Matio 15 - NTSHOB NSI

Num nesôg mbu kà njù jujù

¹ Tsemo' ba Férésia mba ghalèn ṅwa'ni Nsi fe Yérusalém, nse' mbaṅ Yésu, ntshob ndù:

² Numke ghazi'te nu o nke mbagte nu ba mbwe na' ntshob l'à? Nummbe bo ke' be sôg mbu kà njù jujù.

³ Là, a bùnte, ntshob ndù: Numke mba bin zin nke mbagte ntshù' Nsi num nu bin tshob l'à?

⁴ Nummbe Nsi lo tshob ndù: Ku'ni tàan mba màan, mba ndù: Mén z'a tshabte tàab mba màab là, mba bo a' tsho'te ntsha, nzwi i.

⁵ Là bin, bin num ntshob ndù: Mèn z'a tshob tàab mba màab ndù: Me ku'ni neywimt'o, là yen neywimte là b'a ju neghamte Nsi yi,

⁶ ndùlala mb'a ke bèn neku'ni tàab mba màab. Bin biagte ntshob Nsi ntshùa num nu ze bin tshob là.

⁷ Ghamfùm, Esaya lo tshob ntshob Nsi kua' mebwô mfà num bin, ntshob ndù:

⁸ Yen nzwit mènntùn ni ke ngamt'àm à nkub ntshu, là ntù tshob be tà ngùanesà mbaṅ àm.

⁹ Bo ke ngamt'àm à banban, nummbe bo ke ntswit'a tshu ts'a b'a nda' ntag benntùn nyiaṅtu là benntùn.

¹⁰ A tsiaṅ bwoṅ benntùn mbaṅ i, ntshob bo ndù: Bin kù' ntoṅ, nju'u!

¹¹ A ke b'a ju z'a num ntsho ntshu mèn nà ke nsagt'é, là ju z'a num ntum ntshu mèn nà, a yen nà bèn nke nsagt'é.

¹² Ghazi'te nu i se' mbaṅ i, ntshob yi ndù: O lèn ndù ba Férésia lo mbe ju' men ntshob là, mfa'te bwe à?

¹³ Là, a bùnte ntshob ndù: Njoṅ ntù fa mi Tàa mfe kamànyam ke bèn njwit là, bo nsi tsho'o.

¹⁴ Bin faṅ yub là; bo b'a ba mfùmiag, ghatshagte ba mfùmiag. Là, a be ze mfùmiag tshagte mo' mfùmiag là, mba ntu tshob bàa fa nsi vù ntùm tàme.

¹⁵ Pétro bùnte, ntshob yi ndù: Bagte tun yen tànkùt là bag.

¹⁶ Là, a tshob ndù: Mba bin zin ke' ke ghù zenu ké?

¹⁷ Bin ke' lèn ndù ju z'a num ntsho ntshu mèn nà, num nèn ntùm bam se, bo bèn ngua' i ntùm kot ké1

¹⁸ Là tshu ts'a num ntum ntshu mèn nà ke mfe à ntùm ntù i, a tshen ni bèn nke nsagte mèn.

¹⁹ Nummbe nkwate nukebwô ke ntum à ntùm ntù benntùn, nezwi mèn, neghù màndà, nekale, tshô, nekwé nta tatte mba tshabte.

²⁰ A tshen ni nke nsagte mèn, là nejù ju mbu ke sôg ke' be sagte mèn.

Mba Yésu yate mén ngon Sirôfènikia là

²¹ Yésu tum yen dù' là, nèn ntùm bag ngô Tiro mba Sidon.

²² Tshù, mo' nzwi Kanaan tum yen bag ngô là, nkua' neta, ntshob ndù: Tshùaben mén David, ko ndèn màm, mo' ywètkebwô tshwèt ntô ngon àm kua' kebwô.

²³ Là, a ke bùnte sàm nu yi. Ghazi'te nu i se' mbaṅ i, mbu' mbu yi, ntshob ndù: Lé't'é nummbe a tshwèt nkua' njam be.

²⁴ Là, a bùnte ntshob ndù: Bo tum àm à nda' num njùmbwe tunndà Israél ts'a bi là.

²⁵ Là mènnzwi là se', ngwù nsi mbwe i, ntshob ndù: Tshùaben, ywimt'àm.

²⁶ Là, a bùnte ntshob ndù: A ke' bwô ndù bo lo' bàn bônke', ma' bon mbù.

²⁷ Là, a tshob ndù: Ṅ me Tshùaben, nummbe mba bon mbù num njù mbe'te bàn mi a tum num téblé tà tshob ngwù nsi là.

²⁸ Yésu bùnte ntshob yi ndù: Mènnzwi, bamntù o b'a ze ndùb. A ghù num o mb'o kô là. Fe num yen ngelaṅ nà, ngon i yate.

Mba Yésu bèn nkém benntùn ntsha' kuà là

²⁹ Yésu tum yen dù' là, nèn kaṅ dibantse Galiléa, nko' num mbale, ntswe bwe.

³⁰ Bwoṅ benntùn yàm se' mbaṅ i ndù bo lo' ba kekat, ba mfùmiag, ba ketshob mba tsemo' ghangokèt yàme, njab mbaṅ nku mi.

³¹ A yate yube, kà bwoṅ benntùn be yen mba ba ketshob tshwèt ntshobe, ba nke'kèt tswe mebwô, ba kekat nke nzine, ba mfùmiag nke njen nze là, nyàmte; bo fà ghamte Nsi Israél.

³² Yésu tsiaṅ ghazi'te nu i mbaṅ i, ntshob ndù: Ndèn bwoṅ benntùn ni ko àm, nummbe be tswe bo à bo lé'njù tat, bo ke ghù ju nejù. Me ke' kô nelé'te yub bo nèn nziku'u, mbwôg ndù kà neta bwoṅ bo manze.

³³ Ghazi'te nu i tshob yi ndù: Be be lo' bàn à yà k'a ku'ni nekém yen njoṅ bwoṅ benntùn ni yi, bo ywèt, num kônkwa à?

³⁴ Yésu tshob bo ndù: Ntu' bàn num bin si'i? Bo tshob yi ndù: Sammbàa mba bon ndô ngontse.

³⁵ A ghù bwoṅ benntùn tswe nsi num tsha'a.

³⁶ A lo' men ntu' bàn sammbàa là mba tshen ngontse là, nde'te Nsi, mbe'te, nke mfà ghazi'te nu i, ghazi'te nu i nke mfà bwoṅ benntùn.

³⁷ Njoṅ yub fa jù, njwèle, ntse'te mbe'te mi mi a tù' là, a dun nta' sammbàa.

³⁸ Ben tse bo na' njù là na' mb'a bandum ntsha' kuà, ke kwa bènnzwi mba bônke'.

³⁹ A be miagte nelé'te bwoṅ benntùn, ntsho ntùm kenu nèn nkum bag ngô Magadan.