lo bèn nju' mba bo na' ntshob ba mbwe ndù: Kà kàn mfe tatte, là ghù ju z'o kàn mfe num bwe mbwe Tshùaben nà.

³⁴ Là tu wul àm me tshob bin ndù: Kà kàn mfe mba ntshù', ke kamànyam no, nummbe a b'a ko'fen Nsi;

³⁵ ke tsha' lo, nummbe a b'a kamnko' dù' z'a be nte nku mi là; ke Yérusalém no, nummbe a b'a ngô mfen ndùb.

³⁶ Kà bèn nkàn mfe mba num tu o, nummbe o ke' ku' neghù ntàn nyiaṅtu fôg ke neghù a sèn no.

³⁷ A bwô ndù ntshob min ke mb'a ndù: Ṅ, ṅ, nga, nga; ju z'a bèn nkwi'te bwe là fe à mèn kebwô.

³⁸ Bin lo ju' mba bo na' ntshob ndù: Lag num lag, sô num sô.

³⁹ Là tu wul àm, me tshob bin ndù: Kà bin ta tu mbwe mèn kebwô, là, a be ze mèn lab toṅ o ze zwim nà, o tswite mba ze kwéb yi.

⁴⁰ A be ze mèn tshwèt ndiag o ntsha num nesô nzwe o ze ntùm bwe là, o faṅ mba ze num tù yi.

⁴¹ A be ze mèn tshwèt nànt'o ndù bin yi zin nku ntsha' mbùm nà, o zin nku ntsha' bàa bin yi.

⁴² Mèn z'a lon ju wù là, o fà yi; ke kaṅ wul o mbwe mèn z'a tshwèt ndiag ndù o tshwé' ju yi là.

⁴³ Bin lo ju' mba bo na' ntshob ndù: Ke nkô mèn z'a ghebte mbaṅ o là, nke mbàn ngakeban o là.

⁴⁴ Là tu wul àm me tshob bin ndù: Bin kô ghakeban tsine, nke nde'te Nsi tu ben tse bo tshwèt ntsho' nku min kebàn nà,

⁴⁵ ndù bin tù' bon Tà zin z'a be mfe kamànyam nà; nummbe a be ngù nyam i tà num ben kebwô mba ben mebwô, ngù mbaṅ i lo num ben netsine mba tse ketsin.

⁴⁶ A be ze bin ke nkô ben tse bo num nkô zin nà, mba ntsho'fa' min nsi b'a ke? Mba ghakwéfé' ke' be ghù yub be ndaṅndaṅ ké?

⁴⁷ A be ze bin be ntsha't'a nda' fèt tsin nà, mba nu ke to' yen ze bin ghù là b'a ke? Mba ghakelèn Nsi ke' be ghù yub be ndaṅndaṅ ké?

⁴⁸ Ndùlala bin bwô miagte mba Tà zin mfe kamànyam bwô miagte là.