Marko 13 - NTSHOB NSI

Nesate Ndà Nsi

¹ A be tum Ndà Nsi, mo' mèn netèt ghazi'te nu i tshob yi ndù: Ngatswite, tshù mo' lèn ndoṅ mba mba' njene!

² Yésu tshob yi ndù: O tshwèt njen men mba' ndùbndùb li! Bo ke nsi faṅ loṅ num loṅ ke sate.

Miagte ngelaṅ

³ Là ngelaṅ a tswe nsi num mbat nten mbwe Ndà Nsi là, Pétro, Yakobo, Yohané mba Andréa bètt'é tù' bo ndù:

⁴ Soṅ yag ngelaṅ tshen tshu là nsi se' là mba lèn z'a nsi la'te ndù tshen tshu là tù' nebumte là.

⁵ Yésu to' netshob bo ndù: Bin bam nà, kà mèn fùte zine.

⁶ Benntùn yàm nsi se' lo' lén sàm tshob ndù: A b'a me bèn mbe Kristô; bo nsi fùte benntùn yàme.

⁷ Ngelaṅ bin ju' nu ntsho mba tshu'te ntsho là, kà bin vètte; a bwô ndù tshen tshu là se'e, là, a ke' yoṅ mb'a miagte nu.

⁸ Nummbe mo' ngô nsi lo, ma' mo' ngô ntsho; mo' nufen lo, ma' mo' nufen ntsho. Tsha' nsi nyi'te ntùm dù' nzenze, nziku' bèn mbe. Tshen nà b'a neto'te ya là.

⁹ Bin bam nà num tu wut tsine. Bo nsi tshùb zin fà ntùm ndàntsha mba ntùm sinagogue, lab zin nshua'a, te zin tù mbwe ngomna mba fenfen num àm ndù a be ju nekwé nta bo.

¹⁰ A bwô bin bwôgmbwe ntshob nkùn mebwô ntùm njoṅ ngô fa.

¹¹ Ngelaṅ bo nsi lo' zin nèn yi ndàntsha là, kà bin bwôgmbwe ndab wut tsin num nu ze bin nsi tshob là; njoṅ nu fa bin nsi tshob là, bin a' kwé à ndùse, nummbe Ywèt Nelàn nsi bèn tshob num zin tu.

¹² Mèn nsi ghù bo zwi mfèl i mba mén i; bon nsi ya ntù tà yub mba mà yub, zwi yube.

¹³ Njoṅ benntùn fa nsi bàn zin num lén sàm; là mèn z'a nsi fènte tà nèn miagte là, mba yen mèn nà nsi yôge.

¹⁴ Ngelaṅ bin nsi yen nebagte mba nesate tsin dù' z'a lo mbe ke bwô ndù a tsin bwe là (wù z'o tshwèt nsiaṅ nà, ju' mebwô). A bwô ndù ben tse bo be Yudéa là kù nèn num mbale;

¹⁵ mèn z'a be mfe num tuba' là, k'a swe' ntsho ndà i num nelo' ju z'a nèn yi là;

¹⁶ mèn z'a be mà tshwèt là, k'a bèn njam nelo' kummbaṅ se.

¹⁷ Nge' num bènnzwi tse bo be jùm nà mba tse bo tshwèt nyô bon nà num tshen lé'njù là!

¹⁸ Bin le'te Nsi ndù kà yen nu là se' à ndù sàne,

¹⁹ nummbe tshen lé'njù là nsi b'a ntùm nge' ze mèn ke' yoṅ nto' yen lèn i fe ngelaṅ Nsi nabte njù tà nkum ndonni, mbe ndù lèn i ke nsi bèn be là.

²⁰ A be ze Nsi ke' sébte tshen lé'njù là là, mba sàm mèn ke nsi yôge, là, a tshùa num ben ts'a tsho' yub là, nsébte tshen lé'njù là.

²¹ A be ze mèn tshob bin ndù: Tshù, Kristô b'a nsen ni, tshù, a b'a nsen nà là, kà bin bam.

²² Tsemo' benntùn nsi lo tatte, tshob ndù bo b'a Kristô, tsemo' bèn ntatte, ntshob ndù bo b'a ghatshob ntshob Nsi; bo nsi ghù nsa mba nu netshàme, num nefùte ben tse Nsi tsho' yub là, a be ze bo ku'ni là.

²³ Là bin bam nà, me bwôgmbwe nsoṅ zin njoṅ nu fa.

²⁴ Là num tshen lé'njù là, nge' a' be mi, lagnyam sèn, maṅwù ke bèn mfà nka' i,

²⁵ nsa mfe kamànyam nsi vùte nsi, neta ts'a be kamànyam nà bèn nyi'te.

²⁶ Yen ngelaṅ nà, bo nsi yen Mén mèn se' ntùm ndot boa neta yàme, mba nkuni.

²⁷ A nsi tum ba Angél, a nsi tse'te ben ts'a tsho' yub là num bag njù kuà fe num ndù tsha' nèn nkum ndù kamànyam.

²⁸ Bin zi'te yen tànkùt li, ndo' mfi' num nga'lone: Ngelaṅ nkaṅ mi tshwèt mfite, mfu mi tum nà, bin num ndèn ndù dum ghebte.

²⁹ Be ndaṅndaṅ mba bin zin, ngelaṅ bin nsi yen tshen tshu là se' là, bin lèn ndù a ghebte nzendà.

³⁰ Kua' nenùne, me tshob bin ndù: Yen zwiaṅ benntùn ni ke nsi tôge, ke be ndù njoṅ tshen tshu là fa se'e.

³¹ Kamànyam mba tsha' nsi tôge, là ntshob màm ke nsi tôge.

³² Mbe se' mba sen lé'njù là ke nyam lo, sàm mèn ke' lèn, mba ba Angél mfe kamànyam, mba Mén mèn, là nda' Tà tù' i.

³³ Bin bam nà, nzi tshùalo, nummbe bin ke' lèn yen ngelaṅ nà.

³⁴ A b'a ndaṅndaṅ mba mo' mèn z'a be nèn nkatte, mfaṅ ndà i, mfà ngù' bônke' tse, mfà mba se fa' we lo, ntshob ngabéb nzendà ndù a zi tshùalo là.

³⁵ Ndùlala bin zi tshùalo, nummbe bin ke' lèn ngelaṅ tàndà nsi se' là, k'a mfetnjù lo, k'a tshaṅ tèttswe' lo, k'a ntô kù'ngab lo, k'a nkebnjù lo,

³⁶ ndù k'a be se' ntèt zin bin nke nzi.

³⁷ Ju ze me tshob bin nà, me num ntshob njoṅ benntùn fa: Bin zi tshùalo!