Marko 14 - NTSHOB NSI

Tsham mba bo zwi Yésu là

¹ A lo be tù' lé'njù bàa Pasa mba bàn keko' be, ghale'te Nsi tse ndùbndùb mba ghalèn ṅwa'ni Nsi nke ndiag ntùm nkùnkù nze ze bo nsi tshùa bwe tshùb Yésu, zwi i là.

² Nummbe bo lo ke ntshob ndù: A ke' bwô ndù yen nu là b'a mum lé'njù jùa, mbwôg ndù kà tshu'te be netèt benntùn.

Mba mo' mènnzwi se' Yésu mfèt Bètania là

³ Ngelaṅ Yésu be Bètania ntùm ndà Simon ngankine, ntswe téblé là, mo' mènnzwi se' ndù a ghù ntshaṅ labinda nardo mebwô ze tanjoṅ, ntsit ntshaṅ, naṅ labinda num tu Yésu.

⁴ Tsemo' ben ya ntù, ntshob bo bo ndù: Numke bo bagte yen labinda li à?

⁵ Bo lo nku'ni neswèn yen labinda là nguan denario nkù tat, mfà bwoṅbwoṅ. Bo tshobte tun tô num yen mènnzwi là.

⁶ Là Yésu tshob bo ndù: Bin faṅ i là. Numke bin nke ngùtni i à? A fa' fa' mebwô num me.

⁷ Bin à bwoṅbwoṅ ke mbe njoṅ ngelaṅ fa; mba zit ngelaṅ no ze bin kô là, bin ku'ni neywimte yube, là bag à bin ke ke mbe njoṅ ngelaṅ fa.

⁸ Ju z'a ku'ni ndù a ghù là, a ghù: Nummbe a bwôgmbwe nse' wul àm labinda kà bo tshoṅ àm.

⁹ Kua' nenùne, me tshob bin ndù: Njoṅ dù' fa tse bo nsi ke tshob nkùn mebwô bwe ntùm njoṅ ngô njù fa là, bo nsi ke soṅ mba ju z'a ghù là, num nekwimte lén se yi.

Mba Yuda diag neswèn Yésu là

¹⁰ Yuda Iskariot mo' mèn netèt tse ntshob bàa gham, nèn ntèt ghale'te Nsi tse ndùbndùb num nefà Yésu bo.

¹¹ Bo be ju'u, ntsiaṅte, mbù nkàb yi; a diag manze z'a nsi tshùa bwe kà fà i bo ngelaṅ mebwô là.

Jujù Pasa. Jujù nelàne

¹² A be mbwe lé'njù bàn keko' ze bo ke nzwite bon njùmbwe Pasa num jule'te Nsi là, ghazi'te nu Yésu tshob yi ndù: O kô ndù bag nèn à yà nabte jujù Pasa o jù à?

¹³ A tum tse bàa netèt ghazi'te nu i, ntshob bo ndù: Bin nèn ntùm ngô, mèn ze bin à bo bumte ndù a ket tshaṅ ntse là, bin tam njam i.

¹⁴ Dù' z'a nsi tsho bwe là, bin tshob tàndà ndù: Ngatswite tshob ndù: To'ndà ze me nsi jù Pasa bwe bag à ghazi'te nu àm nà b'a yà?

¹⁵ Tu wul i nsi la'te to'ndà ndùb bin mfe tù ndù a nabte kua' mebwô. A b'a bwe là ze bin nsi nabte tse be tshu bwe là.

¹⁶ Ghazi'te nu i nèn, nkum ntùm ngô, ntèt njoṅ tshu fa be ndaṅndaṅ mb'a lo ntshob bo là, nabte Pasa.

¹⁷ Njù be sène, a se' boa tse ntshob bàa gham.

¹⁸ Ngelaṅ bo tswe téblé, nke njù jujù là, Yésu tshob ndù: Kua' nenùne, me tshob bin ndù mo' mèn netèt bin ze bag yi tshwèt njù jujù là nsi swèn àm.

¹⁹ Bo to' nenywine, ntshob yi ntshù' ntshù' ndù: A ke b'a me ké?

²⁰ Là, a tshob bo ndù: A b'a mo' mèn netèt tse ntshob bàa gham ze bag yi be ntshag bu ntùm ka là.

²¹ Mbe se' mba Mén mèn nà, a nèn à ndaṅndaṅ mba bo na' nkite num i là, là nge' tu mèn yen nà ze bo nsi tshùa njam i kà swèn Mén mèn nà. A lo bwô yen mèn nà ndù kà bo bwe i mba nebwe.

²² Ngelaṅ bo ke njù jujù là, Yésu lo' bàn, nde'te Nsi, mbe'te, mfà bo, ntshob ndù: Bin ko là, yen ni b'a wul àm.

²³ Mbèn ndo' ntu', nde'te Nsi, mfà bo; bo nu ntùm bwe njoṅ yub fa.

²⁴ A tshob bo ndù: Yen ni b'a lem tshàm tse kàn, tse bo fètte num tu benntùn yàm nà.

²⁵ Kua' nenùne, me tshob bin ndù: Me ke nsi bèn nu ndu' tà nkum sen lé'njù là se me nsi bèn nu ndu' nswe ntùm nufen Nsi là.

Mba Yésu tshob ndù Pétro nsi gha i là

²⁶ Bo be miagte neyob kwi, ntum nèn num mbat ntene.

²⁷ Yésu tshob bo ndù: Njoṅ zin fa nsi vù ntùm ywi', nummbe bo lo kite ndù: Me nsi lab ngabéb njùmbwe, njùmbwe sate.

²⁸ Là ngelaṅ me nsi lo num vù là, m'a' kwé mbwe bin Galiléa.

²⁹ Là Pétro tshob yi ndù: A be ze njoṅ yub fa vù ntùm ywi' là, mb'a ke me.

³⁰ Yésu tshob yi ndù: Kua' nenùne, me tshob wù ndù: Sènni, yen tèttswe' li, kù'ngab nsi be tô yoṅ bàa, ndù o à gha àm yoṅ tat.

³¹ Pétro tshob ntùm nta'nku ndù: A be z'a bwô ndù me kwù bag wù là, mba me ke nsi gha o tshàm. Njoṅ yub fa tshob be ndaṅndaṅ.

Gétsémané

³² Bo kum ntùm mo' dù' lén se Gétsémané, a tshob ghazi'te nu i ndù: Bin tswe nsen ni tà nkum ngelaṅ me nsi miagte nele'te Nsi là.

³³ A lo' Pétro, Yakobo mba Yohané, nto' nevèt mbwôge, mba netswe zwe.

³⁴ A tshob bo ndù: Ntù àm tshwèt nywin tà ntù' b'a ze vù. Bin tswe nsen ni, nzi tshùalo.

³⁵ A nèn mbwe mén nda'nda', ngwù nsi, nde'te Nsi ndù yen nyam nge' là tôg i, a be z'a kô là.

³⁶ A nke ntshob ndù: Abba, Tà, o ku'ni neghù njoṅ nu fa, lo' yen ntu' li nèn yi ngùanesà mbaṅ àm. Là kà ghù ju ze me kô là, là ju z'o kô là.

³⁷ A bèn njam, njen yub ndù bo tshwèt nzi, a tshob Pétro ndù: Simon, o tshwèt nzi ké? O ke' ku' nezi tshùalo mba nda' ta' nyam ké?

³⁸ Bin zi tshùalo nde'te Nsi ndù kà bin tsho ntùm laṅte. Ywèt num mbame, là mbàb wut nke mbole.

³⁹ A bèn nde'te Nsi, ntshob be ntshob ntshù'.

⁴⁰ A bèn njam, njen yub bo bèn nke nzi, nummbe bo lo ke ntshaṅkèt miaglo. Bo ke bèn ndèn nu ze bo tshob yi là.

⁴¹ A se' num mbatte yoṅ tat, ntshob bo ndù: Bin zi ndonni, mfite wut tsine, a ku'u. Ngelaṅ se'e, tshù, bo tshwèt nswèn Mén mèn mum mbu ben kebwô.

⁴² Bin lo nsi bag à bin nène; tshù, mèn z'a tshwèt nswèn àm nà ghebte.

Mba bo tshùb Yésu là

⁴³ Be ndùse, mb'a ke nke' ntshob là, Yuda, mo' mèn netèt tse ntshob bàa gham, se' boa bwoṅ benntùn tse ghale'te Nsi tse ndùbndùb, ghalèn ṅwa'ni Nsi mba ghakwé mbwe tum yub là ndù bo tshùb ṅwi mba nzwit mbu bo.

⁴⁴ Ngaswèn Yésu lo fà lèn bo, ntshob ndù: Mèn ze me nsi nyô nge' mi là, a b'a yi, bin tshùb i, nèn yi mebwô.

⁴⁵ A yoṅ mbe kume, nkù'te nse' mbaṅ i, ntshob yi ndù: Rabbi, nyô nge' mi.

⁴⁶ Bo yab mbu num i, ntshùb i.

⁴⁷ Mo' mèn netèt ben bo tswe mbaṅ i là, sô ṅwi, ndab tshe' ngale'te Nsi ze ndùb yi, nkeb toṅ i.

⁴⁸ A ndùlala, Yésu tshob bo ndù: Bin tum, ndo' ṅwi mba nzwit, nse' neghom àm yi mba me b'a fimntshu là.

⁴⁹ Njoṅ lé'njù fa me lo ke mbe netèt bin ntùm Ndà Nsi, nke ntswite, bin ke tshùb àm. Là, a b'a ndù ju ze bo na' nkite là bumte.

⁵⁰ Njoṅ yub fa faṅ i nkù.

⁵¹ Mo' ménnshum tam njam i ndù a lam wul i nda' kam nzwe.

⁵² Bo tshùb i, là, a faṅ nzwe, nkù tunntôg.

Yésu mbwe Kaïfa

⁵³ Bo lo' Yésu, nèn yi ju ngale'te Nsi ze ndùb. Njoṅ ghale'te Nsi tse ndùbndùb, ghakwé mbwe mba ghalèn ṅwa'ni Nsi fa tse'te.

⁵⁴ Là Pétro nke ntam njam i tà ngùanesà tà nèn nkum tà ntshundà ngale'te Nsi ze ndùb, ntswe nsi boa ghafa' tse, nke njôg mbwôge.

⁵⁵ Ghale'te Nsi tse ndùbndùb mba njoṅ ntse'te ghatsho'te ntsha fa nke ndiag kwénta ze bo nsi yab num Yésu kà zwi i là, ke yen.

⁵⁶ Nummbe benntùn yàm lo ke nkwé nta tatte num i, là yub nekwénta ke tamte.

⁵⁷ Tsemo' ben bèn ndo tù, nkwé nta tatte num i, ntshob ndù:

⁵⁸ Bag lo ju' a tshob ndù: Me nsi sate yen Ndà Nsi li ze bu mènntùn kut là, bèn kut mo' mum lé'njù tat, ze bu mènntùn ke bèn ngù ju bwe là.

⁵⁹ Là mba nsen ni yub nekwénta ke tamte.

⁶⁰ Ngale'te Nsi ze ndùb tsin tù netèt ntse'te, mbètte Yésu ndù: O ke' bùnte sàm nu ké? Ke ze tshen ben ni tshwèt ntete num o à?

⁶¹ Là Yésu mi ntswe, ke bùnte sàm nu. Ngale'te Nsi ze ndùb bèn mbètt'é, ntshob ndù: Wù, o b'a Kristô, mén ngambotni ké?

⁶² Yésu tshob ndù: Me b'a yi. Bin nsi yen Mén mèn ndù a tswe num bag bu neta ze zwim, a nsi se' boa ndot kamànyam.

⁶³ Là ngale'te Nsi ze ndùb fag nzwe tse, ntshob ndù: Be bèn ndiag ghakwénta numke?

⁶⁴ Bin ju' mb'a tshwèt ntshabte Nsi là. Bin kwate ndùke? Njoṅ yub fa keb ntsha ndù a ku'ni mèn vù.

⁶⁵ Tsemo' benntùn to' netôg nkekùà num i, nkabte se i, ndab i, ntshob yi ndù: Tshobe, we z'a lab o à? Bônke' kwé i, ntsham i.

Mba Pétro gha Yésu là

⁶⁶ A lo be be ndù Pétro tswe nsi ntshundà; mo' mènnzwi netèt ghafa' ngale'te Nsi ze ndùb se'

⁶⁷ njen Pétro ndù a nke njôg mbwôge, a lôt'é, ntshob yi ndù: Mba wù lo be bin Yésu ze Nazarèt.

⁶⁸ Là, a gha, ntshob ndù: Me ke' lèn ke bèn nju' nu z'o tshwèt ntshob là. A tum, nkum nze ntshundà, kù'ngab tô.

⁶⁹ Ngafa' ze mènnzwi bèn njen Pétro, nto' nebèn ntshob ben tse bo be bwe là ndù: Yen mèn ni b'a mo' mèn yub.

⁷⁰ Pétro bèn nga. A be ghubte mén nda'nda', ben tse bo be bwe là nke ntshob Pétro ndù: Kua' nenùne, o b'a mo' mèn netèt tshen ben nà, nummbe o b'a mén Galiléa.

⁷¹ A to' nema' njom, nkàn mfe, ntshob ndù: Me ke' lèn tsham yen mèn nà bin tshwèt ntshob là.

⁷² Be ndùse, kù'ngab tô mbatte yoṅ bàa. Pétro kwimte ntshob mi Yésu lo ntshob yi là ndù: Kù'ngab nsi be tô yoṅ bàa ndù o à gha àm yoṅ tat là. A to' nekua'a.