Matio 1 - NTSHOB NSI

Tunndà Yésu

¹ Ṅwa'ni tunndà Yésu Kristô, mén David, mén Abraham.

² Abraham bwe Isak, Isak bwe Yakob, Yakob bwe Yuda mba fèt tse;

³ Yuda bwe Farès mba Zara bo Tamar nzwi i, Farès bwe Esrom, Esrom bwe Aram;

⁴ Aram bwe Aminadab, Aminadab bwe Nason, Nason bwe Salomon;

⁵ Salomon bo Rahab nzwi i bwe Boaze, Boaze bo Rut nzwi i bwe Obèd, Obèd bwe Isaï;

⁶ Isaï bwe mfen David. David bo nzwi Uria bwe Salomon;

⁷ Salomon bwe Roboam, Roboam bwe Abia, Abia bwe Asaf;

⁸ Asaf bwe Yosafat, Yosafat bwe Yoram, Yoram bwe Ozias;

⁹ Ozias bwe Yoatam, Yoatam bwe Akaz, Akaz bwe Ezékia;

¹⁰ Ezékia bwe Manasé, Manasé bwe Amos, Amos bwe Yosias;

¹¹ Yosias bwe Yékonia mba fèt tse num ngelaṅ bo nèn ndà kuan Babilon nà.

¹² Fe ngelaṅ bo nèn ndà kuan Babilon nà, Yékonia bwe Salatiél, Salatiél bwe Zorobabél;

¹³ Zorobabél bwe Aliud, Aliud bwe Eliakim, Eliakim bwe Azôr;

¹⁴ Azôr bwe Sadok, Sadok bwe Akim, Akim bwe Eliud;

¹⁵ Eliud bwe Eléazar, Eléazar bwe Matam, Matam bwe Yakob;

¹⁶ Yakob bwe Yosèf, ndu Maria z'a bwe Yésu ze bo ke ntsiaṅ i Kristô là.

¹⁷ Ndùlala neto' num Abraham nèn nkum num David ghù zwiaṅ benntùn ntshob kuà gham; neto' num David nèn nkum ngelaṅ bo nèn ndà kuan Babilon nà ghù zwiaṅ benntùn ntshob kuà gham; neto' num ngelaṅ bo nèn ndà kuan Babilon nà nèn nkum num Kristô ghù zwiaṅ benntùn ntshob kuà gham.

Mba bo bwe Yésu là

¹⁸ Tshù mba bo bwe Yésu Kristô li: Maria màab na' mb'a nzwi Yosèf, ke bo ndu i yoṅ ntswe ndà, a be jùm ntshùa num neta Ywèt Nelàne.

¹⁹ Yosèf ndu i z'a na' mbe mèn netsine, ke kô nema' tuswe tu i là, kwate nesô i njam tsham.

²⁰ Ngelaṅ z'a ke nkwate yen nu là là, mo' Angél Tshùaben ṅwag yi ntùm njem, ntshob ndù: Yosèf mén David, kà bwôg nelo' Maria, nzwi o la' o. Nummbe mén z'a lét là fe à Ywèt Nelàne.

²¹ A nsi bwe mén mandum, o tswi lén se ndù Yésu. Nummbe a nsi bèn yôg ben tse num nukebwô tshobe.

²² Yen nà tshwèt ngù ndù men ntshob li mi ngatshob ntshob Nsi na' ntshob num ze tu Tshùaben nà bumte ndù:

²³ Tshù, ménngon nsi be jùm, bwe mén mandum, bo tswi lén se ndù Emmanuél, yen nà bagt'a ndù: Be à Nsi bèn mbe.

²⁴ Ngelaṅ Yosèf bam num miaglo là, a ghù ju ze Angél Tshùaben tshob yi là, ndo' nzwi i la' i.

²⁵ Là, a ke lèn i tà nkum ngelaṅ z'a na' mbwe mén mandum, a tswi lén se Yésu là.