Marko 4 - NTSHOB NSI

Tànkùt num nufen mfe kamànyam

¹ A bèn nto' netswite nu kaṅ dibantse. Bwoṅ benntùn yàm se', ntse'te mbaṅ i, ndùlala a tsho ntùm kenu, ntswe num dibantse; njoṅ bwoṅ benntùn fa tswe num tsha' mbaṅ dibantse.

² A lo' tànkùt, ntswite nu yi bo yàm, ntshob bo ntùm ze netswite ndù:

³ Bin ju'u, tshù, ngama'nsa lo tum nke nèn nema' nsa.

⁴ Ngelaṅ z'a ke ma' là, mo' bag i vù kaṅ manze, bon nsaṅ se' mfèle.

⁵ Mo' bag i vù ntùm dù' ndoṅ, dù' tsha' na' mbe ke yàm bwe là, mbit ndende, nummbe tsha' lo ke tsho;

⁶ ngelaṅ nyam tum nà, a lab, njume, nummbe nga tse lo ke be bwe.

⁷ Mo' bag i vù ntùm dù' ngumndot; ngumndot ko' bo yi, mfam i, a ke yam.

⁸ Mo' bag i vù ntùm dù' tsha' mebwô, njam tsha tse, a ku', ngu'u, ngù miag mi yàme: Mo' tsha i ghù miag ṅam ntat, mo' ṅam ntôge, mo' nkù.

⁹ A bèn ntshob ndù: Mèn z'a ghù ntoṅ mi à neju' yi là, a ju'!

¹⁰ Ngelaṅ Yésu boa ben tse bo be mbaṅ i mba tse ntshob bàa gham tswe nda' tù' bo là, bo bètt'é tun yen tànkùt là.

¹¹ A tshob bo ndù: Bo fà tsham nufen Nsi bin, là mbe se' mba ben tse bo be njù là, njoṅ nu fa tswe bo à mba tànkùt là,

¹² ndùlala ndù bo ke ndôte yàme ke yen, bo ke nju' yàme ke tshùb ju bo ju' là, ndù kà bo kaṅ ntù tshobe, ndù Nsi lagte nukebwô tshobe.

¹³ A tshob bo ndù: Mba bin ke' lèn tun yen tànkùt li là, bin a' lèn njoṅ tànkùt fa à ndùke?

¹⁴ Ngama'nsa num ma' ntshob Nsi.

¹⁵ Kaṅ manze, dù' ze bo ma' ntshob Nsi bwe là, b'a benntùn tse bo num nju' ntshob Nsi, là Satan se' ndende, nsô ntshob mbit ntùm ntù tshob là.

¹⁶ Dù' ndoṅ, dù' ze bo ma' yub bwe là, fut'a benntùn tse bo num nju' ntshob Nsi, nkwé ndende ntùm tsiaṅte,

¹⁷ là, a ke ywim nga ntùm ntù tshobe, bo ke tswe yàme; ngelaṅ nge' mba netsho' nku kebàn se' bo num ntshob Nsi mi bo kwé là, bo yoṅ mfa'te bwe, ngwù nsi là.

¹⁸ Dù' ngumndot, dù' ze bo ma' tsemo' bwe là, b'a benntùn tse bo num nju' ntshob Nsi,

¹⁹ là nelab wut num yôg sub ntùm njù, nekô nu nkàb mba ghe'te nzenze se', ntsho ntùm ntù tshobe, mfam ntshob mbile, a ke yam ntàm mi là.

²⁰ Dù' tsha' mebwô, dù' ze bo ma' tshen ben ni bwe là, b'a benntùn tse bo num nju' ntshob Nsi, nkwé, mbèn njam ntàme: Mo' ṅam ntat, mo' ṅam ntôge, mo' nkù là.

²¹ A bèn ntshob ndù: Lambo ke nse' ndà ndù bo te à mum kab ke nete lakunndà à? Ke ndù bo te i num téblé à?

²² Mo' ju ke' be z'a na' ndeme, mbe ndù a ke tswite wul i là; mo' ju ke' be z'a na' mbe ntùm tsham ndù a ke tum njù mbwôgtshù là.

²³ A be ze mèn ghù ntoṅ mi à neju' yi là, a ju'!

²⁴ A bèn ntshob bo ndù: Bin bam nà num nu ze bin num nju' là! Bo nsi fi' zin à mfi' ze bin ke mfi' zin yi là, bèn kwi'te zine.

²⁵ Mèn z'a ghù ju là, mba bo a' fà mo' yi, là mèn z'a ke' ghù ju là, mba bo a' kwé mba z'a ghù là.

²⁶ A bèn ntshob ndù: Nufen Nsi be ndaṅndaṅ à mba mo' mèn z'a na' ma' nzwit ju ntùm tsha' là;

²⁷ k'a zi, k'a zi tshùalo, tèttswe' mba mbwôgtshù, mba ju z'a ma' ntùm tsha' là a' bit, nku'u, a ke lèn ju bwe.

²⁸ Tu wul i tsha' ghù nenà, mbèn ngù tsha i, mbèn ngù miag mi dun ntùm tsha i.

²⁹ Ngelaṅ tsha i tswe là, be ndùse a tum ghatsho' tshu, nummbe ngelaṅ netsho' tshu ku'u.

³⁰ A bèn ntshob ndù: Be be fà mfi' nufen Nsi à num ke? Be be yab i ntùm zit tànkùt à?

³¹ A b'a ndaṅndaṅ mba metsit nzwit tù ze bo na' njwit ntùm tsha' ndù a kag ntshùa njoṅ nzwit tshu fa ntùm njù là.

³² Ngelaṅ bo ywil i là, a ko', nsage, ntshùa njoṅ ntù fa, ngù nkaṅ mi mi ndùb, ndù bon nsaṅ mfe tù ku'ni nefite tun netshaṅ i.

³³ Yésu nke ntshùa num lèn tshen tànkùt là, ntshob ntshob Nsi bo be ndaṅndaṅ mba bo ku'ni neju' là.

³⁴ A lo ke ndo' à be tànkùt ntshob nu yi bo, là ngelaṅ boa ghazi'te nu i tswe tù' bo là, a tote njoṅ i fa bo.

Mba Yésu na' ngù fetmbaṅ mba ntse tsin nà

³⁵ A lo be sen lé'njù là, njù be sène, a tshob bo ndù: Be dut nkum mo' yoṅ dibantse.

³⁶ Bo faṅ bwoṅ benntùn, ndo' i be mb'a na' mbe ntùm kenu là, nèn yi; mba memo' nkenu lo be bo à bo.

³⁷ Mo' fetmbaṅ ndùb se', mbùnte ntse, kà ntse tsho ntùm kenu, a tù' nedune.

³⁸ Yésu lo ke nzi ndù a nô ntùm kenu, njab tu i num kù'kune. Bo bam i, ntshob yi ndù: Tà, o ke' nywin mba bag tshwèt nèn nebi là ké?

³⁹ A bam, ntshobte fetmbaṅ, ntshob dibantse ndù: Mi ntswe, fi! Fetmbaṅ tsin, dù' fi.

⁴⁰ A tshob bo ndù: Bin bwôg ndùlala numke? Bin ke' ghù bamntù ké?

⁴¹ Mo' mà bwôg ndùb tshùb njoṅ yub fa, bo nke ntshob bo bo ndù: A kua' ke lèn mèn ni kà fetmbaṅ mba dibantse nke nju' ntshu i à?