Marko 7 - NTSHOB NSI

Num nesôg mbu kà njù jujù

¹ Ba Férésia mba tsemo' ghalèn ṅwa'ni Nsi tse bo fe Yérusalém nà, se', ntse'te mbaṅ Yésu.

² Bo yen ndù tsemo' ghazi'te nu Yésu tshwèt njù jujù mbu kebwô, yen nà la't'a ndù: Ke sôg mbu.

³ (Nummbe njoṅ ba Férésia mba njoṅ ba Yuda fa lo ke be jù jujù kà ke sôg mbu kua' mebwô, mb'a be ntùm nu ba mbwe na' ntshob là;

⁴ mba ngelaṅ bo fe ntàn nà, bo ke jù jujù ke sôg wut: Tsemo' tshu num bwe yàm tse bo na' nkwé neze là, ndaṅndaṅ mba nesôg nka, ntu' mba nkab ntse là).

⁵ Ndùlala ba Férésia mba ghalèn ṅwa'ni Nsi bètt'é ndù: Numke ghazi'te nu o ke be tshùb nu ba mbwe na' ntshob là, nke njù jujù mbu kebwô à?

⁶ A bùnte bo ndù: Esaya lo tshob ntshob Nsi kua' mebwô mfà num bin ghamfùm, mb'a na' ntshob ndù: Yen nzwit mènntùn ni ke ngamt'àm à nkub ntshu, là ntù tshob be tà ngùanesà mbaṅ àm.

⁷ Bo ke ngamt'àm à banban, nummbe bo ke ntswit'a tshu ts'a b'a nda' ntag benntùn nyiaṅtu là benntùn.

⁸ Bin num mfaṅ ntshù' Nsi, nke ntshùb nu benntùn na' ntshob là.

⁹ A bèn ntshob bo ndù: Bin lèn nebiagte ntshù' Nsi, ntshùa ndùlala ntshùb be nda' nu benntùn.

¹⁰ Nummbe Mosé lo tshob ndù: Ku'ni tàan mba màan, mba ndù: Mèn z'a tshabte tàab mba màab là, mba bo a' tsho'te ntsha, nzwi i.

¹¹ Là bin, bin num nke ntshob ndù: A be ze mèn tshob tàab mba màab ndù: Me ku'ni neywimt'o, là yen ju neywimt'o là b'a korban, yen nà b'a ndù ju neghamte Nsi

¹² mba bin ke bèn mfaṅ i ndù a fà sàm ju tàab mba màab;

¹³ nke mbiagte ntshob Nsi ntshùa num ntshob mi bin na' ntshob là, mbèn nke ngù tsemo' tshu yàm ts'a fute tshen nà là.

¹⁴ A bèn ntsiaṅ bwoṅ benntùn mbaṅ i, ntshob bo ndù: Bin kù' ntoṅ, nju' àm njoṅ zin fa!

¹⁵ Sàm ju ke bwe z'a fe njù, ntsho num mèn, mb'a' sagt'é là, là nda' ju z'a num ntum num mèn nà, bèn ngù nesagt'é. [

¹⁶ A be ze mèn ghù ntoṅ mi à neju' yi là, a ju'.]

¹⁷ Ngelaṅ a tsho mo' ndà, ngùanesà mbaṅ bwoṅ benntùn nà, ghazi'te nu i bètt'é tun yen tànkùt là.

¹⁸ A tshob bo ndù: Mba bin zin ke' ghù zenu ké? Bin ke' lèn ndù ju z'a num ntsho num mèn, mfe à njù là, ke' ku' nesagt'é ké?

¹⁹ Nummbe a ke' be tsho a ntùm ntù i, là ntùm bam se, mbèn ntum nèn ntùm kot, ndùlala njoṅ jujù fa b'a nelàne.

²⁰ A bèn ntshob ndù: Ju z'a num ntum num mèn nà, a yen ni bèn nke nsagte mèn;

²¹ nummbe nkwate nukebwô ke mfe à ntùm ntù benntùn: Nekale, tshô, nezwi mèn,

²² neghù màndà, ze'te, netshùage, fùte, nekô yôg ngùa, miag ghe'te, tshabte, ko'tewut, zwiaṅte.

²³ Njoṅ tshen nukebwô là fa ke ntum à ntùm ntù mèn, kà nsagte mèn.

Mba Yésu yate mén ngon Sirôfènikia là

²⁴ A lo num yen dù' là, nèn bag ngô Tiro, ntsho mo' ndà, ndiag ndù kà sàm mèn lèn, a ke ku' neleme.

²⁵ Là mo' mènnzwi z'a na' nju' nu Yésu, ndù ngon i ghù ywètkebwô là, tsho ndà be ndùse, ngwù num nku Yésu.

²⁶ Yen mènnzwi là na' mb'a ngakelèn ntshob Nsi, mbe ngon Sirôfènikia. A bu' mbu Yésu ndù a ta' ywètkebwô num ngon i.

²⁷ A tshob yi ndù: Faṅ nà ndù bônke' ywèt nkàne; nummbe a ke' bwô ndù bo lo' bàn bônke', ma' bon mbù.

²⁸ Là, a bùnte, ntshob yi ndù: Ṅ, me Tshùaben, mba bon mbù num njù mbe'te bàn bônke' tun téblé.

²⁹ A tshob yi ndù: Num men ntshob li, nène, ywètkebwô à tum num ngon o.

³⁰ A nèn la' i, njen ngon i ndù a nô num kune, ndù ywètkebwô à tum num i.

Mbu'ntoṅ z'a be ketshob là

³¹ A bèn ntum ntùm ngô Tiro, ntshùa Sidon, ntôg netèt ngô Dékapol, nèn nkum kaṅ dibantse Galiléa.

³² Bo lo' mo' mbu'ntoṅ, z'a na' mbèn mbe ketshob là, nse' yi, mbu' mbu Yésu ndù a yab mbu num i.

³³ A lo' i tù' i, ntum yi netèt bwoṅ benntùn, nso mbu mi ntùm ntoṅ mi, mbèn njab ntsi mi num lém se,

³⁴ mbù' miag mi mfe kamànyam, nzwiag ntshob yi ndù: Efata, yen nà b'a ndù: Gha'a.

³⁵ Ntoṅ mi gha', be ngelaṅ mbile, ngalém se ké'te: A tshob a tsin.

³⁶ A tshob bo ndù kà bo tshob nu sàm mèn mba ntshù', là mba mb'a na' ntshob bo là, bo soṅ yen nu là neshu.

³⁷ Bo tshàm nga' mbu, ntshob ndù: A ghù njoṅ i fa a bwô, ngù mbu'ntoṅ ju', mba ketshob tshob.