Marko 5 - NTSHOB NSI

Ngaghù ywètkebwô Gérasa

¹ Bo nèn, nkum mo' yoṅ dibantse, ntùm ngô ba Gérasa.

² Be kua' ngelaṅ Yésu tum ntùm kenu là, mo' mèn ze ywètkebwô ke ntô i là, tum ntùm ba' tufi, nse' mbumte bo yi.

³ Yen mèn nà lo ghù ze dù'ntswe à ntùm ba' tufi, sàm mèn ke bèn nku' nekul i mba ntùne.

⁴ Bo lo ke nkut nku mi mba mbu mi njoṅ ngelaṅ fa, là a be'te kebu' mba ntùne, sàm mèn ke ku' nelebt'é.

⁵ A lo ke mb'a ntùm ba' tufi mba num kônga njoṅ ngelaṅ fa, tèttswe' mba mbwôgtshù, nke nkua'a, mbèn nke ndab wul i num ndoṅ.

⁶ A be yen Yésu ngùanesà, nkù nde, nse' ngwù nsi mbwe i,

⁷ nkua' neta, ntshob yi ndù: Ke z'o ghù ntùm yàm nu, Yésu Mén Nsi mfe tù? Me bu' mbu wù num lén Nsi, kà ghùtni àm!

⁸ Nummbe Yésu lo tshob yi ndù: Ywètkebwô tum num yen mèn nà!

⁹ Yésu bèn mbètt'é ndù: Lén so b'a we? A bùnte yi ndù: Lén sàm b'a Légion, nummbe bag yàm.

¹⁰ A bèn mbu' mbu yi neshu ndù k'a sô yub ntùm ngô.

¹¹ A lo be be ndù mo' bwoṅ ngùnyàm be num mbat nke mfèt nenà.

¹² Ba ywètkebwô bu' mbu Yésu, ntshob ndù: Tum yag netèt tshen ngùnyàm ni ndù bag tsho num bo.

¹³ A bam bo. Ba ywètkebwô tum, ntsho num ba ngùnyàm nà; bwoṅ ngùnyàm nà z'a na' mbe nguan ntsha' bàa là, bùn tu mbat nswe' ngwù ntse, mbi mum ntse.

¹⁴ Ghabéb yub kù, nsoṅ yen tshô là ntùm ngô mba tshwèt; benntùn nèn neyen nu z'a lo netshùa là.

¹⁵ Bo kum mbaṅ Yésu, njen mèn nà ze ywètkebwô ke ntô i là, ndù a tswe nsi, ma' nzwe, nze'tu i bèn mbwô, yi z'a na' ngù Légion nà. Bwôg tshùb yube.

¹⁶ Ben tse bo na' njen nu ts'a na' ntshùa num mèn ze ywètkebwô ke ntô i mba num ba ngùnyàm nà, soṅ yube.

¹⁷ Bo to' nebu' mbu Yésu ndù a tum ntùm ngô yube.

¹⁸ Mb'a ke nèn tsho kenu là, mèn ze ywètkebwô na' nke ntô i là labt'é ndù a bam bo yi nène.

¹⁹ Yésu ke bam, là ntshob yi ndù: Nèn la' o mbaṅ fèt tsho, nsoṅ yub njoṅ mà nu fa tse Tshùaben ghù wù là, mba mb'a nyin o là.

²⁰ A nèn, nto' nesoṅ njoṅ mà nu fa Yésu ghù yi là, mà Dékapol; njoṅ benntùn fa tshàm.

²¹ Ngelaṅ Yésu bèn ndut ntse ntùm kenu, nkum mo' yoṅ dibantse là, bwoṅ benntùn yàm se' ntse'te mbaṅ i; a na' mb'a kaṅ dibantse.

Ngon Yairô

²² Mo' mèn netèt ghalôte sinagogue, lén se Yairô se', njen Yésu, ngwù num nku mi,

²³ mbu' mbu yi neshu, ntshob ndù: Metsit mén àm ze mènnzwi tù' à nekwù; netsho'o, se' njab mbu mu num i ndù a yate, njôge.

²⁴ Yésu nèn bo yi, bwoṅ benntùn yàm tam njam i, nzin nke mfél i.

²⁵ Mo' mènnzwi z'a na' ngù ntse kebwô fe ngu'njù ntshob bàa gham,

²⁶ njen nge' yàm mum mbu ghafu yàme, mbagte njoṅ tshu tse fa ke ghù fite, là ngokèl i bèn nke nèn mbwe là,

²⁷ be ju' nu mfà num nu Yésu, nse' netèt bwoṅ benntùn, nkwag nzwe Yésu njamnjam;

²⁸ nummbe a lo ke ntshob ntùm ntù i ndù: A be ze me kwag mba nda' nzwe i là, mba m'a' yate.

²⁹ Be ndùse ntse kebwô keb num i, a lèn ntùm wul i ndù ngokèl i yate.

³⁰ Num ngelaṅ mbile, Yésu lèn ndù mo' neta tum num i, nkaṅ wul i njam netèt bwoṅ benntùn, ntshob ndù: We z'a kwag nzwe àm à?

³¹ Ghazi'te nu i tshob yi ndù: O tshwèt mbètte ndù: We z'a kwag àm à, ndù o yen mba benntùn yàme, mbèn nke mfél o bag bag là.

³² A lôte bag bag neyen mènnzwi z'a ghù yen nu là là.

³³ Mènnzwi là bwôg, mvètte, nummbe a lèn ju z'a na' ngù num i là, a se' ngwù nsi mbwe i, ntshob njoṅ nunenùn fa yi.

³⁴ Là, a tshob yi ndù: Ngon àm, bamntù o yôg o, nèn fite, nge' o bèn mi.

³⁵ Mb'a ke nke' ntshob là, bo fe ju ngalôte sinagogue, ntshob ndù: Ngon o à kwù, numk'o bèn nke ngùtni ngatswit'à?

³⁶ Yésu ju' ke lo' men ntshob là mba nu là, ntshob ngalôte sinagogue ndù: Kà bwôg, bam nda' nebame!

³⁷ A ke bam ndù sàm mèn tam njam i k'a ke nda' Pétro, Yakobo mba Yohané, mfèt Yakobo.

³⁸ Bo be kum ndà ngalôte sinagogue, nju' tshu'te vù, benntùn nke ndàne, mbèn nke nkua' neshu.

³⁹ A tsho ndà, ntshob bo ndù: Numke bin nke ntshu'te, mbèn nke ndàn à? Mén i ke' nekwù, là, a nezi. Bo zwi i.

⁴⁰ Là yi, a sô njoṅ benntùn fa ntshag njù, ndo' tà mén bo màab mba ghazi'te nu i tse bo à bo be là, bo à bo tsho dù' ze mén na' mbe bwe là.

⁴¹ A tshùb bu mén nà, ntshob yi ndù: Tàlità kumi, yen nà bagt'a ndù: Ménngon, me tshob wù ndù: Lo tù!

⁴² Be ndùse, ménngon nà lo tù, nto' nezine; a lo be be ndù a ghù ngu'njù ntshob bàa gham. Be ndùse, bo tshàm, mbèn nyàmte yen nu là neshu.

⁴³ A tshù' yub ndù kà bo ghù sàm mèn lèn yen nu là, mbèn ntshob ndù bo fà jujù ménngon nà.