Matio 28 - NTSHOB NSI

Mba Yésu lo num vù là

¹ Sabbat lo tôge, a be nkebnjù mbwe lé'njù ntùm ngabnjù, Maria ze Magdala mba mo' Maria se' nelôte fi.

² Tshù, tsha' nyi'te kua' yàme, nummbe Angél Tshùaben lo swe' kamànyam, mbwoṅte loṅ, ntswe num bwe,

³ nke ṅwa'ṅwa' mba lagnyam, nzwe i nke mfôg mba mbem nà.

⁴ Yen nà ghù ghabéb fi bwôg, mvèle, ntù' mba ben nekwù là.

⁵ Là Angél tshob men ntshob li bènnzwi ndù: Kà bin bwôg, nummbe me lèn ndù bin ke ndiag à Yésu ze bo kwimt'é num fanta'tù là.

⁶ A ke b'a nsen ni, nummbe a bam num vù mb'a na' ntshob là. Bin se' njen dù' ze bo na' njab i là.

⁷ Bin nèn ndende, ntshob ghazi'te nu i ndù a lo num vù; tshù, a' kwé mbwe bin mà Galiléa, a bwe là ze bin yen i là. A nu ze me ghù netshob bin nà.

⁸ Bo lo mbaṅ fi, nèn ndende ntùm bwôg mba tsiaṅte ndùb, nkù nde nèn nsoṅ ghazi'te nu i yen tshô là.

⁹ Tshù, Yésu bumte boa tshen bènnzwi là ntshob ndù: Me tsha'te zine! Bo se' mbaṅ i, ngwù nsi kabkab, ntshùb nku mi, ngamt'é.

¹⁰ Yésu tshob bo ndù: Kà bin bwôg, bin nèn ntshob fèt tshàm ndù bo nèn Galiléa, a bwe là ze bo nsi yen àm nà.

¹¹ Ngelaṅ bo nèn nà, tshù, tsemo' ghabéb fi se' ntùm ngô, nsoṅ ghale'te Nsi tse ndùbndùb njoṅ nu fa ts'a tôg là.

¹² Bo kùmte, ngù ntse'te boa ghakwé mbwe, mfà nkàb yàm ba soyé,

¹³ ntshob ndù: Bin ke ntshob: Ghazi'te nu i se' tèttswe' ngelaṅ bag ke nzi là, njé fe i.

¹⁴ A be ze yen nu là nèn tà nkum toṅ ngomna là, mba bag a' fite ntù i, nsô zin ntùm nu.

¹⁵ Bo kwé nkàb ngù be ndaṅndaṅ mba bo tswite bo là. Men ntshob là sa netèt ba Yuda tà nse' nkum sènni.

Mba Yésu tèt ghazi'te nu i mà Galiléa

¹⁶ Ghazi'te nu Yésu tse ntshob ntshù' gham nèn Galiléa num mbat dù' ze Yésu na' ntshob bo ndù bo nèn bwe là.

¹⁷ Bo be yen i, ngwù nsi kabkab ngamt'é, là tsemo' nke magte.

¹⁸ Là Yésu se' mbaṅ bo ntshob men ntshob li bo ndù: Nsi fà njoṅ ngù' fa me fe kamànyam mba num nsitsha'a.

¹⁹ Ndùlala, bin nène, ngù njoṅ nzwit benntùn fa tù' ghazi'te nu àm, bin nyu' yub ntse num lén Tà mba Mén mba Ywèt Nelàne,

²⁰ bin tswite yub neze njoṅ tshu fa tse me na' ntshob bin nà. Tshù, bag à bin bèn ke be njoṅ lé'njù fa, tà kum miagte njù.