Marko 11 - NTSHOB NSIMba Yésu tsho Yérusalém nà ( Mat. 21.1-11 ; Luk. 19.28-40 ; Yoha. 12.12-19 ) 1 Ngelaṅ bo ghebte Yérusalém mbwe Bètfagé mba Bètania mbaṅ mbat nten nà, Yésu tum tse bàa netèt ghazi'te nu i, 2 ntshob bo ndù: Bin nèn ntùm yen ngô là z'a mbwe bin nà. Bin nsi yoṅ be tsho bwe, yen mén kekwèn ndù bo taṅ i, ze mèn ke' yoṅ nko' num i là. Bin ké' i, ndo' i nse' yi. 3 A be ze mèn tshob bin ndù: Bin ghù à ke nsen nà à? Bin tshob yi ndù: Tshùaben diag i; a nsi ba' i wù be nsen ni kua' ndende. 4 Bo nèn, njen mén kekwèn ndù bo taṅ i ntshundà num mfagte manze, bo ké' i. 5 Tsemo' ben netèt benntùn tse bo be bwe là tshob bo ndù: Bin ghù à ke nsen nà, kà nke nké' kekwèn à? 6 Là bo tshob mba Yésu lo ntshob bo là. Bo faṅ bo nèn yi. 7 Bo lo' mén kekwèn, nse' mfà Yésu, ma' nzwe tshob num i, a tswe num i. 8 Benntùn yàm nyit nzwe tshob num manze, tsemo' bèn naṅ ntshùantù mi bo keb ntùm nà là bwe. 9 Ben tse bo be mbwe mba tse bo be njam nà, kua', ntshob ndù: 10 Mbotni be nufen tà yag David, z'a tshwèt nse' là. Hôsanna tà mfe tù! Tù mbatsi ke ntàme ( Mat. 21.18-19 ) 11 Yésu tsho Yérusalém ntùm Ndà Nsi, ndôte njoṅ tshu fa. Mba njù ke nsèn nà, a tum nèn Bètania boa tse ntshob bàa gham. 12 Bo be tum Bètania nkebnjù, nziku' ya Yésu. 13 A yen tù mbatsi ngùanesà ndù mfu mi yàm, a nèn nelôte a be ze ntàm mi be bwe là. Ngelaṅ a kum mbaṅ bwe là, a ke fon sàm ju k'a ke nda' mfu mi, nummbe a lo ke b'a ngelaṅ z'a num njam nà. 14 A ndùlala, Yésu tshob tù mbatsi là ndù: Be mèn ke bèn njù ntàm mu mba yoṅ ntshù'! Ghazi'te nu i ju' men ntshob là. Nelànte Ndà Nsi ( Mat. 21.12-17 ; Luk. 19.45-48 ; Yoha. 2.13-22 ) 15 Bo zin nkum Yérusalém. Ngelaṅ a tsho Ndà Nsi là, a to' neta' ben tse bo ke nswèn tshu mba ben tse bo ke njun tshu ntùm Ndà Nsi là, ntèn téblé ghabate nkàb mba ndiaṅ ghaswèn mbwoṅsaṅe, ntamte nsi. 16 A ke bam sàm mèn ket ju ntshùa yi ntùm Ndà Nsi. 17 A tswite yub ntshob ndù: Bo lo ke kite ndù: Bo nsi tsiaṅ ndà àm, ndà le'te Nsi num njoṅ nzwit benntùn fa ké? Là bin ghù à kaṅ ntù' ngab ba tshô. 18 Ghale'te Nsi tse ndùbndùb mba ghalèn ṅwa'ni Nsi ju', nke ndiag mba bo nsi zwi i là; là bo bwôg i, nummbe njoṅ benntùn fa lo ke nyàmte nu z'a ke ntswite là neshu. 19 Njù lo be sène, Yésu tum ntùm ngô. 20 Bo be tshùa mo' nkebnjù, njen tù mbatsi ndù a jum fe num nga tse. 21 Pétro kwimte ntshob yi ndù: Rabbi, tshù, tù mbatsi s'o lo nso ndon tu i là jum. 22 Yésu bùnte, ntshob bo ndù: Bin ghù bamntù num Nsi! 23 Kua' nenùne, me tshob bin ndù: A be ze mèn tshob yen mbat li ndù: Tsho' nsen nà, ngwù ntùm dibantse, mbe ndù a ke' ghù magte ntù i, là mbam ndù ju z'a tshob là a' bumte là, mb'a nsi be be ndaṅndaṅ num i. 24 A ndùlala, me tshob bin ndù: Njoṅ tshu fa tse bin num ndon ntùm nele'te Nsi là, bin bam ndù bin a' kwé, mb'a nsi be be ndaṅndaṅ num bin. 25 Ngelaṅ bin tsin tù nele'te Nsi là, bin lagte nu tse benntùn ghù bin nà, ndùlala ndù Tà zin z'a be kamànyam nà lagte ze min mfànnu. [ 26 A be ze bin ke' lagte là, mba Tà zin z'a be kamànyam nà ke nsi lagte ze min mfànnu.] Dù' ze ngù' Yésu fe là ( Mat. 21.23-27 ; Luk. 20.1-8 ; Yoha. 2.18-21 ) 27 Bo bèn nèn Yérusalém. Ngelaṅ Yésu ke nzinte Ndà Nsi là, ghale'te Nsi tse ndùbndùb, ghalèn ṅwa'ni Nsi mba ghakwé mbwe nse' mbaṅ i, 28 ntshob yi ndù: O ke ngù tshen nu li à ntùm zit ngù' à? We bèn mfà yen ngù' neghù tshen nu li wù à? 29 Là Yésu bùnte bo ndù: Mba me nsi bètte zin ta' nu ntshù'. Bin bùnte me, mba m'a' soṅ zin ngù' z'a be ngù me ghù tshen tshu là là. 30 Kwéntse Yohané fe à kamànyam k'a fe à benntùn à? Bin bùnte me. 31 Bo kwate, ntshob netèt bo ndù: A be ze be tshob ndù a fe à kamànyam nà, mb'a' tshob ndù: Bin na' mbe ke bam i numke? 32 Là, a be ze be bèn netshob ndù: A fe à benntùn nà, bo bwôg bwoṅ benntùn, nummbe njoṅ benntùn fa ke ndo' Yohané à mba kua' ngatshob ntshob Nsi là. 33 Bo bùnte, ntshob Yésu ndù: Bag ke' lèn. Yésu tshob bo ndù: Mba mba me yàm ke nsi tshob ngù' ze me be ngù tshen tshu là yi là bin. |
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
Bible Society of Cameroon