Matio 10 - NTSHOB NSI

Mba Yésu tum tse ntshob bàa gham nà

¹ A tsiaṅ ghazi'te nu i ntshob bàa gham mbaṅ i, mfà ngù' neta' ywètkebwô, neyate njoṅ ngokèt fa mba njoṅ lo' nzenze fa bo.

² Ndèn ghantum ntshob bàa gham nà b'a ndù: Mbwe i, Simon mo' lén se be Pétro là, Andréa mfèl i, Yakobo mén Zèbèdéo mba Yohané mfèl i;

³ Filibo mba Bartélémi. Tomas mba Matio ngakwéfé', Yakobo mén Alféo mba Tadéo;

⁴ Simon mén la' mba Yuda Iskariot mèn z'a swèn i là.

⁵ Yésu tum tshen ben ntshob bàa gham ni, mfà men ntag li bo ndù: Kà bin nèn mbaṅ ghakelèn Nsi, kà bin tsho ntùm sàm ngô ba Samaria.

⁶ Bin nèn à be mbaṅ njùmbwe tunndà Israél tse bo bi là.

⁷ Bin be zin num manze nke ntshob ndù nufen kamànyam à ghebte.

⁸ Bin ke njate ghangokèt, mbam fe ben, ndànte ghankine, mbèn nta' ba ywètkebwô. Bin na' nkwé à banban, bin bèn mfà zin banban.

⁹ Kà bin diag nelo' gol ke silba, mba keba lo ntùm nkob mine,

¹⁰ ke lo' bàm num katte, ke lo' nzwe bàa mba nketo'o, ke lo' kôg, nummbe ngafa' ku'ni num jujù i.

¹¹ Mba ntùm zit taṅla' lo ze bin nsi tsho bwe là, bin bètte mèn z'a ku'ni nelo' zin nà. Bin tswe bwe tà nkum ngelaṅ bin tum nà.

¹² Ngelaṅ bin tshwèt ntsho ndà là, bin tsha't'é.

¹³ A be ze yen ndà là ku'ni là, fite zin se' num i; a be z'a ke' ku'ni là, fite zin bèn bin.

¹⁴ Mèn z'a ke' lo' zine, ke bèn nju' ntshob min nà, bin tum ntùm yen ndà là, ke ntùm yen ngô là lo, mbe tum mbé'te mbab num nku mine.

¹⁵ Kua' nenùne, me tshob bin ndù: Nu ngô Sodom mba Gomora nsi bwô tshùa ze yen ngô là mum lé'njù netsho'te ntsha.

¹⁶ Tshù, me tum zin mba njùmbwe netèt ba nzwimàntô là, ndùlala bin zete mba ba nyu là, mbèn ndàn mba ba bwoṅtambia' là.

¹⁷ Bin bamnà num benntùn, nummbe bo nsi te zin mbwe ghatsho'te ntsha, lab zin nshua' ntùm sinagogue tshobe.

¹⁸ Bo nsi nèn bin mbwe ba ngomna mba fenfen num àm ndù bin kwé nta mbwe bo mba mbwe ghakelèn Nsi.

¹⁹ Ngelaṅ bo nsi te zin mbwe bo là, kà bin lab wut tsin num nu ze bin nsi tshob là, mba mat ze bin nsi tshob yi là; bo nsi fà nu ze bin nsi tshob là bin be num yen nyam nà.

²⁰ Nummbe bin ke bèn tshobe, là Ywèt Tà zin bèn tshob num bin.

²¹ Mèn nsi ghù bo zwi mfèl i, tà ghù bo zwi mén i. Bon nsi ya ntù tà yub mba mà yub, zwi yube.

²² Njoṅ benntùn fa nsi bàn zin num lén sàm, là mèn z'a fènte tà nèn miagte là, mba yen mèn nà nsi yôge.

²³ Ngelaṅ bo tsho' nku min kebàn ntùm mo' ngô là, bin kù nèn ntùm mo' ze ghua. Nummbe me tshob bin kua' nenùn ndù bin ke nsi miagte ngô Israél ke be ndù Mén mèn se'e.

²⁴ Ngazi'te ke' be tshùa ngatswite, nkuan ke bèn ntshùa tàab.

²⁵ A ku'ni ngazi'te nebe mba ngatswite là, mba nkuan nebe mba tàab là. A be ze bo tsiaṅ tàndà ndù Bèèzèbul là, mba bo nsi tsiaṅ ba ndà yoṅ yàm ntshùa ndùlala.

²⁶ Kà bin bwôg yube. Mo' nu nelem ke be z'a ke nsi tum njù mbwôgtshù là; mo' nu ke bèn mbe ntùm tsham ze bo ke nsi lèn nà.

²⁷ Ju ze me tshob bin ntùm dù' njam nà, bin tshob ntùm dù' tàyage. Nu ze bo tagte toṅ bin nà, bin tsin num tuba' kà ntshobe.

²⁸ Kà bin bwôg benntùn tse bo num nzwi wut, là ke ku'ni nezwi zwiag là, bin bwôg à mèn z'a ku'ni nebiagte zwiag mba wut ntùm mbwôg là.

²⁹ Bo ke' be swèn ntôgzin mba ta' keba ké? Là ta' i mba ntshù' ke' be vù num tsha' ke be ndù Tà zin kô.

³⁰ Mbèn mbe, bo siaṅ njoṅ ntàn nyiaṅtu tsin fa.

³¹ Kà bin bwôg sàm ju, bin tanjoṅ ntshùa ntôgzin yàme.

³² Njoṅ benntùn fa tse bo nsi bam àm mbwe benntùn nà, mba mba me nsi bam yub mbwe Tà z'a mfe kamànyam nà.

³³ Mèn z'a gha àm mbwe benntùn nà, mba mba me nsi gha i mbwe Tà z'a be mfe kamànyam nà.

³⁴ Kà bin kwate ndù me se' nema' à fite num tsha'a; me ke' se' nema' à fite, là me se' nema' à ṅwi.

³⁵ Nummbe me se' nefagt'a nshum bo tàab, ngon bo màab, nzwi mén bo màndu i.

³⁶ Ghakeban mèn nsi tum à be kua' ndà i.

³⁷ Mèn z'a kô tàab ke màab lo ntshùa àm nà, a ke' ku'ni num àm. Mèn z'a kô nshum i ke ngon i lo ntshùa àm nà, a ke' ku'ni num àm.

³⁸ Mèn z'a ke' ket ze fanta'tù ntam njam àm nà, a ke' ku'ni num àm.

³⁹ Mèn z'a lem yôg se là, mb'a nsi ghua' i; mèn z'a ghua' yôg se num àm nà, mb'a lem i.

⁴⁰ Mèn z'a lo' zin nà lo' àm; mèn z'a lo' àm nà, lo' mèn z'a tum àm nà.

⁴¹ Mèn z'a lo' ngatshob ntshob Nsi num lén ngatshob ntshob Nsi là, a nsi kwé ntsho'fa' mba ngatshob ntshob Nsi là; mèn z'a lo' mèn netsin num lén mèn netsin nà, a nsi kwé ntsho'fa' mba mèn netsin nà.

⁴² Mèn z'a nsi fà ntu' ntse fi mèn netèt tshen bontsit tse li num lén ngazi'te nu àm nà, me tshob bin kua' nenùn ndù yen mèn nà ke nsi bi mi ntsho'fa'.