Marko 6 - NTSHOB NSI

Yésu mà Nazarèt

¹ A lo tum ntùm yen dù' là, nèn ntùm ngô i, ghazi'te nu i tam njam i.

² A lo kum lé' Sabbat, Yésu to' netswite ntshob Nsi ntùm sinagogue. Benntùn bo ju' nu i là tshàm, ntshob ndù: Tshen nu li fe à yà yen mèn ni à? Ke lèn zenu li bo na' mfà yen mèn ni, kà lèn tshen nsà li nke ntum mum mbu mi à?

³ A ke' b'a ngave, mén Maria, mfèt Yakobo, Yosèf, Yuda mba Simon ké? Fèt tse tse bènnzwi ke' b'a nsen ni netèt be ké? Bo fa'te num i.

⁴ Yésu lo ke ntshob bo ndù: Bo ke' be wag ngatshob ntshob Nsi k'a ke nda' ntùm ko' ngô i, ntùm taṅla' se mba ntùm la' se.

⁵ A ke bèn nku' neghù sàm nsà bwe k'a ke nda' mb'a na' njab mbu mi num tsemo' ghangokèt, njate yub là.

⁶ A tshàm neshu mba ntù yub ta, bamntù yub ke be là. A lo ke nkatte, ndam ntùm ntaṅla' mi a na' ngebte là, nke ntswite ntshob Nsi.

Mba Yésu tum tse ntshob bàa gham nà

⁷ A tsiaṅ tse ntshob bàa gham mbaṅ i, nto' netum yub bàa bàa, mfà ngù' netô ywètkebwô bo,

⁸ mbèn ntshù' yub ndù kà bo lo' sàm ju num nkatte k'a ke nda' kôg; kà bo lo' bàn ke bàm ke nkàb lo ntùm kob,

⁹ là bo nèn boa nketo' a nku bo là, ke ma' nzwe num bo bàa.

¹⁰ A bèn ntshob bo ndù: Mba zit dù' lo bin tsho mo' ndà là, bin tswe bwe tà nkum ngelaṅ bin tum ntùm yen dù' là là.

¹¹ A be ze mo' dù' ke' lo' zine, benntùn ke bèn nju' ntshob min nà, bin tum ntùm yen dù' là, mbé'te mbab mi a ṅab tun nku min nà, ndù a be ju nekwé nta bo.

¹² Bo nèn, nke ntshob ntshob Nsi ndù benntùn kaṅ ntù tshobe,

¹³ bo nke nta' ywètkebwô yàme, nke njo' ghangokèt yàm mfèt, mbèn njate yube.

Vù Yohané nganyu' benntùn ntse

¹⁴ Mfen Hèrodé ju' tshô Yésu, nummbe lén se lo ju'ni, benntùn tshob ndù: Yohané nganyu' benntùn ntse bèn ndo num vù, a ndùlala bèn ngù k'a nke ngù tshen nsà ndùbndùb là.

¹⁵ Tsemo' ben tshob ndù: A b'a Elia; tsemo' bèn ntshob ndù: A b'a mo' ngatshob ntshob Nsi mba tse mbwe là.

¹⁶ Là Hèrodé lo be ju' ntshob ndù: Yen Yohané ze me na' ngù bo keb tu i là, a b'a yi bèn mbame.

¹⁷ Nummbe a b'a be Hèrodé na' mbèn ntum bo tshùb Yohané, nkul i ntùm ndàtsha num nu Hèrodia ze Hèrodé na' nso i, ndù a b'a nzwi mfèl i Filibo là.

¹⁸ Nummbe Yohané lo ke ntshob Hèrodé ndù: Ntshù' ke' bam ndù o so nzwi mfèl o.

¹⁹ Là Hèrodé nke mbàn i, ndiag nezwi i, ke yen manze,

²⁰ nummbe Hèrodé lo ke mbwôg Yohané, ndèn ndù a b'a mèn netsine, mbe mèn nelàne, nke nzi tshùalo num i, ntshètt'é. Ngelaṅ z'a ju' ntshob mi là, a tshàm, mbèn nkwate nu yàme, mba ndùlala a nke nju' i ntùm tsiaṅte.

²¹ Lé'njù fen se' ngelaṅ ze Hèrodé na' ngù tsiaṅte, ntate ben tse tse ndùbndùb, ba tàndà ntsho mba kamkam Galiléa mum lé'njù bo na' mbwe i là.

²² Mba ngon Hèrodia tsho ze dù' tsiaṅte, nyiaṅe. A bwô Hèrodé mba ben tse bo à bo ke njù jujù là neshu. Mfen tshob ménngon nà ndù: Lon àm ju z'o kô là, m'a' fà wù.

²³ Mfen lo' nka'ni, nkàn mfe mbwe i ndù: Mba ke lo z'o nsi lon me là, mba m'a' fà wù, a be z'a b'a mba mo' bag nufen sàm nà.

²⁴ A tum, ntshob màab ndù: Ke ze me lon à? A tshob yi ndù: Tu Yohané nganyu' benntùn ntse.

²⁵ A bèn njam ndende mbaṅ mfen, ntshob yi ndù: Me kô ndù: Ndonni o fà tu Yohané nganyu' benntùn ntse me ntùm ka.

²⁶ Mfen nywin neshu, là ke kô negha, nummbe benntùn lo be nsi yàme, mba mb'a kàn mfe là.

²⁷ Be ndùse, mfen tum mo' soyé, ntshob yi ndù: Nèn ndo' tu Yohané nse' yi. Yen soyé là nèn nkeb tu Yohané ndàtsha,

²⁸ njab tu i ntùm ka, nse' mfà ménngon nà, ménngon nèn mfà màab.

²⁹ Ghazi'te nu Yohané be ju' yen nu là, nse' ndo' fe i, nèn ntshoṅ ntùm fi.

Mba Yésu kém benntùn ntsha' tàn bàn nà

³⁰ Ghantum se', ntse'te mbaṅ Yésu, nsoṅ i njoṅ tshu fa bo na' ngù mba tse bo na' ntswite là.

³¹ A tshob bo ndù: Bin se' nda' tù' bin, bag à bin nèn dù' banban ndù bin fite wut tsin metsili. Nummbe benntùn tse bo ke nse' mbèn nke mfe là lo yàm kà bo ke yen ngelaṅ nejù jujù.

³² Bo tsho ntùm kenu, nèn dù' banban nda' tù' bo boa Yésu.

³³ Benntùn yàm yen mba bo nèn nà, ndèn dù' bo nèn nà. Bo fe ntùm njoṅ ngô fa ntume, nkù nde nku, mbwôg kum dù' bo ke nèn nà.

³⁴ Yésu be tum kenu, njen mo' mà bwoṅ benntùn, ndèn mub ko i, nummbe bo na' ntswe à mba bwoṅ njùmbwe tse ngabéb yub ke' be là, a to' netswite ntshob Nsi bo yàme.

³⁵ Mba njù ke nèn nesèn nà, ghazi'te nu i se' mbaṅ i, ntshob ndù: Yen ni b'a dù' banban, ngelaṅ à nebèn ntshùa yàme.

³⁶ Lé'te yub ndù bo nèn ntùm ngô mba ntùm ntaṅla' mi a be mbaṅ yen dù' li là, njun ju ze bo jù là yub tu.

³⁷ Là, a bùnte, ntshob bo ndù: Bin bèn fà jujù bo. Bo tshob yi ndù: Be bag nèn njun bàn denario nkù bàa mfà bo ké?

³⁸ Là, a bèn ntshob bo ndù: Ntu' bàn num bin nsi'i? Bin nèn ndôte. Ngelaṅ bo lôte là, bo tshob ndù: Ntu' bàn ntàn mba ngontse ndô bàa.

³⁹ A tshob bo ndù bo ghù benntùn tswe nsi tse tse num nenàfi.

⁴⁰ Bo tswe nsi nka, ta' nka ghù benntùn nkù, mo' ghù benntùn ṅam ntàn.

⁴¹ A lo' men ntu' bàn ntàn nà mba ngontse ndô bàa, mbù' miag mi mfe kamànyam, nde'te Nsi, mbe'te bàn, nke mfà ghazi'te nu i ndù bo ke nte mbwe bo; a bèn ngabte ngontse ndô bàa njoṅ benntùn fa.

⁴² Njoṅ yub fa jù, mbèn njwèle.

⁴³ Bo tse'te mbe'te bàn mba mbe'te ngontse mi a tù' là, a dun ntùm nkag ntshob bàa gham.

⁴⁴ Ben tse bo na' njù bàn nà, na' mb'a bandum ntsha' tàn.

Mba Yésu zin num ntse là

⁴⁵ Be ndùse, a nànte ghazi'te nu i ndù bo tsho ntùm kenu, mbwôg dut ntse, nèn mo' yoṅ dibantse nze Bètsaida, ngelaṅ tu wul i lé'te bwoṅ benntùn nà.

⁴⁶ A be faṅ yube, nèn num mbat nele'te Nsi.

⁴⁷ Njù be sène, kenu kum netèt ntse, Yésu ke' tù' i num tsha'a.

⁴⁸ A yen ndù ghazi'te nu i tshwèt ngùtni nedule, nummbe fetmbaṅ na' nke mfe à mbwe bo. A na' mb'a ngelaṅ njù tù' nelàn nà, a zin num dibantse, nse' mbaṅ bo, ndiag nekwé mbwe bo.

⁴⁹ Ngelaṅ bo yen a nke nzin num dibantse là, bo kwate ndù a b'a ghamèn, nkua' neta.

⁵⁰ Nummbe njoṅ yub fa lo yen i, tu tshob tshu', bo bwôg. Là tu wul i tshob bo ndende ndù: Bin fèn ntù, a b'a me, kà bin bwôg!

⁵¹ A ko' nèn mbaṅ bo, ntsho ntùm kenu, fetmbaṅ tsin. Bo tshàm ntshùate ntùm ntù tshobe,

⁵² nummbe bo lo ke lèn ntun yen bàn nà, ntù tshob lo ke nta neta.

⁵³ Bo be miagte nedule, nkum kaṅ ntse mbaṅ ngô Gènèsarèt, ntaṅ kenu bwe.

⁵⁴ Ngelaṅ bo tum kenu là benntùn yoṅ ndèn i,

⁵⁵ nkù nde nèn ntùm njoṅ ngô fa, nto' neket ghangokèt num nkun mube, nse' yi njoṅ dù' fa bo ju' ndù a be bwe là.

⁵⁶ Mba zit dù' lo z'a tsho bwe là, ntaṅla', ngô mba tshwèt, bo nke ndo' ghangokèt nse' njab dù' benntùn num ntse'te là, mbu' mbu yi ndù a faṅ ghangokèt kwag nda' tôg nzwe i; njoṅ benntùn fa tse bo kwag i là yate.