Matio 17 - NTSHOB NSI

Mba wut Yésu kaṅ nà

¹ Lé'njù ntôg lo be tshùa, Yésu lo' Pétro, Yakobo, mba Yohané mfèl i, bo à bo nèn tù' bo num mbat ndù a sage;

² wul i kaṅ mbwe bo, se i ziag mba lagnyam nà, nzwe tse tù' fôgtab mba nka' là

³ Tshù, Mosé mba Elia ṅwag mbwe bo, nke ntshobte boa Yésu.

⁴ Pétro bùnte ntshob Yésu ndù: Tshùaben, a bwô bag à bin ghô nsen ni; a be z'o kô là, mba m'a' kut ntàb tat nsen ni, mo' be yu, mo' be ze Mosé, mo' bèn mbe ze Elia.

⁵ Mb'a ke nke' ntshob là, tshù, mo' ndot neké' se' ndam yub mbume; tshù, ntùm ndot nze mèn tshob ndù: Yen ni b'a mén àm ze me num nkô i, mbèn njab ntù àm fa num i là. Bin ke nju' i.

⁶ Ngelaṅ ghazi'te nu i ju' nze là, bo vù nsi kabkab, bwôg tshùb yub kua' neshu.

⁷ Là Yésu se' mbaṅ bo, nkwag yub ntshob ndù: Bin lo nsi kà bin nebwôge.

⁸ Bo bù' miag mube, ke yen sàm mèn k'a ke nda' Yésu tù' i.

⁹ Bo be swe' num mbale, Yésu tshù' yub, ntshob ndù: Kà bin tshob yen njem bin yen nà sàm mèn tà nkum ngelaṅ Mén mèn nsi lo num vù là.

¹⁰ Ghazi'te nu i bètt'é, ntshob ndù: Ghalèn ṅwa'ni Nsi num nke ntshob ndù a bwô Elia bwôgmbwe nse' numke?

¹¹ Là, a bùnte ntshob ndù: Ṅ, Elia a' se', a nsi yab njoṅ nu fa num nka i.

¹² Là me tshob bin ndù: Elia à se'e, bo ke lèn i, ngù num i mba bo kô là. Mba Mén mèn nsi yen nge' be ndaṅndaṅ mum mbu mube.

¹³ Ghazi'te nu i lèn ndù a Yohané nganyu' benntùn ntse z'a tshwèt ntshob bo là.

¹⁴ Bo be kum mbaṅ bwoṅ benntùn, mo' mèn se' mbwe i, nkwim ntunkekwi' mi nsi, ntshob ndù:

¹⁵ Tshùaben, ko ndèn mén àm, nummbe a num ngwù wà'à, njen nge' neshu; nummbe a num nke ngwù ntùm mbwôge, mbèn nke ngwù ntùm ntse.

¹⁶ Me lo ndo' i nse' ntèt ghazi'te nu o yi, bo ke ku'ni neyat'é.

¹⁷ Là Yésu bùnte, ntshob ndù: Zwiaṅ ba ke ghù bamntù mba ben neṅu'te, me nsi tswe bag à bin tà kum ngelaṅ ndùke? Me nsi fènte zin tà kum ngelaṅ ndùke?

¹⁸ Bin lo' i se' yi nsen ni, mfà me. Yésu tshobt'é, ywètkebwô tum num i, mèn nà yate fe num yen ngelaṅ nà.

¹⁹ Ghazi'te nu Yésu se' mbaṅ i, ntshob yi tù' bo ndù: Numke bag num mbe ke ku'ni yag neta' i à?

²⁰ Là, a tshob bo ndù: Num bamntù zin ze metsili. Nummbe me tshob bin kua' nenùn ndù: A lo mbe ndù bin ghù bamntù mba lag metsit njwit tù là, mba bin tshob yen mbat li ndù: Lo nsen ni, nèn nsen nà, mb'a nsi nène; sàm ju ke nsi tshùa zine. [

²¹ Yen lèn ywètkebwô li ke' be tum k'a ke nda' ntùm le'te Nsi mba netswe nziku'u.]

Mba Yésu bèn nsoṅ vù se là

²² Mo' lé'njù bo tse'te Galiléa là, Yésu tshob bo ndù: Bo nsi fà Mén mèn mum mbu benntùn,

²³ bo zwi i, a be be mbatte lé'njù tat a lo num vù. Bo nywin kua' neshu.

Ma'te Ndà Nsi

²⁴ Bo be kum Kapernaum, ghakwé ma'te Ndà Nsi se' mbaṅ Pétro, ntshob ndù: Ngatswite zin ke' be fà ma'te Ndà Nsi ké?

²⁵ A tshob ndù a num mfà. Ngelaṅ Pétro tsho ndà là, Yésu bwôgmbwe ntshob yi ndù: Simon, o kwate ndùke? Fenfen ntùm njù ke nkwé ma'te mba ntshub à ba we? Bon tshob ke ba ghùn à?

²⁶ Mba Pétro tshob yi ndù ba ghùn nà, Yésu tshob yi ndù: Ndùlala bo sô bon tshob bwe.

²⁷ Là nebe ke ghù ndù bo fa'te num be, nèn mbaṅ dibantse, ma' lube; mbwe ngontse z'o nsi ghom nà, tshùb i, nga' ntshu i, o nsi yen ta' statère bwe ntshù'; lo'o, mfà bo num yàm tu mba yu.