Matio 24 - NTSHOB NSI

Nesate Ndà Nsi. Miagte ngelaṅ

¹ Yésu tum Ndà Nsi, nke nène, ghazi'te nu i se' mbaṅ i, nda'te mba bo kut Ndà Nsi là yi.

² Yésu bùnte bo, ntshob ndù: Bin tshwèt njen tshen tshu là; kua' nenùne, me tshob bin ndù: Bo ke nsi faṅ loṅ nsen ni ke sate.

³ Là ngelaṅ a tswe nsi num mbat ntene, ghazi'te nu i se' mbaṅ i tù' bo ntshob ndù: Soṅ yag ngelaṅ tshen tshu là nsi bumte là, mba lèn z'a nsi la'te ngelaṅ z'o nsi se' ntùm ghamt'o mba miagte njù là.

⁴ Yésu bùnte ntshob bo ndù: Bin bam nà, kà mèn fùte zine,

⁵ nummbe benntùn yàm nsi se' lo' lén sàm, tshob ndù: A b'a me bèn mbe Kristô, bo nsi fùte benntùn yàme.

⁶ Bin nsi ju' nu ntsho mba tshu'te ntsho, bin bam nà, kà bin vètte; nummbe a bwô tshen tshu là se'e, là, a ke' yoṅ mb'a miagte nu.

⁷ Nummbe mo' ngô nsi lo, ma' mo' ngô ntsho; mo' nufen nsi lo, ma' mo' nufen ntsho; nziku' nsi be, tsha' bèn nyi'te ntùm dù' nzenze.

⁸ Njoṅ tshen nà fa b'a neto'te ya.

⁹ Bo nsi tshùb zin fà ntùm nge', zwi zine, njoṅ ngô fa nsi bàn zin num lén sàm.

¹⁰ Benntùn yàm nsi vù ntùm ywi', bo nsi swèn wut tshob bo bo, bèn bàn bo bo.

¹¹ Ghatshob ntshob Nsi tatte yàm nsi lo, fùte benntùn yàme.

¹² A nsi tshùa mba nukebwô nsi ke yàm nèn mbwe là, nkôni benntùn bole.

¹³ Là mèn z'a nsi fènte tà nèn miagte là, mba yen mèn nà nsi yôge.

¹⁴ Bo nsi tshob yen nkùn mebwô nufen Nsi là ntùm njoṅ njù fa, ndù a be ju nekwé nta njoṅ ngô fa kà miagte nu se'e.

¹⁵ Ngelaṅ bin nsi yen nebagte mba nesate tsin dù' z'a lo mbe ke bwô ndù a tsin bwe mba ngatshob ntshob Nsi Daniel na' ntshob là; wù z'o tshwèt nsiaṅ nà, ju' mebwô,

¹⁶ a bwô ndù ben tse bo be Yudéa là kù nèn num mbale,

¹⁷ mèn z'a be mfe num tuba' là, k'a zwe' ntsho ndà i num nelo' ju z'a nèn yi là;

¹⁸ mèn z'a be mà tshwèt là, k'a bèn njam num nelo' kummbaṅ se.

¹⁹ Bènnzwi tse bo be jùm nà mba tse bo tshwèt nyô bon nà nsi b'a ntùm nge' num tshen lé'njù là!

²⁰ Bin le'te Nsi ndù kà zin nekù se' à ngelaṅ ndù sàne mba lé' Sabbat.

²¹ Nummbe nge' ndùb nsi be, nge' ze mèn ke' yoṅ nto' yen lèn i fe ngelaṅ Nsi nabte njù tà nkum ndonni, mbe ndù lèn i ke nsi bèn be là.

²² A be ze bo ke' sébte tshen lé'njù là là, mba sàm mènntùn ke nsi yôge. Là, a tshùa num ben ts'a tsho' yub là, nsébte tshen lé'njù là.

²³ Là, a be ze mèn tshob bin ndù: Tshù, Kristô b'a nsen ni, tshù, a b'a nsen nà là, kà bin bam.

²⁴ Tsemo' benntùn nsi lo, tatte tshob ndù bo b'a Kristô, tsemo' bèn ntshob ndù bo b'a ghatshob ntshob Nsi; bo nsi ghù nsà ndùbndùb mba nu netshàme, kà fùte mba ben tse Nsi tsho' yub là, a be ze bo ku'ni là.

²⁵ Tshù, me bwôgmbwe nsoṅ zin yen nu là.

²⁶ A be ze bo tshob bin ndù: Tshù, a b'a kônkwa, kà bin nèn bwe. Tshù, a b'a ntùm to'ndà, kà bin bam.

²⁷ Ndaṅndaṅ mba beba'mbaṅ be ntum bag ntumnyam, nké' tà nèn nkum bag mbinyam nà, a b'a mba Mén mèn nsi se' ntùm ghamt'é là.

²⁸ Dù' ze fe ju be bwe là, mba ghammàtat nsi bumte bwe.

²⁹ Là nge' tshen lé'njù là nsi yoṅ be mi, lagnyam sène, maṅwù ke bèn mfà nka' i, nsà mfe kamànyam nsi vùte nsi, neta mfe kamànyam bèn nyi'te.

³⁰ Yen ngelaṅ nà, lèn z'a nsi la'te Mén mèn nà nsi tume, nké' mfe kamànyam; njoṅ nzwit benntùn fa nsi lab ntù yub mbu, yen Mén mèn se' num ndot kamànyam boa neta mba nkuni yàme.

³¹ A nsi tum ba Angél tse boa tshu'te nta ndùb, bo nsi tse'te ben ts'a tsho' yub là, num bag njù kuà, fe num mo' tôg kamànyam nèn nkum mo' tôg i.

³² Bin zi'te yen nu li, ndo' mfi' num nga'lone; ngelaṅ nkaṅ mi tshwèt mfite, mfu mi tum nà, bin num ndèn ndù dum ghebte.

³³ Be ndaṅndaṅ, mba bin zin, ngelaṅ bin nsi yen njoṅ tshen tshu là fa là, bin lèn ndù a ghebte nzendà.

³⁴ Kua' nenùne, me tshob bin ndù: Yen zwiaṅ benntùn ni ke nsi tôge, ke be ndù njoṅ tshen tshu là fa se'e.

³⁵ Kamànyam mba tsha' nsi tôge, là ntshob màm ke nsi tôge.

³⁶ Mbe se' mba sen lé'njù là ke nyam lo, sàm mèn ke' lèn, mba ba Angél mfe kamànyam, mba Mén mèn, là nda' Tàa tù' i.

³⁷ Ndaṅndaṅ mb'a na' mbe num tse lé'njù Noa là, a nsi bèn be be ndaṅndaṅ ngelaṅ Mén mèn se' ntùm ghamt'é là.

³⁸ Ntùm tshen lé'njù là ts'a be kà tse dibambaṅ nse' là, benntùn lo ke njù, nu, nso bènnzwi, mfà ngonngon tshob ntùm nandà tà nèn nkum lé'njù se Noa tsho ntùm kenu là;

³⁹ bo lo ke ju' sàm nu tà nèn nkum lé' se dibambaṅ se' nket njoṅ yub fa là: A nsi be be ndaṅndaṅ ngelaṅ Mén mèn se' ntùm ghamt'é là.

⁴⁰ Ben bàa nsi be mà tshwèt, bo lo' mo', mfaṅ mo'.

⁴¹ Bènnzwi bàa nsi ke gho' bàn, bo lo' mo', mfaṅ mo'.

⁴² Ndùlala bin zi tshùalo, nummbe bin ke' lèn lé'njù se Tshùaben se' là.

⁴³ Bin lèn yen nu li ndù: A be ze tàndà lèn nyam ze tshô nsi se' yi tèttswe' là, mb'a' zi tshùalo ke faṅ ndù bo to ndà i.

⁴⁴ A ndùlala, mba bin zin, bin be tswe, nke mbébe, nummbe Mén mèn nsi se' à num nyam ze bin ke' kwate ndù a' se' là.

⁴⁵ A zit ngafa' ze nenùne, mbèn mbe ngazete ze be tàfa' faṅ ba ndà i yi ndù a ke mfà jujù bo ngelaṅ i à?

⁴⁶ Ngafen b'a yen ngafa' là ze tàfa' nsi be bèn njam tèl i, a ke ngù ndùlala là.

⁴⁷ Kua' nenùne, me tshob bin ndù mb'a' faṅ njoṅ tshu tse fa yi, a nke ndé'é.

⁴⁸ Là, a be yen ngafa' ze kebwô li tshob ntù i ndù: Tàa nsi sène,

⁴⁹ nto' nelab tsemo' ghafa', njù, nu, boa ghabum ndu',

⁵⁰ tàfa' se' mum lé' s'a lo mbe ke ke mbéb là, mba num nyam z'a ke' lèn nà,

⁵¹ mfagt'é, njab ze bag i boa ghamfùm. Nekua' mba nefèt nsô nsi be yen dù' là.