Marko 8 - NTSHOB NSI

Mba Yésu bèn nkém benntùn ntsha' kuà là

¹ A lo bèn mbe num tshen lé'njù là, mo' mà bwoṅ benntùn bèn mbe bwe, ke ghù ju nejù, Yésu tsiaṅ ghazi'te nu i mbaṅ i, ntshob bo ndù:

² Ndèn bwoṅ benntùn ni ko àm, nummbe bo tswe be à bo lé'njù tat, bo ke ghù ju nejù.

³ A be ze me lé'te yub ndù bo nèn nziku' là, mba neta à bwoṅ bo manze, mbèn mbe tsemo' netèt bo fe à ngùanesà.

⁴ Ghazi'te nu i bùnte yi ndù: Be bo lo' bàn à yà num yen kônkwa li, kà nkém tshen benntùn ni yi, bo ywèl à?

⁵ A bètte yub ndù: Ntu' bàn num bin nsi'i? Bo tshob yi ndù: Sammbàa.

⁶ A ghù bwoṅ benntùn tswe nsi num tsha'a. A lo' men ntu' bàn sammbàa là, nde'te Nsi, mbe'te, nke mfà ghazi'te nu i ndù bo ke nte mbwe bo; bo te mbwe bwoṅ benntùn.

⁷ Bo lo bèn ngù bon ndô ngontse. Yésu le'te Nsi num bo, ntshob ndù bo bèn nte mbwe bo.

⁸ Bo jù, njwèle, ntse'te mbe'te mi mi a tù' là nta' sammbàa.

⁹ Bo na' mb'a nguan benntùn ntsha' kuà. A lé'te yube.

¹⁰ Be ndùse, a tsho ntùm kenu boa ghazi'te nu i, nèn ntùm ngô Dalmanuta.

¹¹ Ba Férésia tum, nto' neta ntshu boa Yésu, mbètt'é ndù a ghù lèn nsà z'a fe kamànyam nà; a b'a nelo' ndaṅt'é yi.

¹² A fém ntùm ywèt tse, ntshob ndù: Numke yen zwiaṅ benntùn ni nke mbètte nsà à? Me tshob bin kua' nenùn ndù bo ke nsi fà nsà yen zwiaṅ benntùn ni.

¹³ A lo be faṅ yube, mbèn nko' ntùm kenu, nèn mo' yoṅ dibantse.

¹⁴ Bo lagte nelo' bàn, k'a ke nda' tu' bàn ntshù' bo ghù ntùm kenu là.

¹⁵ Yésu fà ntshù' bo, ntshob ndù: Bin bam nà, nzete num ntsha' ba Férésia mba ntsha' Hèrodé.

¹⁶ Bo nke nkwate, ntshob bo bo ndù: A b'a nummbe be ke' lo' bàn.

¹⁷ Yésu be lèn ndùlala, ntshob bo ndù: Numke bin nke nkwate netèt bin mba bin ke' ghù bàn n'à? Bin ke' yoṅ nju'u, bin ke' ke yoṅ ngù zenu ké? Ntù tsin nente ké?

¹⁸ Bin ghù miag ke be yen ké? Mbèn ngù ntoṅ ke be ju' ké? Ke bèn nke nkwimte nu ké?

¹⁹ Ngelaṅ me na' mbe'te ntu' bàn ntàn num benntùn ntsha' tàn nà, bin na' ntse'te nkag mbe'te mi dun bwe l'a si'i? Bo tshob yi ndù: Ntshob bàa gham.

²⁰ Ngelaṅ me na' mbe'te ntu' bàn sammbàa num benntùn ntsha' kuà là, bin na' ntse'te nta' mbe'te mi dun bwe l'a si'i? Bo tshob ndù: Sammbàa.

²¹ A bèn ntshob bo ndù: Bin ke' yoṅ nju' ké?

Mfùmiag Bètsaida

²² Bo nèn nkum Bètsaida. Benntùn lo' mo' mfùmiag nse' yi, mbu' mbu Yésu ndù a kwag i.

²³ A tshùb bu mfùmiag, ntum bo yi ntùm ngô, ntôgte ntsi num miag mi, njab mbu mi num i, mbètt'é ndù: O yen ju ké?

²⁴ A lôte, ntshob ndù: Me yen benntùn, bo tswe mba ntù là, nke nzine.

²⁵ Yésu bèn njab mbu mi num miag mi. A to' neyene, njate, nke njen mba ke lo ndène.

²⁶ Yésu lé't'é ndù a nèn la' i, ntshob ndù: Kà bèn mbèn njam ntùm yen ngô là.

Pétro bam ndù Yésu b'a Kristô

²⁷ Yésu mba ghazi'te nu i nèn ntùm taṅla' Késaréa Filibo. Num manze, a bètte ghazi'te nu i, ntshob ndù: Benntùn num nke ntshob ndù me b'a we?

²⁸ Bo bùnte yi, ntshob ndù: Yohané nganyu' benntùn ntse, tsemo' tshob ndù: Elia, tsemo' tshob ndù: Mo' mèn netèt ghatshob ntshob Nsi.

²⁹ A bèn mbètte yub ndù: Là bin num ntshob zin ndù me b'a we? Pétro bùnte, ntshob yi ndù: O b'a Kristô.

³⁰ A tshù' yub ndù kà bo tshob nu sàm mèn mba ntshù' mfà num i.

³¹ A to' netswite bo ndù: A bwô ndù Mén mèn yen nge' yàme, ghakwé mbwe, ghale'te Nsi tse ndùbndùb mba ghalèn ṅwa'ni Nsi nsi ghua' i, zwi i, a be tshùa lé'njù tat, a lo num vù.

³² A nke ntshob yen nu là bo mfagte. Pétro lo' i, bo yi bènte njam, a to' netshobt'é.

³³ Là Yésu kaṅ wul i njam, mbèn njen ghazi'te nu i, ntshobte Pétro, ntshob ndù: Lo njam àm, me Satan, nummbe nkwatenu mu ke' b'a num nu Nsi, là num nu benntùn.

³⁴ A tsiaṅ bwoṅ benntùn boa ghazi'te nu i mbaṅ i, ntshob bo ndù: A be ze mèn kô nebwe àm nà, a gha tu wul i, nket ze fanta'tù, mbèn ntam njam àm.

³⁵ Nummbe mèn z'a kô nelem yôg se là, mb'a neghua' i; là mèn z'a ghua' yôg se num tu àm mba num nkùn mebwô là, mb'a ke nelem yôg se.

³⁶ Nummbe a be ze mèn ghù njoṅ ngô njù li fa, yôg se bi là, mb'a' ywimt'é ke?

³⁷ Ze be mèn fà ndo' mbate yôg se yi là b'a ke?

³⁸ Nummbe mèn z'a nsi ko tuswe num àm mba num ntshob màm netèt yen zwiaṅ ghaghù màndà mba ghaghù nukebwô li là, mba mba Mén mèn nsi ko ze tuswe num i ngelaṅ z'a nsi se' ntùm nkuni tàab boa ba Angél nelàn nà.