Matio 25 - NTSHOB NSI

Tànkùt ngonngon gham

¹ Nufen kamànyam nsi fut'a ngonngon gham tse bo na' ndo' ndambo mube, ntum nèn nebumte boa ndungon nà.

² Tse tàn netèt bo na' mb'a ghafemni, tse tàn be ghazete.

³ Nummbe ghafemni là lo lo' ndambo ke lo' mfèt.

⁴ Là ghazete lo' mfèt ntùm ntshaṅ boa ndambo mube.

⁵ Mba ndungon be se' nsèn nà, njoṅ yub fa me' miaglo, nzi.

⁶ Là, a be tshaṅ tèttswe', mo' tshu'te tum, tshob ndù: Tshù ndungon nà, bin tum nèn bin à bo bumte.

⁷ Njoṅ ngonngon nà fa lo num miaglo, nabte ndambo mube.

⁸ Là femni tse tshob ghazete ndù: Bin fà mag mfèt num mine, nummbe mag ndambo tshwèt mbi.

⁹ Là ghazete bùnte, ntshob ndù: Nga, bag fà bin, mb'a bwoṅ bag mba bin. A bwô ndù bin nèn la' ghaswèn mfèt, njun min bo.

¹⁰ Ngelaṅ bo ke nèn nejun nà, ndungon se', tshen nà tse bo be tswe nke mbéb là tsho ndà nandà bo à bo; bo fùn nzendà.

¹¹ A be ghubte mba tsemo' ngonngon nà se' yub, ntshob ndù: Tshùaben, Tshùaben, ghab nzendà bag.

¹² Là, a bùnte ntshob ndù: Kua' nenùne, me tshob bin ndù: Me ke' lèn zine.

¹³ Ndùlala bin zi tshùalo, nummbe bin ke' lèn lé'njù ke nyam lo.

Tànkùt talaṅto

¹⁴ A bèn mbe à mba mo' mèn z'a be nèn nkatte, ntsiaṅ ghafa' tse, ndé' tshu tse bo là.

¹⁵ A lo fà talaṅto tàn mo', mfà talaṅto bàa mo', mbèn mfà talaṅto ntshù' mo'; mfà mba we lo be mb'a ku'ni num i là, nène.

¹⁶ Be ndùse, mèn z'a kwé talaṅto tàn nà nèn, nta, njù tsemo' tse tàn.

¹⁷ Be ndaṅndaṅ mèn z'a kwé bàa là, nèn nta, njù tsemo' tse bàa.

¹⁸ Là mèn z'a kwé talaṅto ntshù' là nèn, ntswe' tô ntùm tsha'a, ndem nkàb tàab bwe.

¹⁹ A be tshùa ngelaṅ yàme, tà tshen ghafa' là se', siaṅte tshu tse ts'a lem bo là.

²⁰ Mèn z'a kwé talaṅto tàn nà se' mbaṅ i, mfà tsemo' talaṅto tàn yi, ntshob yi ndù: Tà, o lo fà talaṅto me tàn; tshù, me ta njù tsemo' talaṅto tàn.

²¹ Tàfa' tshob yi ndù: A bwô me ngafa' mebwô, o b'a mèn nenùne, mb'o be mèn nenùn num bontsit tshu là, me nsi faṅ tshu yàm wù, o ke ndé'é. Se' ntsho ntùm tsiaṅte tàan.

²² Mba mèn z'a kwé talaṅto bàa là se' ze, ntshob ndù: Tà, o lo fà talaṅto me bàa, tshù, me ta njù tsemo' talaṅto bàa.

²³ Tàfa' tshob yi ndù: A bwô me ngafa' mebwô, o b'a mèn nenùne; mb'o be mèn nenùn num bontsit tshu là, me nsi faṅ tshu yàm wù, o ke ndé'é. Se' ntsho ntùm tsiaṅte tàan.

²⁴ Mèn z'a kwé talaṅto ntshù' là se' ze, ntshob ndù: Tà, me lo lèn ndù o b'a ngakubte z'a be ntsho' tshu dù' z'a be ke ywit là, z'a be ntse'te tshu dù' z'a be ke yag là.

²⁵ Me lo bwôg tshàm, nèn ndem talaṅto o ntùm tsha'a, tshù ju z'a be yu li!

²⁶ Tàfa' bùnte, ntshob yi ndù: Ngafa' ze kebwô, o b'a ndô, o lo lèn ndù me be ntsho' tshu dù' ze me be ke ywit là, nke ntse'te tshu dù' ze me be ke yag là,

²⁷ a lo bwô ndù o fà nkàb àm ben tse bo num ndé' nkàb là, mba me be bèn njam, nsô boa bin i.

²⁸ Ndùlala, bin kwé talaṅto là yi, mfà mèn z'a ghù talaṅto gham nà.

²⁹ Nummbe bo nsi fà mèn z'a ghù là, a ghù ntshùate; là mèn z'a ke' ghù là, bo a' kwé mba z'a ghù là yi.

³⁰ Mbe se' mba ngafa' z'a ke' ywimte là, bin ma' i njù ntùm dù' njame. Nekua' mba nefèt nsô nsi be yen dù' là.

Netsho'te ntsha mànjam

³¹ Là ngelaṅ Mén mèn nsi se' ntùm nkuni mi boa njoṅ Angél fa là, a tswe num ko' nkuni mi.

³² Njoṅ nzwit benntùn fa nsi tse'te mbwe i, a fagte yub bag bag mba ngabéb mbwe be mfagte njùmbwe boa fot là,

³³ njab njùmbwe num bag bu i ze zwim, njab ba fot num bag bu i ze kwéb.

³⁴ Mfen nsi tshob ben tse bo be num bag bu i ze zwim nà ndù: Bin se'e, bin ghambotni Tàa, njù nufen se bo na' nabte bin fe ngelaṅ nenabte njù be là;

³⁵ nummbe nziku' lo ya àm, bin fà jujù me; ntù àm kù, bin fà ntse me; me lo be ngùn, bin lo' àm ndà;

³⁶ mbe tunntôg, bin se' nzwe me; nke ngone, bin se' ndôt'àm; mbe ndàtsha, bin se' mbaṅ àm.

³⁷ Là ben netsin nsi bùnte tshob yi ndù: Bag na' njen o à zit ngelaṅ nziku' ya o, bag fà jujù wù, ntù o kù, bag fà ntse wù à?

³⁸ Bag na' njen o à zit ngelaṅ o be ngùn, bag lo' o ndà, o be tunntôg, bag fà nzwe wù à?

³⁹ Bag na' njen o à zit ngelaṅ o nke ngone, ke ndàtsha lo, bag se' mbaṅ o à?

⁴⁰ Mfen nsi bùnte tshob bo ndù: Kua' nenùne, me tshob bin ndù: Njoṅ ngelaṅ fa ze bin na' ngù num mo' mèn netèt tshen bontsit fèt tshàm tse nke'nke' li là, bin na' ngù à num àm.

⁴¹ A nsi tshob ben tse bo be num bag bu i ze kwéb là ndù: Ghandon, bin lo mbaṅ àm, nèn ntùm mbwôg z'a tswe yoṅ ntshù', ze bo na' nabte njab Satan mba angél tse là.

⁴² Nummbe nziku' lo ya àm, bin ke fà jujù me; ntù àm kù, bin ke fà ntse me;

⁴³ me lo be ngùn, bin ke lo' àm ndà; mbe tunntôg, bin ke fà nzwe me; me lo ke ngone, mbe ndàtsha, bin ke se' ndôt'àm.

⁴⁴ Mba bo yub nsi bùnte tshob ndù: Tshùaben, bag na' njen o à zit ngelaṅ nziku' ya o, ntù o kù, o be ngùn, mbe tunntôg, nke ngone, mbe ndàtsha bag ke fa' wù à?

⁴⁵ Là, a nsi bùnte bo, tshob ndù: Kua' nenùne, me tshob bin ndù njoṅ ngelaṅ fa ze bin na' mbe ke ghù mo' netèt tshen tse nke'nke' li là, bin na' mbe ke ghù à num àm.

⁴⁶ Tshen ben ni nsi nèn ntùm nge' yoṅ ntshù', là ben netsin nèn ntùm yôg matmat.