Marko 15 - NTSHOB NSI

Yésu mbwe Pilato

¹ Fe nkebnjù, ghale'te Nsi tse ndùbndùb ghù ntse'te boa ghakwé mbwe, ghalèn ṅwa'ni Nsi mba ntse'te ghatsho'te ntsha, ngù bo kut Yésu, nèn yi mfà Pilato.

² Pilato bètt'é ndù: O b'a mfen ba Yuda ké? Yésu bùnte, ntshob yi ndù: O tshob:

³ Ghale'te Nsi tse ndùbndùb nke ntete nu num i yàme.

⁴ Pilato bèn mbètt'é ndù: O ke' bùnte sàm nu ké? Tshù, bo tshwèt ntete nu num o yàme.

⁵ Yésu ke bèn mbùnte sàm nu. Yen nu là tshùa Pilato.

⁶ Njoṅ lé'njù jùa fa a lo ke nsô ta' ngandàtsha ze bo bètte là mfà bo.

⁷ Mo' mèn lo be bwe, lén se Baraba, ze bo na' nkul i boa ghatshu'tu tse bo na' nzwi mèn ntùm tshu'tu yub là.

⁸ Bwoṅ benntùn ko' nèn mbaṅ Pilato, nto' nebètt'é ju z'a num nke ngù bo là.

⁹ Pilato bùnte, ntshob bo ndù: Bin kô ndù me sô mfen ba Yuda ké?

¹⁰ Nummbe a lo lèn ndù ghe'te ghale'te Nsi tse ndùbndùb bèn ngù kà bo mfà i.

¹¹ Ghale'te Nsi tse ndùbndùb tènte bwoṅ benntùn ndù a bwô ndù Pilato kag à Baraba bo.

¹² Pilato bèn mbùnte, ntshob bo ndù: M'a' ghù à ke mèn ze bin num ntsiaṅ i ndù mfen ba Yuda l'à?

¹³ Bo bèn nkua' neta ndù: Kwimt'é num fanta'tù!

¹⁴ Pilato nke ntshob bo ndù: Nukebwô z'a ghù b'a ke? Bo bèn nkua' neta ndù: Kwimt'é num fanta'tù!

¹⁵ Pilato be ndiag ndù ntù bwoṅ benntùn bwô, nsô Baraba, mfà bo; ngù bo lab Yésu nshua'a, a fà i ndù bo kwimt'é num fanta'tù.

¹⁶ Ba soyé lo' i, nèn yi ntshundà ngomna, ntsiaṅ ntse'te njoṅ ba soyé fa.

¹⁷ Bo ma' nzwe meba num i, mbèn nte tshe'njô se bo ba' là tu i.

¹⁸ Bo to' netshabt'é ndù: Bag tsha't'o me mfen ba Yuda!

¹⁹ Bo lab i nka'nesoṅ, ntôg nkekùà num i, nkwim ntunkekwi' mub nsi mbwe i, ngamt'é.

²⁰ Ngelaṅ ze bo miagte netshabt'é là, bo sô nzwe meba, ma' nzwe tse num i, ndo' i nèn yi ndù bo kwimt'é num fanta'tù.

Mba bo kwimte Yésu num fanta'tù là

²¹ Bo tshùb mo' ntshùanze, a nke mfe tshwèt, lén se Simon ze Kiréna, tà Aléksaṅdre mba Rufô, ndù a ket fanta'tù Yésu.

²² Bo lo' Yésu nèn yi dù' ze bo na' nke ntsiaṅ ndù: Gôlgota là, yen nà bagt'a ndù: Nkatu.

²³ Bo nke mfà ndu' mi bo ma' mire bwe là yi, là, a ke kwé.

²⁴ Bo kwimt'é num fanta'tù, ngabte nzwe tse, ntam tô num neyen ju ze mèn lo' là.

²⁵ Bo lo kwimte Yésu à num mbatte nyam bwe'e.

²⁶ Bo kite nesoṅ tu nu z'a kwù bwe là ndù: Mfen ba Yuda.

²⁷ Bo kwimte Yésu boa fimntshu bàa, mo' num bag i ze zwim, mo' num ze kwéb. [

²⁸ Ndùlala ndù nu bo na' nkite ndù: Bo yab i netèt ben kebwô là bumte.]

²⁹ Ben tse bo ke ntshùa bwe là tshabt'é, nyi'te tu, ntshob ndù: U, wù z'o sate Ndà Nsi, bèn kul i mum lé'njù tat là,

³⁰ yôg tu wul o, nswe' num fanta'tù!

³¹ Ghale'te Nsi tse ndùbndùb boa ghalèn ṅwa'ni Nsi tshabt'é yub be ndaṅndaṅ netèt bo, ntshob ndù: A lo ke njôg à tsemo' ben, a ke' ku'ni neyôg tu wul i.

³² Kristô, mfen ba Israél, swe' num fanta'tù ndonni, bag yene, mbame. Ben tse bo kwimte yub bo à bo num fanta'tù là nke ntshabt'é.

³³ A be be njagnyam, njam sèn ntùm njoṅ dù' fa tà nèn nkum nyam tat.

³⁴ A be nyam tat, Yésu kua' nze neta, ntshob ndù: Eloï, Eloï, lama Sabaktani, yen nà bagt'a ndù: Nsi àm, Nsi àm, o ghua' àm numke?

³⁵ Tsemo' ben netèt tse bo be nsi là, be ju'u, nke ntshob ndù: Tshù, a ke ntsiaṅ à Elia.

³⁶ Mo' mèn kù nde nèn ntshù' ntsha nzwe ntùm tshùagkèt ndu', mfét tu nka'nesoṅ, mfà yi ndù a nu, ntshob ndù: Be faṅ nà, njen a be ze Elia se' nswe' i num fanta'tù là.

³⁷ Yésu kua' nze neta, nkwù.

³⁸ Nzwe Ndà Nsi bèt bag bàa fe tù nèn nkum mànsi.

³⁹ Tà ba soyé z'a tsin mbwe i là, be yen mb'a kwù ndùlala là, ntshob ndù: Kua' nenùne, yen mèn ni na' mb'a Mén Nsi.

⁴⁰ Mba bènnzwi lo be yub bwe, ntsin ngùanesà, nke ndôte mfe bwe, Maria ze Magdala, Maria mà Yakobo ze nke' mba Yôsé, mba Salômé lo be netèt tshen nà.

⁴¹ Tse bo na' ntam njam Yésu, mbèn nke mfa' yi ngelaṅ a be Galiléa là; tsemo' bènnzwi lo bèn mbe bwe tse boa Yésu ko' Yérusalém nà.

Mba bo tshoṅ Yésu là

⁴² Njù lo be sène, mb'a na' mb'a lé'njù nenabte, yen nà b'a ndù kà lé'njù Sabbat se' là,

⁴³ Yosèf ze Arimatia, mo' mèn netèt ghafà ntage, ze bo ke ngamt'é, mba yi bèn nke mbéb ze nufen Nsi là, fèn ntù, nse' ntsho ju Pilato, ndon i fe Yésu.

⁴⁴ Là Pilato tshàm mba Yésu à kwù là, ngù bo tsiaṅ tà ba soyé, a bètt'é, a be z'a ghubte mba Yésu kwù là.

⁴⁵ Ngelaṅ tà ba soyé soṅ i là, a fà fe Yésu Yosèf, ke kwé nda'.

⁴⁶ Yosèf jun nzwe, nswe' fe Yésu num fanta'tù, ndam i yen nzwe là, njab i ntùm fi se bo na' nabte ntùm loṅ nà, mbwoṅte mo' loṅ, nkabte ntshu fi.

⁴⁷ Maria Magdaléna mba Maria mà Yôsé lo ke ndôte dù' ze bo yab i bwe là.