Marko 12 - NTSHOB NSI

Tànkùt ghadiaṅ nkùa

¹ Yésu to' netshob bo ntùm tànkùt. Mo' mèn lo bwe nkùa, nkut kàb ndiaṅ i mbume, nabte njoṅ tshu fa, nkut ndà nebéb dù', njab ghadiaṅ nkùa bwe, nèn katte.

² Ngelaṅ be ku'u, a tum mo' tshe' i ghadiaṅ nkùa ndù a kwé tshu nkùa ghadiaṅ nkùa.

³ Bo ghom i, ndab i, nta' i, a bèn mbu mbu.

⁴ A bèn ntum mo' tshe' i bo. Bo lab i, ntshabt'é.

⁵ A bèn ntum mo' tshe' i mo' yoṅ i. Bo zwi yen nà. A bèn ntum tsemo' yàme. Bo lab tsemo'o, nzwite tsemo'o.

⁶ Mo' mén lo tù' ntshù': Mén i z'a num nkô i neshu là. A be miagte, a tum i bo, ntshob ndù: Bo a' bwôg mén àm.

⁷ Là tshen ghadiaṅ nkùa là tshob bo bo ndù: Yen ni b'a njùndà. Bin se' be nèn nzwi i, ntsi' nsi tù' mi be.

⁸ Bo tshùb i, nzwi, ma' njam nkùa.

⁹ Ngankùa nsi ghù à ndùke? A nsi se' zwite ghadiaṅ nkùa, yab tse ghua ntùm nkùa.

¹⁰ Bin ke' siaṅ nu bo na' nkite ndù: Loṅ se ghabomndà na' ngua' là kaṅ ntù' loṅ ntôgndà;

¹¹ a b'a fa' Tshùaben, mbèn mbe ju netshàm num miag mage.

¹² Bo nke ndiag neghom i, mbwôg bwoṅ benntùn, nummbe bo lo lèn ndù Yésu tshob yen tànkùt là mfà à num bo. Bo faṅ i, ndo nène.

Nsi mba Kàsà

¹³ Bo tum tsemo' ba Férésia mba ben Hèrodé mbaṅ i ndù bo lo' ta' ntshob mbùn i yi.

¹⁴ Bo se', ntshob yi ndù: Ngatswite, bag lèn ndù o b'a ngatshob nenùne, ke be bwôg sàm mèn, nummbe o ke' be lôte se benntùn, là o num nke ntswite manze Nsi ntùm nenùne. Ntshù' bam ndù mèn fà ntshub Kàsà mb'a bwô ké, ke nga à? Bag fà ké, ke bag ke fà à?

¹⁵ A lèn nkùnkù yub, ntshob ndù: Bin laṅt'àm numke? Bin lo' denario, nse' yi, me yene.

¹⁶ Bo lo' ta' i, mfà yi. A tshob bo ndù: A tu we li num bwe, a lén we li num bwe à? Bo tshob yi ndù: A b'a ze Kàsà.

¹⁷ Yésu bùnte, ntshob bo ndù: Tshu Kàsà, bin fà Kàsà; tshu Nsi, bin fà Nsi. Bo tshàm neshu.

Nelo num vù

¹⁸ Ba Sadukaï tse bo ke ntshob ndù nelo num vù ke' be là, se' ntèl i, mbètt'é, ntshob ndù:

¹⁹ Ngatswite, Mosé lo kite bag ndù: A be ze mfèt mèn kwù, mfaṅ nzwi i; mén ke be yi là, mb'a bwô ndù yen mèn nà lo' yen mènnzwi là, mbwe bon, ngù nzwit mfèl i yi.

²⁰ Tsemo' fèt sammbàa lo be bwe. Mbwe i so mènnzwi, nkwù ke faṅ nzwit.

²¹ Mbatte bàa so i, nkwù ke faṅ nzwit. Mbatte tat be be ndaṅndaṅ.

²² Njoṅ yub ntu sammbàa fa lo' i, nkwù ke faṅ nzwit. Mènnzwi bèn nkwù ze.

²³ Ngelaṅ ze nelo num vù nsi ku'u, bo lo num vù njoṅ yub fa là, mènnzwi nsi b'a ze we netèt bo, mba njoṅ yub sammbàa fa so i l'à?

²⁴ Yésu bùnte, ntshob bo ndù: Bin fàn manze, nummbe bin ke' lèn ju ze bo na' nkite là mba neta Nsi.

²⁵ Nummbe ngelaṅ bo nsi lo num vù là, bo ke nsi so mènnzwi, ke bèn mfà ngonngon tshob ntùm nandà, là bo nsi be à mba ba Angél mfe kamànyam nà.

²⁶ Mbe' se' mba ben tse bo na' nkwù ndù bo nsi bèn lo num vù là, bin ke' yoṅ nsiaṅ tshô tswe'fiaṅe ntùm ṅwa'ni Mosé, nju' mat mba Nsi na' ntshob yi ndù: Me b'a Nsi Abraham mba Nsi Isak mba Nsi Yakob ké?

²⁷ A ke' b'a Nsi fe ben, là a b'a Nsi ben bo be ntùn nà. Bin fàn manze neshu.

Ntshù' Nsi mi ndùb

²⁸ Mo' mèn netèt ghalèn ṅwa'ni Nsi z'a na' nju' mba bo soṅte ntshob, njen ndù Yésu lo bùnte bo mebwô là, se' ntèl i, mbètt'é ndù: Netèt ntshù' Nsi a mit bèn mbe mbwe njoṅ i fa à?

²⁹ Yésu bùnte ndù: Mbwe ntshù' b'a ndù: Ju' me Israél, Tshùaben Nsi be bèn mbe nda' Tshùaben tù' i.

³⁰ Ke nkô tàan Nsi o njoṅ ntù o fa, njoṅ zwiag so fa, njoṅ nkwatenu mu fa mba njoṅ yu neta fa.

³¹ Tshù mbatt'é li: Ke nkô mèn z'a ghebte mbaṅ o là mba tu wul o là. Memo' ntshù' ke bwe mi a kwé mbwe men ni là.

³² Ngalèn ṅwa'ni Nsi tshob yi ndù: Ngatswite, a bwô, o tshob à nenùn ndù: A yi bèn mbe Nsi tù' i, mo' ke bèn mbe,

³³ ndù nekô i njoṅ ngô ntù fa, njoṅ zenu fa, njoṅ neta, mbèn nkô mèn z'a ghebte mba tu wut mèn nà, yen nà tshùa njoṅ nzenze tshu nele'te Nsi yi fa.

³⁴ Yésu be yen ndù yen mèn ni bùnte yi ntùm zenu, ntshob yi ndù: O ke' b'a ngùanesà num nufen Nsi. Sàm mèn ke bèn mfèn ntù nebètt'é nu.

Kristô mén David

³⁵ Yésu bèn nto' netswite ntùm Ndà Nsi, ntshob ndù: Be ghalèn ṅwa'ni Nsi tshob ndù Kristô b'a mèn David à ndùke?

³⁶ Tu wut David lo tshob ntshùa njam Ywèt Nelàn ndù: Tshùaben tshob Tshùaben àm ndù: Tswe num bag bu àm ze zwim tà nkum ngelaṅ me nsi ma' ghakeban tsho nsi tun nku mu là.

³⁷ Tu wut David tsiaṅ i Tshùaben; be a bèn mbe mén i à ndùke? Bwoṅ benntùn yàm nke nju' i ntùm tsiaṅte.

Mba Yésu tshobte ghalèn ṅwa'ni Nsi là

³⁸ A lo ke mbèn ntshob ntùm ze netswite ndù: Bin bam nà num ghalèn ṅwa'ni Nsi tse bo num nkô neket ngale, nkatte ndù benntùn ke ntsha'te yub num manze,

³⁹ nkô netswe mbwe ndiaṅ ntùm ba sinagogue mba mbwe dù' ntùm dù' jujù,

⁴⁰ nkô nekwé jujù fôg bènnzwi, mbe tatte benntùn, nke nde'te Nsi a sag là. Bo a' se' ngwù ntsha z'a tshùate là.

Jule'te Nsi mfôg mènnzwi

⁴¹ Yésu tswe nsi mbaṅ koṅ nkàb Ndà Nsi, nke ndôte mba bwoṅ benntùn tshwèt ma' nkàb ntùm koṅ nà. Ghankàb yàm ma' yàme.

⁴² Mo' mbwoṅ mfôg mènnzwi lo se'e, ma' nkeba mbàa ts'a be ta' kodran ntshù' là.

⁴³ Yésu tsiaṅ ghazi'te nu i mbaṅ i, ntshob bo ndù: Kua' nenùne, me tshob bin ndù: Yen mbwoṅ mfôg mènnzwi li ma' nkàb ntshùa njoṅ ben fa tse bo ma' nkàb ntùm koṅ nà.

⁴⁴ Nummbe njoṅ yub fa sô bag ju à num z'a kwi'te num nkàb yub là kà ma' ntùm koṅ, là yen mfôg mènnzwi li sô ntùm bwoṅ i njoṅ tshu fa ts'a ghù là, njoṅ tshu fa ts'a ghù num nelo' njôg yi là, kà ma' ntùm koṅ.