Matio 27 - NTSHOB NSI

¹ Là, fe nkebnjù, njoṅ ghale'te Nsi tse ndùbndùb fa, mba ghakwé mbwe ntùm ngô ghù ntse'te num Yésu, ndù bo zwi i.

² Bo ghù bo kul i, nèn mfà Pilato ngomna.

Vù Yuda

³ Là Yuda mèn z'a swèn i là, be yen ndù bo keb ntsha ndù bo zwi Yésu, nywin neshu, nèn mba' silba ṅam ntat ghale'te Nsi tse ndùbndùb mba ghakwé mbwe;

⁴ ntshob ndù: Me lo fàn nu, nswèn lem ts'a làn nà. Là bo tshob yi ndù: A nu ke nsen ni à? A ke yag nu!

⁵ Yuda ma' silba là ntùm Ndà Nsi, ntume, nèn nget mbi.

⁶ Là ghale'te Nsi tse ndùbndùb lo' silba là, ntshob ndù: Ntshù' ke' bam ndù be ma' lèn yen silba li ntùm koṅ nkàb, nummbe a b'a nkàb lem.

⁷ Bo ghù ntse'te, nabte netèt bo ndù bo jun dù' tsha' ngatetsha' yi ndù bo ke ntshoṅ ba ghùn bwe.

⁸ A ndùlala bo tsiaṅ yen dù' tsha' là ndù tsha' lem, tà nkum sènni.

⁹ Ndùlala men ntshob li mi Yérémia ngatshob ntshob Nsi na' ntshob là, bumte ndù: Bo lo' silba ṅam ntat, nkàb mèn z'a tanjoṅ, ze bon Israél ta i là,

¹⁰ mfà num dù' tsha' ngatetsha'a, mba Tshùaben na' ntshob là.

Yésu mbwe Pilato

¹¹ Là Yésu tsin mbwe ngomna, ngomna bètt'é, ntshob ndù: O b'a mfen ba Yuda ké? Là Yésu tshob ndù: O tshob.

¹² Mba ghale'te Nsi tse ndùbndùb mba ghakwé mbwe ke ntete nu num i yàm nà, a ke bùnte sàm nu.

¹³ Pilato tshob yi ndù: O ke' ju' ba kwénta fa tse bo tshwèt njab num o là ké?

¹⁴ A ke bùnte sàm nu yi num njoṅ nu fa; yen nu là tshùa Pilato neshu.

¹⁵ Njoṅ lé'njù jùa fa, a lo be matnu ndù ngomna sô ta' ngandàtsha ze bwoṅ benntùn kô là, mfà bo.

¹⁶ Bo lo ghù mo' ngandàtsha ze bo ke ntsiaṅ i Baraba là, ze lén se ju'ni là.

¹⁷ Là ngelaṅ bo tse'te là, Pilato tshob bo ndù: We ze bin kô ndù me sô i à, Baraba ke Yésu ze bo ke ntsiaṅ i Kristô l'à?

¹⁸ Nummbe a lèn ndù ghe'te yub bèn ngù kà bo mfà i.

¹⁹ Ngelaṅ z'a tswe ntùm diaṅntsha là, nzwi i tum bo tshob yi ndù: Kà tsho ntùm ntsha yen mèn netsin nà, nummbe me yen nge' neshu num i sènni ntùm njem.

²⁰ Ghale'te Nsi tse ndùbndùb mba ghakwé mbwe tènte bwoṅ benntùn ndù bo bètte Baraba, ngù bo zwi Yésu.

²¹ Là ngomna bùnte, ntshob bo ndù: We ze bin kô i netèt ben bàa à? Bo tshob ndù: Baraba.

²² Pilato tshob bo ndù: M'a' ghù ke Yésu ze bo ke ntsiaṅ i Kristô à? Njoṅ yub fa tshob ndù: Ghù bo kwimt'é num fanta'tù.

²³ Là, a tshob ndù: Nukebwô z'a ghù b'a ke? Bo bèn nkua' neta, ntshob ndù: Ghù bo kwimt'é num fanta'tù.

²⁴ Là Pilato be yen ndù yen nu là ke' ywimt'é sàm ju, mba ndù tshu'te tshwèt njam nèn be mbwe, ndo' ntse, nsôg mbu mi mbwe bwoṅ benntùn, ntshob ndù: Me b'a nelàn num tshen lem nà. A ke yàm nu.

²⁵ Njoṅ benntùn fa bùnte, ntshob ndù: Lem tse tsho tu bag mba tu bon tshage.

²⁶ Ndùlala, a sô Baraba, mfà bo, ngù bo lab Yésu nshua'a, a fà i ndù bo kwimt'é num fanta'tù.

²⁷ Ba soyé ngomna lo' Yésu nèn yi ntshundà ngomna, ntse'te njoṅ soyé fa mbaṅ i.

²⁸ Bo sô nzwe tse, ma' kummbaṅ meba num i,

²⁹ mbèn nte tshe' se bo lo' njô mba' yi là tu i, mfà nka'nesoṅ ntùm bu i ze zwim, nkwim ntunkekwi' mub nsi mbwe i, ntsha't'é, ntshob ndù: Bag tsha't'o me mfen ba Yuda,

³⁰ ntôg nkekùà num i, nkwé nka'nesoṅ ndab tu i yi.

³¹ Ngelaṅ ze bo miagte netshabt'é là, bo sô kummbaṅ, ma' nzwe tse num i, ndo' i nèn yi ndù bo kwimt'é num fanta'tù.

Mba bo kwimte Yésu num fanta'tù là

³² Bo be tume, njen mo' ze Kiréna, lén se Simon, bo tshùb i, ndù a ket fanta'tù Yésu.

³³ Ngelaṅ bo kum dù' ze bo ke ntsiaṅ ndù Gôlgota, a b'a ndù dù' nkatu.

³⁴ Bo fà ndu' mi bo ma' zwetshù'tshù' bwe là yi ndù a nu. A zwi'te ke kô nenu.

³⁵ Ngelaṅ bo miagte nekwimt'é là, bo lo' nzwe tse ntam tô yi.

³⁶ Bo tswete nsi, nke mbéb i bwe.

³⁷ Bo kite tunu z'a kwù bwe là, ntaṅ num tu fanta'tù ndù: Yen mèn ni b'a Yésu mfen ba Yuda.

³⁸ Bo kwimte Yésu boa fimntshu bàa, mo' num bag bu i ze zwim, mo' num ze kwéb.

³⁹ Ben tse bo ke ntshùa bwe là, tshabt'é, nyi'te tu,

⁴⁰ ntshob ndù: Wù z'o sate Ndà Nsi, bèn kul i mum lé'njù tat là, yôg tu wul o, a be z'o b'a Mén Nsi là, nswe' num fanta'tù.

⁴¹ Ghale'te Nsi tse ndùbndùb boa ghalèn ṅwa'ni Nsi mba ghakwé mbwe tshabt'é, ntshob ndù:

⁴² A lo ke njôg à tsemo' ben, a ke' ku'ni neyôg tu wul i. A b'a mfen ba Israél, a swe' num fanta'tù ndonni, mba bag à bam i.

⁴³ A lo yab ntù i num Nsi, a kwé i ndonni, a be z'a kô i là, nummbe a lo tshob ndù: Me b'a Mén Nsi.

⁴⁴ Be ndaṅndaṅ mba ba fimntshu tse bo kwimte yub bo à bo num fanta'tù là, nke ntshabt'é.

⁴⁵ Fe njagnyam, njam sèn ntùm njoṅ dù' fa tà nèn nkum nyam tat.

⁴⁶ A be be nguan nyam tat, Yésu kua' nze neta, ntshob ndù: Eli, Eli, lama sabaktani. A b'a ndù: Nsi àm, Nsi àm, o ghua' àm numke?

⁴⁷ Tsemo' ben netèt tse bo be bwe là be ju'u, nke ntshob ndù: Yen mèn ni tshwèt ntsiaṅ Elia.

⁴⁸ Be ndùse, mo' mèn netèt bo kù nde, ndo' ntsha nzwe, ntshù' ntùm tshùagkèt ndu', mfét tu nka'nesoṅ, mfà yi ndù a nu.

⁴⁹ Là tsemo' nke ntshob ndù: Faṅ nà be yen a be ze Elia se' njôg i là.

⁵⁰ Yésu bèn nkua' kua' neta nkwù.

⁵¹ Tshù, nzwe Ndà Nsi bèt bag bàa fe tù nèn nkum mànsi, tsha' nyi'te, ndoṅ bagte,

⁵² ba fi gha' nte nge, wut ben nelàn yàm tse bo kwù là bam num vù,

⁵³ bo tum ntùm fi ngelaṅ a bam num vù là, nèn ntùm ngô, ntswite wut tshob benntùn yàme.

⁵⁴ Là tà ba soyé mba ben tse bo à bo ke mbéb Yésu là be yen mba tsha' nyi'te mba tshu ts'a tshùa là, mbwôg neshu, ntshob ndù: Kua' nenùne, yen mèn ni na' mb'a Mén Nsi.

⁵⁵ Mba bènnzwi yàm lo be yub bwe, ntsin ngùanesà nke ndôte mfe bwe; tshen nà tse bo na' mbwe Yésu fe Galiléa, nke mfa' yi là.

⁵⁶ Maria ze Magdala, Maria mà Yakobo mba Yosèf, mba bon Zèbèdéo lo be netèt bo.

Mba bo tshoṅ Yésu là

⁵⁷ Njù be sène, mo' mèn, ngankàb, ze Arimatia, lén se Yosèf, z'a na' ntù' ngazi'te nu Yésu là,

⁵⁸ se', nèn ntèt Pilato, ndon i fe Yésu. Pilato tshob ndù bo fà yi.

⁵⁹ Yosèf lo' fe Yésu, ndam i nzwe nelàne,

⁶⁰ njab i ntùm fi se se nswe s'a na' nabte ntùm loṅ nà, mbwoṅte mo' loṅ, nkabte ntshu fi, nène.

⁶¹ Là Maria ze Magdala mba mo' Maria lo be bwe, ntswe nsi mbwe fi.

⁶² A be mbatte lé'njù, mba lé'njù nenabte tôg là, ghale'te Nsi tse ndùbndùb mba ba Férésia tse'te mbaṅ Pilato,

⁶³ ntshob yi ndù: Tshùaben, bag kwimte ndù yen ngatatte là lo tshob ngelaṅ z'a ke' ntùn nà ndù: A nsi be tshùa lé'njù tat, a lo num vù.

⁶⁴ Ndùlala, tshob bo béb fi tà nkum lé'njù tat, mbwôg ndù kà ghazi'te nu i se' njé fe i, ntshob benntùn ndù: A lo num vù; mba miagte tatte nsi bag tshùa mbwe i.

⁶⁵ Pilato tshob bo ndù: Tshù ba soyé là! Bin lo' yub nèn ngù bo béb fi mba bin lèn nà.

⁶⁶ Bo nèn, njab ghabéb fi bwe, nte sitam num loṅ.