Matio 16 - NTSHOB NSI

Ntsha' ba Férésia

¹ Ba Férésia mba ba Sadukai se' mbaṅ i, ndaṅt'é, mbètt'é ndù a la'te lèn nsà z'a fe kamànyam nà bo.

² Là, a bùnte, ntshob bo ndù: A num mbe mfetnjù, bin nke ntshob ndù: Njù a' bwô, nummbe kamànyam b'a mba mbwôg là.

³ A be nkebnjù, bin nke ntshob ndù: Sènni njù a' bag, nummbe kamànyam b'a nzwe'nzwe'. Bin lèn mba ntshù' kamànyam be là ke yôg nku'ni nelèn lèn ngelaṅ njù.

⁴ Zwiaṅ ben kebwô mba ghaghù màndà tshwèt mbètte lèn, bo ke nsi bèn fà lèn yi k'a ke nda' lèn Yona. A tshob ndùlala mfaṅ yub nène.

⁵ Bo be nèn mo' yoṅ dibantse, ghazi'te nu i lagte nelo' bàn.

⁶ Là Yésu tshob bo ndù: Bin bam nà, nzete num ntsha' ba Férésia mba ba Sadukai.

⁷ Bo kwate ntùm ntù tshob ndù: A b'a nummbe be ke' lo' bàn.

⁸ Là Yésu be lèn ndùlala, ntshob ndù: Ghabamntù metsili, numke bin nke nkwate ntùm ntù tsin mba bin ke' ghù bàn n'à?

⁹ Bin ke' yoṅ nju' ke bèn nekwimte ntu' bàn ntàn num benntùn ntsha' tàn, mba njoṅ nkag mbe'te mi mi bin lo' là,

¹⁰ ke ntu' bàn sammbàa lo num benntùn ntsha' kuà, mba njoṅ nta' mbe'te mi mi bin lo' là ké?

¹¹ Ke z'a ghù bin ke ju' ndù a ke b'a num bàn ze me lo ntshob bin à? Là bin zete num ntsha' ba Férésia mba ba Sadukai.

¹² Ndùlala bo ju' ndù a lo ke ke ntshob ndù bo bam n'a num ntsha' bàn, là num ze netswite ba Férésia mba ba Sadukai.

Pétro bam ndù Yésu b'a Kristô

¹³ Ngelaṅ Yésu kum bag ngô Késaréa Filibo là, a bètte ghazi'te nu i, ntshob ndù: Benntùn num nke ntshob ndù Mén mèn b'a we?

¹⁴ Bo tshob ndù: Tsemo' num nke ntshob ndù o b'a Yohané nganyu' benntùn ntse, tsemo' tshob ndù: Elia, tsemo' tshob ndù Yérémia, ke ndù mo' mèn netèt ghatshob ntshob Nsi lo.

¹⁵ A tshob bo ndù: Là bin num ntshob zin ndù me b'a we?

¹⁶ Simon Pétro bùnte, ntshob ndù: O b'a Kristô, Mén Nsi z'a be ntùn nà.

¹⁷ Yésu bùnte, ntshob yi ndù: O b'a mènfen me Simon mén Yona, nummbe a ke b'a mbàb mba lem bèn nda'te yen nu là wù, là Tàa z'a be mfe kamànyam nà.

¹⁸ Mba tu wul àm me tshob wù ndù o b'a Pétro, num sen loṅ nà me nsi kut yàm Ndà Nsi bwe, nzendà ngô fe ben ke nsi ta tshùa i.

¹⁹ Me nsi fà fùn kamànyam wù; ju z'o nsi kut num nsitsha' là, bo nsi bèn kut kamànyam; ju z'o kiagte num nsitsha' là, bo nsi bèn kiagte kamànyam.

²⁰ A to' ghazi'te nu i ndù kà bo tshob sàm mèn ndù tu wul i b'a Kristô.

²¹ Fe num yen ngelaṅ nà, Yésu Kristô to' netswite ghazi'te nu i ndù a bwô ndù a nèn Yérusalém, njen nge' yàme, ghakwé mbwe, ghale'te Nsi tse ndùbndùb mba ghalèn ṅwa'ni Nsi zwi i, a be mbatte lé'njù tat a lo num vù.

²² Pétro lo' i, bo yi bènte njam, a to' netshobt'é, ntshob ndù: Tshùaben, a bwô Nsi ko ndèn mu; yen nu là ke nsi se' num o!

²³ Là, a kaṅ wul i, ntshob Pétro ndù: Lo njam àm me Satan, o b'a ywi' mbwe àm, nummbe nkwatenu mu ke' b'a mi Nsi, là mi benntùn.

²⁴ Ndùlala Yésu tshob ghazi'te nu i ndù: A be ze mèn kô nebwe àm nà, a gha tu wul i, nket ze fanta'tù, mbèn ntam njam àm.

²⁵ Nummbe mèn z'a kô neyôg yôg se là, mb'a ghua' i, là mèn z'a ghua' yôg se num àm nà, mb'a lem i.

²⁶ Nummbe a be ze mèn ghù njoṅ ngô li fa, yôg se bi là, mb'a ywimt'é ke? Ze be mèn se' mfà ndo' mbate yôg se yi là b'a ke?

²⁷ Nummbe Mén mèn nsi se' ntùm nkuni tàab boa ba Angél tse, a nsi fà mba we lo be ndaṅndaṅ num mfa' mi.

²⁸ Kua' nenùne, me tshob bin ndù: Tsemo' benntùn netèt ben tse bo be nsen ni là ke nsi kwù tà nkum ngelaṅ bo yen Mén mèn se' ntùm nufen se là.