Matio 2 - NTSHOB NSI

Ghalèn nsà

¹ Num ngelaṅ mfen Hèrodé, bo bwe Yésu Bétléhém mà Yuda;

² tsemo' ghalèn nsà bag ntumnyam se' Yérusalém, ntshob ndù: Mfen ba Yuda ze bo bwe i là yà? Nummbe bag lo yen sa se bag ntumnyam, bag se' à neghamt'é.

³ Hèrodé be ju' yen nu là, tu i tshu' mba njoṅ ba Yérusalém fa.

⁴ A tse'te njoṅ kamkam ghale'te Nsi fa mba ghalèn ṅwa'ni Nsi ntùm ngô, mbètte yub dù' ze bo nsi bwe Kristô bwe là.

⁵ Bo bùnte yi ndù: Bétléhém mà Yudéa; nummbe tshù ju ze ngatshob ntshob Nsi na' nkite li:

⁶ Wù Bétléhém ngô Yudéa, o ke' b'a metsit ngô netèt ngô ndùbndùb Yudéa, nummbe mfen z'a nsi tshagte, bèn béb bon tshàm ba Israél là, nsi tum à wù.

⁷ Ndùlala Hèrodé tsiaṅ ghalèn nsa ntùm tsham, mbètte yub ngelaṅ ze sa mbit tum nà,

⁸ ntum yub mà Bétléhém ntshob ndù: Bin nène, mbètte nu num yen mén nà kua' mebwô; ngelaṅ bin yen i là, bin soṅ àm mba me nèn ngamt'é yàm.

⁹ Bo ju' mba mfen tshob là ndo nène. Tshù, sa se bo na' njen bag ntumnyam nà, kwé mbwe bo; ngelaṅ a kum dù' ze mén be là, a tsin num tu yen ba' là.

¹⁰ Bo yen sa là ntsiaṅte kua' neshu,

¹¹ ntsho ndà, njen mén bo Maria màab nkwim ntunkekwi' mub nsi mbwe mén, ngamt'é, nga' mbàm mube, mfà nda' yi: Gol, labinda mba mire.

¹² Nsi tshob bo ntùm njem ndù kà bo bèn nèn mbaṅ Hèrodé, bo tshùa nze ghua mbèn njam ntùm ngô yube.

Nenèn Egipto

¹³ Ngelaṅ ze bo nèn nà, mo' Angél Tshùaben ṅwag Yosèf ntùm njem, ntshob ndù: Lo tù, ndo' mén mba màab nkù nèn Egipto, ntswe bwe tà nkum ngelaṅ me nsi tshob wù là; nummbe Hèrodé tshwèt ndiag mén nà nezwi i.

¹⁴ Yosèf lo tù, ndo' mén mba màab tèttswe', ntume, nèn Egipto.

¹⁵ A tswe bwe tà nkum ngelaṅ Hèrodé kwù là, ndù men ntshob li mi ngatshob ntshob Nsi na' ntshob num ze tu Tshùaben nà, bumte ndù: Me tsiaṅ mén àm, nsô i Egipto.

¹⁶ Là Hèrodé be yen ndù ghalèn nsa fùt'é, nja ntù neshu; ntum benntùn ndù bo nèn nzwite njoṅ bonfi fa tse bo be Bétléhém mba ntùm dù' ts'a ghebte mbaṅ Bétléhém nà, nto' num tse bo ghù ngu' bàa mba tse bo ke' ghù ngu' bàa là, ndaṅndaṅ mba ghalèn nsa soṅ i ngelaṅ nà.

¹⁷ Ndùlala men ntshob li mi Yérémia ngatshob ntshob Nsi na' ntshob là, bumte ndù:

¹⁸ Bo lo ju' mo' nze mà Rama, nekua' mba netam keshù' yàm neshu: Rashél ke ndàn bon tse, ke kô ndù mèn fite ntù i, nummbe bo ke' bèn mbe.

¹⁹ Ngelaṅ Hèrodé na' nkwù là, tshù mo' Angél Tshùaben ṅwag Yosèf ntùm njem Egipto, ntshob ndù:

²⁰ Lo tù, ndo' mén mba màab mbèn njam ntùm ngô Israél, nummbe ben tse bo na' nke nkô tu mén nà kwù.

²¹ Yosèf lo tù, ndo' mén mba màab mbèn njam ntùm ngô Israél.

²² Là, a be ju' ndù Arkélao tshwèt ntô Yudéa num dù' tàab Hèrodé, mbwôg nenèn bwe. Nsi tshob yi ntùm njem a tum nèn bag ngô Galiléa,

²³ nkum bwe, nke ntswe ntùm mo' ngô lén se Nazarèt, ndùlala ndù men ntshob li mi ngatshob ntshob Nsi na' ntshob là, bumte ndù: Bo nsi tsiaṅ i ze Nazarèt.