Matio 4 - NTSHOB NSI

Mba Satan laṅte Yésu là

¹ Ywèt Nelàn lo' Yésu nèn yi kônkwa ndù Satan laṅt'é.

² A tswe ke jù ju lé'njù ṅam nkuà, mbwôgtshù mba tèttswe'; yen nà lo be tshùa, nziku' ya i.

³ Ngalaṅte se' ntèl i, ntshob yi ndù: A be z'o b'a Mén Nsi là, o tshob ndù men ndoṅ ni kaṅ ntù' bàn.

⁴ Là, a bùnte ntshob ndù: Bo lo kite ndù: A ke nda' bàn bèn ghù mènntùn yôge, là, a ke ntswe ntùn à num ntshob mi a num ntum ntshu Tshùaben nà.

⁵ Satan lo' i nèn yi ntùm ngô nelàne, nte i mfe num tu Ndà Nsi,

⁶ ntshob yi ndù: A be z'o b'a Mén Nsi là, o tsho' ngwù mànsi, nummbe bo lo kite ndù: A nsi tshob ba Angél tse num o, bo nsi kel o mum mbu mube, ndù k'o tsho' ku o num loṅ.

⁷ Yésu tshob yi ndù: Bo lo nkite mba ndù kà laṅte Tshùaben Nsi o.

⁸ Satan bèn ndo' i nèn yi num tu mbat z'a sag neshu là, nda'te njoṅ nufen njù fa yi mba nkuni mi,

⁹ ntshob yi ndù: A be z'o vù nsi mbwe àm, ngamt'àm nà, mba me nsi fà njoṅ tshen tshu li fa wù.

¹⁰ Yésu tshob yi ndù: Satan, lo njam àm, nène! Nummbe bo lo kite ndù: O nsi ke vù nsi, ghamte Tshùaben Nsi o, ke fa' fa' be nda' yi tù' i.

¹¹ Satan faṅ i nène; ba Angél se' ntèl i, nke mfa' yi.

Mba Yésu to' fa' ntsiaṅ mbwe bônke' tse là

¹² Ngelaṅ Yésu ju' ndù bo tshùb Yohané là, a tum, nèn Galiléa.

¹³ A lo Nazarèt nèn Kapernaum z'a be kaṅ dibantse ntùm bag ngô Zabulon mba Néftali là, nke ntswe bwe,

¹⁴ ndù men ntshob li mi Esaya ngatshob ntshob Nsi na' ntshob là bumte ndù:

¹⁵ Tsha' Zabulon mba tsha' Néftali, ts'a be kaṅ dibantse, mo' yoṅ Yordan, Galiléa ghakelèn Nsi là,

¹⁶ benntùn tse bo ke ntswe ntùm ngô mba ntùm netshaṅ vù là, yen mà làne ndùb.

¹⁷ Fe yen ngelaṅ nà, Yésu to' netshob ntshob Nsi, ntshob ndù: Bin kaṅ ntù tsine, nummbe nufen kamànyam à ghebte!

¹⁸ Mb'a *gi*na' nke nkatte kaṅ dibantse Galiléa là, a yen tsemo' fètfèt bàa, Simon ze bo ke ntsiaṅ i Pétro là, mba Andréa mfèt Simon, bo nke ma' mbunjà ntùm dibantse, nummbe bo na' mb'a ghaghom ngontse.

¹⁹ A tshob bo ndù: Bin tam njam àm, me nsi ghù bin tù' ghaghom benntùn.

²⁰ Be ndùse, bo faṅ mbunjà, ntam njam i.

²¹ A lo nsen ni, nèn mbwe, njen tsemo' fètfèt bàa, Yakobo mén Zèbèdéo, mba Yohané mfèl i, ntùm kenu boa Zèbèdéo tà yub, bo nke nkwitte mbunjà mube.

²² Be ndùse bo faṅ kenu mba tà yub, ntam njam i.

²³ Yésu nke nzin ntùm ngô Galiléa fa, nke ntswite ntùm ba sinagogue tshobe, nke ntshob nkùn mebwô nufen Nsi, nke njate njoṅ ngokèt fa, mba njoṅ lo' nzenze fa netèt benntùn.

²⁴ Bo ju' tshô i ntùm njoṅ ngô Siria fa. Bo lo' njoṅ benntùn fa tse bo na' ntswe kebwô, ngù ngokèt nzenze mba lo' yàme, ghaghù ywèt kebwô, ghaghù wà'à mba ba kekat là, nse' yi, a yate yube.

²⁵ Bwoṅ benntùn yàm tam njam i, fe Galiléa, Dékapol, Yérusalém, Yudéa, mba mo' yoṅ Yordan.